IT News: సవాళ్ల సుడిగుండంలో IT రంగం.. యాక్సెంచర్ నంబర్స్‌తో లెక్క పక్కా..!

IT News: ప్రపంచవ్యాప్తంగా నెలకొన్న ఆర్థిక అనిశ్చితుల మధ్య IT రంగం తీవ్ర ఒడిదుడుకులను ఎదుర్కొంటోంది. పలు దేశాలు సాంకేతికతపై వెచ్చించే ఖర్చులను తగ్గించుకుంటూ ఉండటంతో ఆదాయలకు గండి పడుతోంది. తాజాగా విడుదలైన యాక్సెంచర్ ఆర్థిక ఫలితాలు.. భారతీయ IT కంపెనీల గణాంకాలకు కర్టెన్ రైజర్‌ గా చెబుతున్నారు.

ఓ పక్క ద్రవ్యోల్బణ ఒత్తిళ్లు కొనసాగుతుండగా.. ఆగస్టుతో ముగిసిన కంపెనీ ఆర్థిక సంవత్సరం Q4లో యాక్సెంచర్ 16 బిలియన్ డాలర్ల ఆదాయాన్ని నమోదు చేసింది. అంతకుముందు త్రైమాసికంతో పోలిస్తే 0.36 శాతం తగ్గుదల నమోదైంది. పూర్తి ఏడాదికి ఆదాయం 4.2 శాతం పెరిగి 64.1 బిలియన్ డాలర్లకు చేరింది.

కాగా FY24 సంవత్సరాదాయంతో పాటు మొదటి త్రైమాసిక రాబడిపై యాక్సెంచర్ తన అంచనాలను విడుదల చేసింది. FY24 Q1లో కంపెనీ ఆదాయ వృద్ధి -2 నుంచి 2 శాతానికి చేరవచ్చని భావిస్తోంది. పూర్తి ఏడాది మొత్తానికైతే 2-5 శాతం పరిధిలో రాబడి సాధించే అవకాశం ఉన్నట్లు అంచనా వేసింది.

ఈ గణాంకాల ఆధారంగా భారతీయ IT రంగం వృద్ధిని విశ్లేషకులు అంచనా వేస్తున్నారు. అక్టోబర్ 11 నుంచి ఇక్కడ త్రైమాసిక ఆదాయాల సీజన్‌ ప్రారంభం కానుంది. ఈసారి ఇండియన్ టెక్ దిగ్గజాల నంబర్స్ అంతగా ఆకట్టుకోలేకపోవచ్చని భావిస్తున్నారు. భారతీయ IT ఇండస్ట్రీకి FY24లో సవాళ్లు తప్పవని ఇప్పటికే అంచనాలు ఉండగా.. ఏమి జరుగుతుందో వేచి చూడాలి మరి!