IT news: భారత IT కంపెనీల్లో 65 శాతం తగ్గిన రిక్రూట్ మెంట్.. TCS, ఇన్ఫోసిస్‌, HCLలో నియామకాల లెక్కలివీ..

IT news: IT ఉద్యోగులకు ఈ ఏడాది అంతగా బాగున్నట్లు లేదు. గతేడాది సగం నుంచి మొదలైన లేఆఫ్ లు అంతం లేకుండా కొనసాగుతూనే ఉన్నాయి. ఒక్క టెక్ కంపెనీలే కాకుండా వివిధ రంగాల్లోని సంస్థలు ఉద్యోగాల్లో కోతలు విధిస్తున్నాయి. ఓ పక్క లేఆప్ లు మరోపక్క నియామకాల్లో మందగమనం వెరసి ఉద్యోగార్థుల పరిస్థితి అగమ్య గోచరంగా తయారైంది. గంపెడు ఆశలతో చదువు పూర్తి చేసుకుని బయటకు వస్తున్న విద్యార్థులకు ఏమి చేయాలో అర్థం కావడం లేదు.

మూడు టాప్ దేశీయ టెక్ కంపెనీలు టాటా కన్సల్టెన్సీ సర్వీసెస్ (TCS), ఇన్ఫోసిస్ మరియు HCL లకు గత ఆర్థిక సంవత్సరం సవాలుగా ఉంది. ఆయా కంపెనీలు నియామకాలను బాగా తగ్గించాయి. అంతకు ముందు ఆర్థిక సంవత్సరంలోని లక్షా 97 వేల మంది ఉద్యోగుల చేరికలు.. 2022-23లో దాదాపు 69 వేలకు పడిపోయాయి. అంటే 65 శాతం క్షీణత నమోదైందన్న మాట.

FY2023 నాల్గవ త్రైమాసికంలో నియామకాల్లో తగ్గుదల స్పష్టంగా కనిపించింది. 2022లో ఇదే సమయంతో పోలిస్తే 98.7 శాతం క్షీణత నెలకొంది. మార్చి 2023తో ముగిసిన త్రైమాసికంలో TCS, HCLTech మరియు Infosysలు కేవలం 884 మంది ఉద్యోగులను మాత్రమే రిక్రూట్ చేసుకున్నాయి. గతేడాది ఇదే కాలంలో 68 వేలకుపైగా సిబ్బంది కొత్తగా ఆయా కంపెనీల్లో చేరినట్లు గణాంకాలు చెబుతున్నాయి.

Q4లో 821, పూర్తి ఏడాదికి దాదాపు 23 వేల మందిని TCS రిక్రూట్ చేసుకుంది. మార్చి చివరి నాటికి 20.1 శాతం అట్రిషన్ రేటు నమోదు చేసింది. ఇన్ఫోసిస్ నియామకాల్లో గత సంవత్సరం దాదాపు 50 శాతం క్షీణత కనిపించింది. 2022లో నికరంగా సుమారు 22 వేల మందిని చేర్చుకుంది. రాబోయే త్రైమాసికాల్లో పరిస్థితి మెరుగుపడుతుందని ఆశిస్తోంది. ఇక HCL రిక్రూట్‌మెంట్ 57 శాతం పడిపోయింది. గతేడాది Q4లో 353 మందిని నియమించుకోగా.. ఏడాది మొత్తంగా 17 వేల మందికి ఉపాధి కల్పించింది.