ద్రవ్యోల్బణంపై ఆర్బీఐ గవర్నర్ కీలక ప్రకటన..ఈ ఏడాది రిటైల్ ద్రవ్యోల్బణం అంచనా ఎంతంటే..

RBI MPC on Inflation: మూడు రోజుల పాటు జరిగిన ద్రవ్య విధాన కమిటీ (MPC) సమావేశాలు నేటితో ముగిసాయి. చివరి రోజు దేశ ఆర్థిక వ్యవస్థ, ద్రవ్యోల్బణం, అందరికీ బ్యాంకింగ్ సేవలను అందించడం సహా రిజర్వ్ బ్యాంక్ ఆఫ్ ఇండియా (RBI) గవర్నర్ సంజయ్ మల్హోత్రా కీలక విషయాలను వెల్లడించారు. రిటైల్ ద్రవ్యోల్బణం (CPI)లో ప్రస్తుతం తగ్గుదలలో ఉందని.. రాబోయే నెలల్లో ద్రవ్యోల్బణం నియంత్రణలో ఉంటుందని భావిస్తున్నట్లు ఆయన అన్నారు. దీంతో పాటుగా జన్ ధన్ యోజన 10 సంవత్సరాలు పూర్తయిన తర్వాత ప్రతి గ్రామంలో KYC శిబిరాలను ఏర్పాటు చేయడం గురించి కూడా తెలిపారు.

జూన్ నెలలో ప్రధాన CPI ద్రవ్యోల్బణం 2.1 శాతానికి పడిపోయిందని.. ఇది గత 77 నెలల్లో అత్యల్ప స్థాయి అని RBI గవర్నర్ అన్నారు. ద్రవ్యోల్బణం తగ్గడం ఇది వరుసగా ఎనిమిదవ నెల. ఆహార వస్తువుల ధరలు గణనీయంగా తగ్గడం వల్ల ఈ తగ్గుదల జరిగిందని ఆయన అన్నారు. కూరగాయలు, పప్పుధాన్యాలు రెండంకెల తగ్గుదలను నమోదు చేశాయన్నారు. దీనివల్ల ఆహార ద్రవ్యోల్బణం -0.2%కి చేరుకుంది. ఫిబ్రవరి 2019 తర్వాత ఆహార ద్రవ్యోల్బణం ప్రతికూలంగా ఉండటం ఇదే మొదటిసారని చెప్పుకొచ్చారు. జూలైలో పండ్లు..కూరగాయల ధరలు తగ్గుతూనే ఉన్నాయని అయితే ధరలు తగ్గే ధోరణి కొనసాగుతుందని గవర్నర్ అన్నారు. 2025-26లో ద్రవ్యోల్బణం గతంలో కంటే నియంత్రణలో ఉన్నట్లు కనిపిస్తోందని సంజయ్ మల్హోత్రా అన్నారు.

మెరుగైన రుతుపవనాలు, సాధారణ వర్షపాతం, ఖరీఫ్ పంటల మంచి విత్తనాలు, జలాశయాల్లో పుష్కలంగా నీరు, తగినంత ఆహార పదార్థాల నిల్వ వంటి కారణాల వల్ల ద్రవ్యోల్బణం నియంత్రణలోకి వచ్చిందని తెలిపారు. 2025 నాల్గవ త్రైమాసికంలో, ఆ తర్వాత ద్రవ్యోల్బణం 4 శాతం పైన పెరగవచ్చని ఆయన అన్నారు, ఎందుకంటే ఆ సమయంలో బేస్ ప్రభావం, మునుపటి విధాన నిర్ణయాల ప్రభావం కనిపిస్తుందని తెలిపారు.

ఈ అంశాలన్నీ పరిగణలోకి తీసుకుని ఉంచుకుని.. 2025-26లో రిటైల్ ద్రవ్యోల్బణం (CPI) 3.1 శాతం గా అంచనా వేసామన్నారు. ఇది రెండవ త్రైమాసికంలో 2.1%, మూడవ త్రైమాసికంలో 3.1%, నాల్గవ త్రైమాసికంలో 4.4%గా ఉండే అవకాశం ఉంది. 2026-27 మొదటి త్రైమాసికంలో ద్రవ్యోల్బణం 4.9 శాతం ఉండవచ్చని అంచనా. మొత్తంమీద, ద్రవ్యోల్బణానికి సంబంధించిన పరిస్థితి సమతుల్యంగా ఉందని ఆర్బీఐ గవర్నర్ స్పష్టం చేశారు.

ఫిబ్రవరి 2025 నుండి రెపో రేటును 100 బేసిస్ పాయింట్లు తగ్గించామని.. దీని ప్రభావం క్రమంగా ఆర్థిక వ్యవస్థ, క్రెడిట్ మార్కెట్‌పై చూపుతోందని ఆర్‌బిఐ గవర్నర్ అన్నారు. ప్రస్తుత ఆర్థిక పరిస్థితి, అనిశ్చితుల దృష్ట్యా.. ప్రస్తుతానికి రెపో రేటును 5.5% వద్ద నిర్వహించడం అవసరమని నొక్కి చెప్పారు. తద్వారా దాని పూర్తి ప్రభావం మార్కెట్‌పైకి చేరుతుందని ఆయన అన్నారు.అలాగే జన్ ధన్ యోజన 10 సంవత్సరాలు పూర్తి చేసిందని తెలిపారు. పెద్ద సంఖ్యలో ఖాతాలకు రీ-కెవైసి (రీ-కెవైసి) అవసరమని ఆర్‌బిఐ గవర్నర్ అన్నారు. అందువల్ల, జూలై 1 నుండి సెప్టెంబర్ 30, 2025 వరకు పంచాయతీ స్థాయిలో బ్యాంక్ శిబిరాలను నిర్వహిస్తున్నారు.