వడ్డీ రేటు తగ్గించిన RBI..! మీ ఫిక్స్‌డ్ డిపాజిట్స్ రిటర్న్స్ తగ్గుతాయా?

భారతీయ రిజర్వ్ బ్యాంక్ (RBI) కీలకమైన రెపో రేటు (Repo Rate) ను 25 బేసిస్ పాయింట్లు (bps) తగ్గిస్తూ నిర్ణయం తీసుకుంది. దీంతో బెంచ్‌మార్క్ రేటు 5.50 శాతం నుంచి 5.25 శాతానికి తగ్గింది. RBI గవర్నర్ మల్హోత్రా ప్రస్తుత ఆర్థిక వాతావరణాన్ని "అరుదైన గోల్డీలాక్స్ పీరియడ్"గా అభివర్ణించారు. ఎందుకంటే జీడీపీ వృద్ధి బలంగా ఉంది. ద్రవ్యోల్బణం (Inflation) అదుపులో ఉంది. అయితే ఇది ఫిక్స్‌డ్ డిపాజిట్లను (FD)లను కొంత ప్రభావితం చేసే అవకాశం ఉంది. అదెలాగంటే..

సాధారణంగా రెపో రేటు కోత అనేది బ్యాంకులు తమ అప్పుల వడ్డీ రేట్లను తగ్గించుకోవడానికి దారితీస్తుంది. ఇది కొత్త ఫిక్స్‌డ్ డిపాజిట్ల (Fixed Deposits - FD) పై వడ్డీ రేట్లను కూడా తగ్గిస్తుంది. దీంతో మీ FDలపై తక్కువ రాబడి లభించే అవకాశం ఉంది.

పాత / కొత్త FD లపై ప్రభావం..

• ఇప్పటికే ఉన్న ఫిక్స్‌డ్ డిపాజిట్లు : RBI కొత్త వడ్డీ రేట్ల వల్ల మీరు ఇప్పటికే వేసిన FD లపై ఎలాంటి ప్రభావం ఉండదు. ఒకసారి FD బుక్ చేసిన తర్వాత, దాని వడ్డీ రేటు ఆ మొత్తం కాలానికి (Tenure) 'లాక్' చేయబడుతుంది. రెపో రేటు కోత కేవలం కొత్త డిపాజిట్లు లేదా పునరుద్ధరణలపై మాత్రమే ప్రభావం చూపుతుంది.
• కొత్త FD వడ్డీ రేట్లు: రెపో రేటు తగ్గడం వల్ల బ్యాంకులు RBI నుండి తక్కువ ఖర్చుతో అప్పు తీసుకోవచ్చు. అందువల్ల బ్యాంకులు తమ డిపాజిట్లపై వడ్డీ రేట్లను తగ్గించే అవకాశం ఉంది. 25 బేస్ పాయింట్ల కోత.. కొత్త FD రేట్లను 10 నుంచి 25 bps వరకు తగ్గిస్తుంది.
• స్వల్పకాలిక FD లు: 3 నుంచి 12 నెలల మధ్య ఉండే స్వల్పకాలిక FD లు పాలసీ మార్పులకు త్వరగా స్పందిస్తాయి. RBI ఇటీవల ప్రకటించిన రూ.1 లక్ష కోట్ల బాండ్ల కొనుగోలు అలాగే 5 బిలియన్ డాలర్ల ఫారెక్స్ స్వాప్ వంటి చర్యల కారణంగా ఈ షార్ట్ టర్మ్ FD రేట్లను త్వరగా తగ్గించే అవకాశం ఉంది.

ఇన్వెస్టర్లు ఏం చేయాలి?

రెపో రేటు కోత తో FDలపై రాబడి కచ్చితంగా తగ్గుతుంది. కాబట్టి ఎక్కువ రిటర్న్స్ ఆశించేవాళ్లు FDలలో ఇన్వెస్ట్ చేయడం సరైన ఆప్షన్ కాదంటున్నారు నిపుణులు. మరింత వ్యూహాత్మకంగా వ్యవహరించాలని సూచిస్తున్నారు. అదెలాగంటే..

• త్వరగా లాక్ చేసుకోండి: అధిక రాబడిని పొందాలనుకునే వారు, బ్యాంకులు రేట్లను సవరించడానికి ముందే FD లను బుక్ చేసుకోవడం మంచిది.
• FD లాడరింగ్ (FD Laddering): ఆర్పీఎస్ గ్రూప్ డైరెక్టర్ శశాంక్ గుప్తా వంటి నిపుణులు FD లాడరింగ్ ను సిఫార్సు చేస్తున్నారు. దీని ద్వారా.. పెట్టుబడిదారులు తమ డిపాజిట్లను వేర్వేరు కాలవ్యవధులలో (Tenures) విభజిస్తారు. దీనివల్ల మొత్తం డబ్బు తక్కువ రేట్ల వద్ద చిక్కుకోకుండా ఉంటుంది. భవిష్యత్తులో రేట్లు పెరిగితే, మెచ్యూర్ అయిన డిపాజిట్‌ను ఆ అధిక రేటు వద్ద మళ్లీ పెట్టుబడి పెట్టవచ్చు.
• సీనియర్ సిటిజన్ల కోసం: రాబడితోపాటు మెరుగైన భద్రత కోసం బ్యాంకు FD లతోపాటు కార్పొరేట్ FD లు, చిన్న పొదుపు పథకాల (Small Savings Schemes).. ఇలా అన్నింటిలో కొంతకొంత ఇన్వెస్ట్ చేయాలని నిపుణులు సూచిస్తున్నారు.