Jhunjhunwala News: నిమిషాల్లో రూ.800 కోట్లు లాస్..! రేఖా జున్‌జున్‌వాలా కొంపముంచి స్టాక్..

Titan Shares: భారత స్టాక్ మార్కెట్లలో అతిపెద్ద పెట్టుబడిదారుల్లో జున్‌జున్‌వాలా కుటుంబం ప్రముఖమైనది. అందుకే రాకేష్ జున్‌జున్‌వాలా మరణించినప్పటికీ వారి కుటుంబ పోర్ట్ ఫోలియోను చాలా మంది ఇప్పటికీ ఫాలో అవుతుంటారు. ఇప్పుడు పెట్టుబడి బాధ్యతలను ఆయన భార్య రేఖా చూసుకుంటున్నారు.

రాకేష్ జున్‌జున్‌వాలా ఉన్నప్పటి నుంచి వారి పెట్టుబడులు ఎక్కువగా టాటాలకు చెందిన టైటాన్ కంపెనీ షేర్లలో ఉండేవి. అయితే తాజాగా గతవారం చివరిలో టైటాన్ స్టాక్ తన మార్చి త్రైమాసికానికి సంబంధించిన ఫలితాలను ప్రకటించింది. దీంతో నేడు మార్కెట్లు ప్రారంభం కాగానే టైటాన్ కంపెనీ షేర్లు ఏకంగా 5 శాతం క్షీణతను నమోదు చేశాయి. మార్కెట్ అంచనాలను నాలుగో త్రైమాసికంలో కంపెనీ అందుకోవటంలో విఫలం అవ్వటంతో స్టాక్ పతనానికి గురైంది. దీంతో రేఖా జున్‌జున్‌వాలాకు ఏకంగా నిమిషాల్లోనే రూ.805 కోట్ల భారీ నష్టం వాటిల్లింది. ఆమె పెట్టుబడి సంపద వందల కోట్లలో తగ్గిపోయింది.

వివరాల్లోకి వెళితే మార్చి 31, 2024 నాటికి జున్‌జున్‌వాలా ఫ్యామిలీకి టైటాన్ కంపెనీలో 5.35 శాతం వాటాలు ఉన్నాయి. శుక్రవారం మార్కెట్లో టైటాన్ క్లోజింగ్ ప్రైస్ ప్రకారం వీటి మార్కెట్ విలువ దాదాపు రూ.16,792 కోట్లుగా ఉంది. సోమవారం షేర్ ధర పతనం కారణంగా టైటాన్ మార్కెట్ క్యాప్ ఏకంగా శుక్రవారం ఉన్న రూ.3,13,868 కోట్ల నుంచి ప్రస్తుతం రూ.2,98,815 కోట్లకు పడిపోయింది. నేడు ఇంట్రాడేలో టైటాన్ షేర్ ధర 5.18 శాతం మేర క్షీణతతో బీఎస్ఈలో ఒక్కోటి రూ.3,352.25కి పడిపోయింది.

టైటాన్ జనవరి-మార్చి త్రైమాసిక ఫలితాలను పరిశీలిస్తే.. జ్యూవెలరీ వ్యాపారంలో కొనసాగుతున్న కంపెనీ నికర లాభం వార్షిక ప్రాతిపదికన 7 శాతం పెరిగి రూ.786 కోట్లకు చేరుకుంది. ఇదే క్రమంలో త్రైమాసికంలో కంపెనీ ఆదాయం వార్షిక ప్రాతిపదికన 17 శాతం వృద్ధితో రూ.10,047 కోట్లుగా నమోదైంది. పసిడి, వెండి ధరలు విపరీతమైన పెరుగుతల క్రమంలో.. జ్యూవెలరీ వ్యాపారంలో బలహీనమైన డిమాండ్ వాతావరణం, తీవ్రమైన పోటీ వినియోగదారుల ఆఫర్‌ల కారణంగా ఆభరణాల వ్యాపారం మార్జిన్‌లు తగ్గుదలకు దారితీసినట్లు ప్రముఖ బ్రోకరేజ్ సంస్థ షేర్‌ఖాన్ అభిప్రాయపడింది. అయితే కంపెనీ ఆభరణాల వ్యాపారంలో దూకుడుగా వృద్ధిని లక్ష్యంగా చేసుకుంటోంది. ఫలితాలు అంచనాలను అందుకోవటంలో విఫలమైనప్పటికీ యాంటిక్ టైటాన్ షేర్లపై BUY రేటింగ్ కొనసాగిస్తూ షేర్లకు రూ.4,017 టార్గెట్ ధరగా ప్రకటించింది. ఇది గతంలో ఇచ్చిన టార్గెట్ ధర రూ.4,100ను తగ్గించింది.