RBI కీలక వడ్డీ రేట్లు తగ్గింపు! బంగారం ధర ఎలా మారుతుందంటే..

డిసెంబర్ 5, శుక్రవారం రోజున భారతీయ ఆర్థిక వ్యవస్థకు అత్యంత కీలకమైన పరిణామం చోటు చేసుకుంది. మూడు రోజుల పాటు జరిగిన ద్రవ్య విధాన కమిటీ (Monetary Policy Committee - MPC) సమీక్ష తర్వాత రిజర్వ్ బ్యాంక్ ఆఫ్ ఇండియా (RBI) కీలకమైన పాలసీ రెపో రేటును మరో 25 బేసిస్ పాయింట్లు (bps) తగ్గించింది. దీంతో రెపో రేటు 5.25 శాతంకు దిగొచ్చింది.

తగ్గుతున్న ద్రవ్యోల్బణం (Inflation), అంచనాలను మించిన బలమైన జీడీపీ (GDP) వంటి అంశాలను దృష్టిలో ఉంచుకుని RBI ఈ నిర్ణయం తీసుకుంది. వడ్డీ రేట్ల కోతతో ఫిబ్రవరి నుంచి RBI తగ్గించిన మొత్తం రేటు 100 బేసిస్ పాయింట్లకు చేరుకుంది.

బలం పుంజుకున్న రూపాయి

RBI పాలసీ ప్రకటనకు ముందు, కరెన్సీ మార్కెట్‌లో రూపాయి (Rupee) బలంగా పుంజుకుంది. ఇటీవల వారంలో కొత్త రికార్డు కనిష్టాలను (90 మార్కు దాటి) తాకిన రూపాయి, శుక్రవారం ప్రారంభ ట్రేడింగ్‌లో అమెరికన్ డాలర్‌తో పోలిస్తే 9 పైసలు లాభపడి 89.80 వద్ద ట్రేడ్ అయింది. గురువారం రోజున కూడా రూపాయి బలహీనతను చూపి 90.36 వద్ద ప్రారంభమైనప్పటికీ, RBI జోక్యం, అమెరికన్ డాలర్ సూచీ (US Dollar Index) బలహీనపడటంతో అది 89.89 వద్ద ముగిసి 26 పైసల లాభాన్ని నమోదు చేసింది.

బంగారంపై ఎఫెక్ట్

RBI నిర్ణయం కోసం ఇన్వెస్టర్లు ఎదురుచూడటం వల్ల దేశీయ మార్కెట్‌లో బంగారం (Gold) ధరలు స్వల్పంగా తగ్గుముఖం పట్టాయి. మల్టీ కమోడిటీ ఎక్స్ఛేంజ్ (MCX) లో ఫిబ్రవరి గోల్డ్ ఫ్యూచర్స్ 0.14 శాతం తగ్గి రూ. 1,29,892 వద్ద ట్రేడ్ అయ్యాయి. అయితే, అమెరికన్ డాలర్ బలహీనంగా ఉండటం, స్పాట్ మార్కెట్‌లో డిమాండ్ స్థిరంగా ఉండటం వల్ల బంగారం ధరలు పెద్దగా పడిపోకుండా కొంత వరకు అడ్డుకోగలిగాయి. మరోవైపు సిల్వర్ కాంట్రాక్ట్‌లు మాత్రం స్వల్పంగా 0.74 శాతం పెరిగాయి. అంతర్జాతీయంగా ఈ రోజు విడుదల కానున్న అమెరికా ద్రవ్యోల్బణం సంఖ్యల కోసం ఇన్వెస్టర్లు ఆసక్తిగా ఎదురుచూస్తున్నారు.

RBI నమ్మకం ఇదే..

RBI గవర్నర్ సంజయ్ మల్హోత్రా భారత ఆర్థిక వ్యవస్థపై పూర్తి ఆత్మవిశ్వాసాన్ని వ్యక్తం చేశారు. ద్రవ్యోల్బణం మెరుగుపడటం, దేశీయ వృద్ధి వేగం బలంగా ఉండటంతో.. RBI తన జీడీపీ వృద్ధి అంచనాను FY26 కోసం 0.5 శాతం పెంచి 7.3 శాతంగా సవరించింది. అంతేకాకుండా ద్రవ్యోల్బణం అంచనాను కూడా తగ్గించింది. ద్రవ్య లభ్యతను మెరుగుపరచడానికి రూ. 1 లక్ష కోట్ల విలువైన OMO కొనుగోళ్లు, 5 బిలియన్ డాలర్-రూపాయి స్వాప్ వంటి కీలక లిక్విడిటీ చర్యలను కూడా RBI ప్రకటించింది. ఈ నిర్ణయాలన్నీ స్థూల ఆర్థిక పరిస్థితులు మెరుగ్గా ఉన్నాయని, ఆర్థిక వృద్ధికి మరింత మద్దతు ఇవ్వడానికి RBI సిద్ధంగా ఉందని స్పష్టం చేస్తున్నాయి.