SBI News: కొత్త ఏడాదిలో స్తంభించిన SBI సేవలు.. ఖాతాదారుల్లో అలజడి.. ఇదీ కారణం

SBI services disruption: కొత్త ఆర్థిక ఏడాదిలో పలు బ్యాంకుల సేవలకు అంతరాయం ఏర్పడింది. మొదటిరోజే ఇలా జరగడంతో వినియోగదారులు తీవ్ర అసహనం వ్యక్తం చేశారు. అయితే దేశీయ బ్యాంకింగ్ దిగ్గజం స్టేట్ బ్యాంక్ ఆఫ్ ఇండియా కూడా ఈ లిస్టులో ఉండటంతో ఖాతాదారులు ఇబ్బందులు ఎదుర్కొన్నారు.

ఏప్రిల్ 1న 12.20 AM నుంటి 3.20 PM మధ్య SBIకి చెందిన వివిధ ఆన్‌లైన్ సేవలు స్తంభించిపోయాయి. ఏదైనా సమస్య తలెత్తి ఉండవచ్చని చాలా మంది భావించారు. అయితే ఇంటర్నెట్ బ్యాంకింగ్, యోనో లైట్, యోనో బిజినెస్ వెబ్ మరియు మొబైల్ యాప్, UPI సేవలు అందుబాటులో ఉండవని SBI ముందే తెలిపింది.

ఆర్థిక ఏడాది ముగింపు కార్యకలాపాల్లో భాగంగా ఈ ఆన్‌లైన్‌ సేవల లభ్యత ఉండబోదని పేర్కొంది. అదే సమయంలో UPI లైట్ మరియు ATM సేవలకు ఎటువంటి ఇబ్బంది ఉండదని కూడా స్పష్టం చేసింది. 2 వేల నోట్ల మార్పిడి మరియు డిపాజిట్స్ వంటి లావాదేవీలు ఏప్రిల్ 1న అంగీకరించబోమని వెల్లడించింది. ఏప్రిల్ 2 నుంచి ఆయా సేవలు పునఃప్రారంభించబడుతాయని తెలిపింది.

మరో ప్రముఖ ప్రైవేట్ బ్యాంకింగ్ దిగ్గజం HDFC కూడా నేషనల్ ఎలక్ట్రానిక్ ఫండ్స్ ట్రాన్స్‌ఫర్ (NEFT) కార్యకలాపాలు ఏప్రిల్ 1న అందుబాటులో ఉండవని కస్టమర్‌లకు తెలియజేసింది. ఇతర సేవల యాక్సెస్ కు కొంత ఆలస్యం కావచ్చని ముందుగానే వెల్లడించింది. ఇవికాక పలు ఇతర బ్యాంకులు ఏప్రిల్ 1న మూసివేయబడ్డాయి.