బంగారం రుణాలపై RBI హెచ్చరిక.. పసిడి రుణాలపై కఠిన నిబంధనలు విధిస్తున్న బ్యాంకులు

బంగారం ధరల్లో ఇటీవల పెరుగుతున్న తీవ్ర అస్థిరతపై రిజర్వ్ బ్యాంక్ ఆఫ్ ఇండియా (RBI) ఆందోళన వ్యక్తం చేసిన సంగతి విదితమే. దీంతో భారతదేశంలోని బ్యాంకులు, నాన్-బ్యాంకింగ్ ఫైనాన్షియల్ కంపెనీలు (NBFCలు) బంగారు రుణాలపై తమ విధానాలను కఠినతరం చేయడం ప్రారంభించాయి. బంగారు రుణ విభాగంలో జాగ్రత్తగా వ్యవహరించాలని నియంత్రణ సంస్థ స్పష్టమైన సంకేతాలు ఇవ్వడంతో, రుణదాతలు రిస్క్ నియంత్రణపై ఎక్కువ దృష్టి సారిస్తున్నారు.

ఇప్పటివరకు బంగారు ఆభరణాలపై 70 నుంచి 72 శాతం వరకు లోన్-టు-వాల్యూ (LTV) నిష్పత్తితో రుణాలు అందించిన అనేక సంస్థలు, ఇప్పుడు ఆ పరిమితిని 60 నుంచి 65 శాతానికి తగ్గించాయి. ఇది బంగారు ధరల వేగవంతమైన పెరుగుదల నేపథ్యంలో తీసుకున్న సాంప్రదాయిక, రక్షణాత్మక వైఖరిని ప్రతిబింబిస్తోంది. కరెన్సీ మార్పులు, ప్రపంచ రాజకీయ అనిశ్చితులు, గ్లోబల్ మార్కెట్ల ఒడిదుడుకులు బులియన్ ధరల్లో ఊగిసలాటకు కారణమవుతున్నాయని RBI ఆందోళన వ్యక్తం చేస్తోంది.

ఈ పరిణామాలపై ఒక సీనియర్ బ్యాంకర్ మాట్లాడుతూ.. నియంత్రణ సంస్థ బంగారు రుణాల విషయంలో వివేకంతో ముందుకెళ్లాలని సూచిస్తోంది. అధిక ధరలను ఆధారంగా చేసుకుని రుణగ్రహీతలు పెద్ద మొత్తాలను పొందకుండా, పంపిణీలను నెమ్మదింపజేయాలని, రిస్క్ మేనేజ్‌మెంట్‌ను బలోపేతం చేయాలని బ్యాంకులు, NBFCలపై ఒత్తిడి పెరిగిందని తెలిపారు. బంగారం ధరలు అకస్మాత్తుగా 10 నుంచి 15 శాతం పడిపోతే.. రుణ బాకీ విలువ తాకట్టు పెట్టిన ఆభరణాల విలువను మించిపోయే ప్రమాదం ఉందని RBI హెచ్చరిస్తోంది. అలా జరిగితే, రుణగ్రహీతలు చెల్లింపుల నుంచి వెనక్కి తగ్గే అవకాశం ఉండటంతో, బ్యాంకులు ఆస్తి నాణ్యత సమస్యలను ఎదుర్కోవాల్సి వస్తుంది. ఈ కథనాన్ని financial express ప్రచురించింది.

ఈ కథనం ప్రకారం.. ప్రస్తుతం MCX స్పాట్ మార్కెట్లో 10 గ్రాముల బంగారం ధర సుమారు రూ.1.31 లక్షలకు చేరుకుంది. గత మూడు నెలల్లోనే దాదాపు 20 శాతం, ఆరు నెలల్లో 35 శాతం వరకు ధరలు పెరగడం గమనార్హం. ఈ వేగవంతమైన పెరుగుదలే నియంత్రణ సంస్థలను మరింత అప్రమత్తం చేసింది. బంగారు రుణాలు ఇటీవల కాలంలో అత్యంత వేగంగా విస్తరిస్తున్న రిటైల్ క్రెడిట్ విభాగాలలో ఒకటిగా మారాయి. మార్చి 2025 నుంచి ఈ విభాగంలో వార్షికంగా దాదాపు 100 శాతం వృద్ధి నమోదైంది. బ్యాంకులలో తాకట్టు పెట్టిన బంగారు ఆభరణాలపై రుణాల విలువ గత 18 నెలలుగా ఆల్‌టైమ్ హై స్థాయిలను తాకుతోంది. 2024 ఏప్రిల్‌లో రూ.1.01 లక్షల కోట్లుగా ఉన్న ఈ మొత్తం, అక్టోబర్ 2025 నాటికి రూ.3.37 లక్షల కోట్లకు చేరుకుంది.

ఇదే సమయంలో రుణగ్రహీతల స్వభావం కూడా మారుతోందన్న ఆందోళనలు ఉన్నాయి. 31 నుంచి 40 సంవత్సరాల వయస్సు గల వారు బంగారు రుణాలలో సుమారు 40 నుంచి 45 శాతం వాటాను కలిగి ఉండగా, 21 నుంచి 30 సంవత్సరాల వయస్సు గల వారి భాగస్వామ్యం FY21తో పోలిస్తే రెట్టింపు అయింది. ప్రస్తుతం సగటు రుణ పరిమాణం రూ.80 వేల నుంచి రూ.1.5 లక్షల మధ్య ఉంటోందని ఒక గోల్డ్-ఫోకస్‌డ్ NBFCకి చెందిన సీనియర్ అధికారి తెలిపారు. అయితే ఈ రుణాలు ఆస్తి సృష్టి కంటే వినియోగ అవసరాలకే ఎక్కువగా ఉపయోగించబడుతున్నాయన్న ఆందోళన కూడా వ్యక్తమవుతోంది.

గతంలో మైక్రోఫైనాన్స్, వ్యక్తిగత రుణ విభాగాల్లో ఎదురైన సంక్షోభాలు రుణదాతలను అప్రమత్తం చేశాయని పరిశ్రమ వర్గాలు చెబుతున్నాయి. అందుకే దూకుడు వృద్ధికి బదులుగా, స్థిరత్వం, దీర్ఘకాలిక రిస్క్ నియంత్రణను ఎంచుకుంటున్నామని వారు స్పష్టం చేస్తున్నారు.