రిలయన్స్ 48వ AGMలో ముకేశ్ అంబానీ ఏం సర్ప్రైజ్ ఇస్తారు? ఇన్వెస్టర్ల చూపు అంతా ఈ మీటింగ్‌పైనే!

భారతదేశంలోనే కాదు, ప్రపంచవ్యాప్తంగా కూడా ఇన్వెస్టర్లు ఆసక్తిగా ఎదురు చూస్తున్న ఈవెంట్ అంటే రిలయన్స్ ఇండస్ట్రీస్ వార్షిక జెనరల్ మీటింగ్ (AGM). ఈసారి 48వ AGM ఆగస్టు 29న మధ్యాహ్నం 2 గంటలకు జరగనుంది. దాదాపు 44 లక్షల షేర్‌హోల్డర్లతో ఉన్న ఈ కంపెనీ, డిజిటల్, రిటైల్, ఎనర్జీ రంగాల్లో తదుపరి వృద్ధి దిశను సూచించే కొన్ని కీలక ప్రకటనలు చేసే అవకాశం ఉంది.

ఇటీవలే ప్రకటించిన ఫలితాల ప్రకారం, RIL లాభాలు గణనీయంగా పెరిగాయి. త్రైమాసిక లాభం 77% పెరిగి రూ. 30,783 కోట్లకు చేరింది. ఇందులో ఆసియన్ పెయింట్స్‌లో వాటా విక్రయం కూడా ప్రధాన పాత్ర పోషించింది. ఒకసారి లాభాన్ని మినహాయిస్తే, అసలు వ్యాపార లాభం కూడా 25% పెరిగింది. రెవెన్యూ 6% పెరిగి రూ. 2.73 లక్షల కోట్లకు చేరగా, EBITDA 36% పెరిగి రూ. 58,024 కోట్లకు చేరింది. ఇంతకీ RIL స్టాక్ ఈ ఏడాది దాదాపు 13% పెరిగి ప్రస్తుతం రూ. 1,378.20 వద్ద ట్రేడవుతోంది.

ఇన్వెస్టర్లు ఎదురుచూస్తున్న అంశాలు

1. జియో & రిటైల్ IPOలు:
జియో ప్లాట్‌ఫార్మ్స్ మరియు రిలయన్స్ రిటైల్ IPOల గురించి ఏదైనా టైమ్‌లైన్ ప్రకటిస్తారా అన్నదే మార్కెట్‌లో పెద్ద చర్చ. ఈ రెండు బిజినెస్‌లు వృద్ధి దశలో ఉన్నాయి. విడిగా లిస్టింగ్ చేస్తే షేర్‌హోల్డర్లకు మరింత విలువ లభిస్తుందని అనేక బ్రోకరేజ్ సంస్థలు అంచనా వేస్తున్నాయి.

2. ఆర్టిఫిషియల్ ఇంటెలిజెన్స్ (AI) ఫోకస్:
RIL తన AI వ్యూహంపై కూడా దృష్టి పెట్టబోతోందని అంచనా. ఇటీవల విడుదలైన వార్షిక నివేదికలో ఎయిర్‌ ఫైబర్ ద్వారా గృహ కనెక్షన్లు వేగంగా పెరుగుతున్నాయని, ఫైబర్ + ఎయిర్‌ ఫైబర్ కలిపి 10 కోట్ల గృహాలకు చేరుకోవడమే లక్ష్యమని పేర్కొన్నారు. AGMలో దీనిపై మరింత స్పష్టత వచ్చే అవకాశం ఉంది.

3. గ్రీన్ ఎనర్జీ లక్ష్యాలు:
గ్రీన్ ఎనర్జీని రిలయన్స్ భవిష్యత్తులో ప్రధాన వృద్ధి ఇంజన్‌గా మార్చాలని ప్రణాళిక వేస్తోంది. ముఖేష్ అంబానీ గత AGMలో మాట్లాడుతూ, వచ్చే 5-7 ఏళ్లలో ఇది O2C (ఆయిల్ టు కెమికల్స్) వ్యాపారం స్థాయిలో లాభదాయకంగా మారుతుందని చెప్పారు. సోలార్ మాడ్యూల్స్, ఎలక్ట్రోలైజర్లు, బ్యాటరీలు, గ్రీన్ హైడ్రజన్ ఉత్పత్తి వంటి అన్ని దశల్లో ఎకోసిస్టమ్‌ను నిర్మిస్తోంది. ఇక పెరోవ్‌స్కైట్ సోలార్ సెల్స్, రాబోయే 4-6 క్వార్టర్లలో కొత్త ప్లాంట్ల ప్రారంభంపై అప్‌డేట్స్ వచ్చే అవకాశం ఉంది.

4. రిటైల్ అభివృద్ధి ప్రణాళికలు:
రిలయన్స్ రిటైల్ రంగంలో అభివృద్ధి వేగాన్ని పెంచాలని చూస్తోంది. ముఖ్యంగా FMCG విస్తరణ, జియో హాట్‌స్టార్ మోనిటైజేషన్, క్విక్ కామర్స్ లాంటి కొత్త అవకాశాలపై అప్‌డేట్స్ వచ్చే అవకాశం ఉంది. గత ఏడాది AGMలో రిటైల్ ఆర్జనలను 3-4 ఏళ్లలో రెట్టింపు చేయాలని లక్ష్యంగా పెట్టుకుంది. ఈసారి ఆ దిశలో కొత్త ప్లాన్లు వెల్లడి కావొచ్చు.

5. పెట్రోకెమికల్స్ & ఎనర్జీ ప్రొడక్షన్:
ఇప్పటికీ RILకి పెద్ద లాభం తెచ్చిపెడుతున్న O2C బిజినెస్ కీలకంగానే ఉంది. FY27 నాటికి పాలిస్టర్, వినైల్, కార్బన్ ఫైబర్ రంగాల్లో విస్తరణ ప్రణాళికలు అమలవుతున్నాయి. ఎనర్జీ ప్రొడక్షన్‌లో KG-D6 బేసిన్‌లో కొత్త వెల్‌ల డ్రిల్లింగ్ ద్వారా 2028 వరకూ గ్యాస్ ఉత్పత్తి కొనసాగించనుంది.

6. దీర్ఘకాలిక దృష్టి:
2030 నాటికి రిలయన్స్ మొత్తం వ్యాపారాన్ని రెట్టింపు చేయాలనే టార్గెట్ ఉంది. ఇందులో జియో, రిటైల్ విభాగాలు ముందుగానే డబుల్ అవుతాయని అంచనా. గ్రీన్ ఫ్యూయల్స్, AI ఆధారిత పరిష్కారాలు కంపెనీకి భవిష్యత్తులో ప్రధాన వృద్ధి ఇంజన్లుగా మారుతాయని ముఖేష్ అంబానీ నమ్మకం వ్యక్తం చేశారు.

మొత్తం మీద, రిలయన్స్ 48వ AGMలో ఇన్వెస్టర్లు, మార్కెట్ వర్గాలు అత్యంత ఆసక్తిగా ఎదురుచూస్తున్నాయి. జియో & రిటైల్ IPOలు, గ్రీన్ ఎనర్జీ ప్రణాళికలు, AI వ్యూహం, రిటైల్ విస్తరణపై వచ్చే అప్‌డేట్స్ కంపెనీ భవిష్యత్ దిశను నిర్ణయించే అవకాశం ఉంది. ఒక విధంగా చెప్పాలంటే, ఈ AGM రిలయన్స్ తదుపరి దశలో అడుగులు ఎలా ఉంటాయో సూచించే కీలక ఈవెంట్‌గా నిలుస్తుంది.