ఇల్లు కొనకుండానే ప్రతి నెలా చేతికి అద్దె డబ్బులు.. ఇన్వెస్టర్లను ఆకర్షిస్తోన్న నయా బిజినెస్ ఐడియా!

భారతీయులకు ల్యాండ్ లేదా ఫ్లాట్ కొని, దానిని అద్దెకు ఇవ్వడం ద్వారా ప్రతి నెలా ఆదాయం సంపాదించడం అనేది ఒక సాంప్రదాయ కల. ఒక మంచి ఫ్లాట్ కొనడం, దానికి అద్దెదారులను వెతకడం, ప్రతి నెలా రెంట్ వసూలు చేయడం.. వినడానికి ఇది చాలా బాగుంటుంది. కానీ, నిజ జీవితంలో ప్రాక్టికల్‌గా చూస్తే ఇందులో ఎన్నో తలనొప్పులు ఉన్నాయి. మెట్రో సిటీలలో ప్రాపర్టీ ధరలు ఆకాశాన్ని తాకుతున్నాయి, దానికి తగ్గట్టుగా వచ్చే అద్దె శాతం (Rental Yield) చాలా తక్కువగా ఉంటోంది. దీనికి తోడు మెయింటెనెన్స్ ఖర్చులు, ఇల్లు ఖాళీగా ఉండే కాలం, అద్దెదారులతో వచ్చే గొడవలు ఎలాగూ ఉంటాయి. అందుకే, ఎలాంటి తలనొప్పులు లేకుండా రెంటల్ ఇన్ కమ్ (rental income) సంపాదించాలనుకునే వారి కోసం 'రీట్స్' (REITs), 'ఇన్విట్స్' (InvITs) రూపంలో ఒక అద్భుతమైన మార్గం అందుబాటులోకి వచ్చింది.

పెద్ద ఆఫీస్ కాంప్లెక్స్‌లో మీకూ ఒక చిన్న వాటా!

రీట్ (REIT - Real Estate Investment Trust) అనేది ఒక ప్రత్యేకమైన సంస్థ. ఇది పెద్ద పెద్ద కమర్షియల్ ఆఫీస్ బిల్డింగులు, షాపింగ్ మాల్స్, భారీ వేర్‌హౌస్‌లు, స్టార్ హోటళ్లను కొనుగోలు చేసి మెయింటెన్ చేస్తుంది. ఈ ప్రాపర్టీలను పెద్ద పెద్ద ఐటీ కంపెనీలకు లేదా బ్రాండ్లకు అద్దెకు ఇస్తారు. ఆ కంపెనీల నుండి వచ్చే భారీ అద్దె ఆదాయంలో సింహభాగాన్ని రీట్స్ సంస్థలు తమ ఇన్వెస్టర్లకు డివిడెండ్ల రూపంలో పంచుతాయి. ఇక్కడ మీరు ఒక బిల్డింగ్ మొత్తాన్ని కొనాల్సిన అవసరం లేదు. దేశంలోనే అత్యంత ఖరీదైన కమర్షియల్ ప్రాపర్టీల పోర్ట్‌ఫోలియోలో ఒక చిన్న భాగాన్ని (Units) మాత్రమే కొనుగోలు చేస్తారు.

ఇక ఇన్విట్ (InvIT - Infrastructure Investment Trust) కూడా ఇంచుమించు ఇలాగే పనిచేస్తుంది. కానీ ఇది ఆఫీస్ బిల్డింగులకు బదులుగా.. జాతీయ రహదారులు (Highways), పవర్ ట్రాన్స్‌మిషన్ నెట్‌వర్క్‌లు, గ్రీన్ ఎనర్జీ ప్రాజెక్టులు , టెలికాం టవర్ల వంటి మౌలిక వసతుల ప్రాజెక్టులను నిర్వహిస్తుంది. వీటి ద్వారా వచ్చే టోల్ ఫీజు, కరెంట్ బిల్లుల ఆదాయాన్ని ఇన్వెస్టర్లకు క్రమం తప్పకుండా పంపిణీ చేస్తుంది.

