4G డౌన్‌లోడ్ స్పీడ్‌లో జియో టాప్: ట్రాయ్

నవంబర్ నెలలో డేటా డౌన్‌లోడ్ స్పీడ్‌లో రిలయన్స్ జియో, అప్‌లోడ్ వేగంలో వొడాఫోన్ ముందున్నాయని టెలికం నియంత్రణ సంస్థ ట్రాయ్ గణాంకాలు వెల్లడించాయి. డౌన్‌లోడ్‌కు సంబంధించి జియో 20.8 Mbps, వొడాఫోన్ 9.8 Mbps, ఐడియా 8.8 Mbps, భారతీ ఎయిర్‌టెల్ 8 Mbps వేగాన్ని నమోదు చేశాయి. అప్‌లోడ్‌లో వొడాఫోన్ 6.5 Mbps, ఐడియా 5.8 Mbps, ఎయిర్‌టెల్ 4 Mbps, జియో 3.7 Mbps నమోదు చేశాయి.

వొడాఫోన్, ఐడియా సెల్యూలార్‌లు విలీనమైనప్పటికీ, వొడాఫోన్ ఐడియాగా పని చేస్తున్నప్పటికీ ట్రాయ్ మాత్రం వారి నెట్ వర్క్స్ పని తీరును వేర్వేరుగా లెక్కిస్తోంది. ఈ మేరకు ట్రాయ్ 10వ తేదీన గణాంకాలు వెల్లడిస్తున్నాయి.

అక్టోబర్ నెలలో రిలయన్స్ జియో సగటు డౌన్ లోడ్ స్పీడ్ 17.8Mbpsతో మరోసారి ముందు నిలిచిన విషయం తెలిసిందే. టెలికం రెగ్యులేటరీ అథారిటీ ఆఫ్ ఇండియా (TRAI) డేటా ప్రకారం జియో డౌన్ లోడ్ స్పీడ్ సెప్టెంబర్ నెలలో రికార్డ్ స్థాయి 19.1Mbps నుండి 17.8Mbpsకు తగ్గింది. జియో తర్వాత ఐడియా సగటు డౌన్ లోడ్ వేగం 9.1Mbpsగా ఉంది. ట్రాయ్ మైస్పీడ్ పోర్టల్ ప్రకారం అంతకుముందు రికార్డ్ స్పీడ్ 8.6Mbpsతో పోలిస్తే 0.5Mbps ఎక్కువ. రిలయన్స్ జియో 4G డౌన్ లోడ్ స్పీడ్ సెప్టెంబర్ నెలతో పోలిస్తే అక్టోబర్ నెలలో 1.5Mbps తగ్గినప్పటికీ అగ్రస్థానంలోనే నిలిచింది.