Reliance News: రిలయన్స్, టాటాల జాయింట్ వెంచర్.. అన్నీ కుదిరితే ఇండస్ట్రీని ఏలడం పక్కా..

Tata News: భారతీయ వ్యాపార సామ్రాజ్యంలో అంబానీ మరియు టాటాల స్టామినా ఏంటో రోజూ చూస్తూనే ఉన్నాం. రెండు దిగ్గజ కంపెనీలను నెలకొల్పి ఇండియా కీర్తిని ప్రపంచ వ్యాప్తంగా చాటిచెప్పిన ఘనులు. వీరిద్దరూ కలిసి ఓ జాయింట్ వెంచర్‌లో అడుగు పెడితే అది పక్కా హిట్ కాంబో కావడం ఖాయం.

ఇప్పటికే వాల్ట్ డిస్నీతో ముఖేష్ అంబానీకి చెందిన రిలయన్స్ ఇండస్ట్రీస్ చర్చలు జరుపుతున్నట్లు వార్తలు వస్తున్నాయి. ఆ కంపెనీ నుంచి టాటా ప్లేలో 29.8 శాతం వాటా కోసం సంప్రదింపులు కొనసాగుతున్నాయని సమాచారం. ఇది సాకారమైతే భారత టెలివిజన్ పంపిణీ రంగం ఓ కీలక ముందడుగు వేసినట్లేనని నిపుణులు చెబుతున్నారు.

శాటిలైట్ టెలివిజన్ బ్రాడ్‌కాస్టర్‌లో టాటా సన్స్‌కు 50.2 శాతం వాటా ఉంది. డిస్నీ కాకుండా మిగిలిన షేర్లు సింగపూర్ ఆధారిత ఫండ్ అయిన టెమాసెక్ యాజమాన్యంలో ఉన్నాయి. ఒప్పందం కుదిరితే టాటా గ్రూప్ మరియు రిలయన్స్ జాయింట్ వెంచర్‌లో భాగస్వామ్యం కావడం ఇదే మొదటిసారి అని మీడియా నివేదిక పేర్కొంది.తద్వారా టాటా ప్లే ప్లాట్‌ఫారమ్‌లో జియోసినిమా పరిధి సైతం భారీగా విస్తరిస్తుందని అంచనా వేసింది.

కంపెనీలో తన 20 శాతం వాటాను టెమాసెక్ విక్రయించాలని భావిస్తోంది. దీని విలువ దాదాపు 1 బిలియన్ డాలర్లుగా ఉంది. అయితే మార్చి 31, 2023తో ముగిసిన ఆర్థిక సంవత్సరంలో టాటా ప్లే 4 వేల 499 కోట్ల ఆదాయంతో పాటు 105 కోట్ల నష్టాన్ని నివేదించడం గమనార్హం.