ఫిజికల్ ప్రాపర్టీ కంటే ఇవి ఎందుకు బెటర్?

• తక్కువ పెట్టుబడి: మీ దగ్గర కేవలం రూ. 10,000 లేదా రూ. 50,000 మాత్రమే ఉన్నాయనుకుందాం. ఈ డబ్బుతో మీరు ఒక ఐటీ పార్క్ లో ఆఫీస్ స్పేస్ గానీ, పెద్ద వేర్‌హౌస్ గానీ కొనలేరు. కానీ, REIT ద్వారా మీరు ఆ పెద్ద ఆస్తుల నుండి వచ్చే ఆదాయంలో భాగస్వామి కావచ్చు.
• ల్యాండ్‌లార్డ్ తలనొప్పులు ఉండవు: అద్దెదారులతో మాట్లాడటం, రిపేర్లు చేయించడం, టాక్సులు కట్టడం వంటి ఏ పనులూ మీరు చేయక్కర్లేదు. ప్రొఫెషనల్ ఫండ్ మేనేజర్లే ఈ బాధ్యతలన్నీ చూసుకుంటారు.
• సులభంగా నగదుగా మార్చుకోవచ్చు (Liquidity): ఒక సొంత ఇల్లు లేదా ప్లాట్ అమ్మాలంటే నెలలు లేదా ఏళ్ల సమయం పడుతుంది. అర్జంట్‌గా డబ్బులు కావాలంటే కుదరదు. కానీ, షేర్ మార్కెట్లో లిస్ట్ అయి ఉండే ఈ REIT, InvIT యూనిట్లను మీరు ఎప్పుడు కావాలంటే అప్పుడు కేవలం నిమిషాల వ్యవధిలో అమ్మేసి మీ సొమ్మును వెనక్కి తీసుకోవచ్చు.

REIT vs InvIT: ఏది ఎంచుకోవాలి?

ఈ రెండింటిలో ఏది బెస్ట్ అనేది మీ వ్యక్తిగత ఆసక్తిపై ఆధారపడి ఉంటుంది. రీట్స్ పూర్తిగా కమర్షియల్ రియల్ ఎస్టేట్ రంగంపై ఆధారపడి నడుస్తాయి. ఐటీ కంపెనీల డిమాండ్, సిటీలలో ఆఫీస్ స్పేస్ అద్దెలు పెరగడం వంటి అంశాలు దీని లాభాలను డిసైడ్ చేస్తాయి. మరోవైపు, ఇన్విట్స్ దేశంలో మౌలిక వసతుల వినియోగంపై ఆధారపడతాయి. హైవేలపై ట్రాఫిక్ పెరగడం, దేశంలో విద్యుత్ డిమాండ్, లాంగ్-టర్మ్ ప్రభుత్వ కాంట్రాక్టులు దీని పనితీరును ప్రభావితం చేస్తాయి. చాలా మంది ఇన్వెస్టర్లు తమ పోర్ట్‌ఫోలియోను వైవిధ్యభరితంగా (Diversify) మార్చుకోవడానికి ఈ రెండింటిలోనూ ఇన్వెస్ట్ చేస్తుంటారు.

సంప్రదాయ పద్ధతిలో మిమ్మల్ని ఒక ఇంటికి యజమానిని చేయకపోయినప్పటికీ.. కోట్లాది రూపాయల పెట్టుబడి లేకుండానే దేశంలోని టాప్ క్లాస్ రియల్ ఎస్టేట్, ఇన్‌ఫ్రా ప్రాజెక్టుల ద్వారా స్థిరమైన రెంటల్ ఇన్ కమ్ (rental income) సంపాదించడానికి ఇవి ఒక చక్కని ప్రత్యామ్నాయ మార్గాలు. రెగ్యులర్ ఆదాయంతో పాటు లాంగ్ టర్మ్‌లో క్యాపిటల్ గ్రోత్ కావాలనుకునే వారికి ఇదొక బెస్ట్ మిడిల్ గ్రౌండ్!