2000 Notes: రూ. 2000 నోట్లను మార్చుకోవడానికి అక్టోబర్ 7 వరకు గడువు పొడిగింపు..

రిజర్వ్ బ్యాంక్ ఆఫ్ ఇండియా (RBI) 2000 రూపాయల నోట్లను మార్చుకోవడానికి అక్టోబర్ 7 వరకు గడువును పొడిగించాలని నిర్ణయించింది."ఉపసంహరణ ప్రక్రియకు నిర్దేశించిన వ్యవధి ముగిసినందున, సమీక్ష ఆధారంగా రూ. 2000 నోట్ల డిపాజిట్ / మార్పిడి కోసం ప్రస్తుత ఏర్పాటును అక్టోబర్ 07, 2023 వరకు పొడిగించాలని నిర్ణయించాం" అని ఆర్‌బిఐ ఒక ప్రకటనలో తెలిపింది. రూ. 2000 నోట్లు చట్టబద్ధంగా కొనసాగుతాయని సెంట్రల్ బ్యాంక్ తెలిపింది.

నిజానికి రూ.2000 నోట్లను వాపస్ చేసేందుకు గడువు తేదీ సెప్టెంబర్ 30తో ముగియనుంది. ఈ గడువును పొడిగించింది ఇకపై ఎలాంటి జాప్యం లేకుండా రూ.2000 నోట్లను డిపాజిట్ చేయాలని లేదా మార్చుకోవాలని ఆర్‌బీఐ ప్రజలను కోరింది. ఇప్పటి వరకు రూ.2000 నోట్లలో దాదాపు 96% వెనక్కి వచ్చాయి. మే 19న, సెంట్రల్ బ్యాంక్ రూ. 2,000 కరెన్సీ బిల్లులను చెలామణి నుంచి ఉపసంహరించుకుంటున్నట్లు ప్రకటించింది.

దీనిని క్లీన్-నోట్ విధానంలో భాగంగా పేర్కొంటూ, తక్షణమే బిల్లుల జారీని నిలిపివేయాలని బ్యాంకులకు సూచించింది. రిజర్వ్ బ్యాంక్ ఆఫ్ ఇండియా యొక్క 'క్లీన్ నోట్ పాలసీ' ప్రకారం, రూ. 2,000 డినామినేషన్ నోట్లను చెలామణి నుంచి ఉపసంహరించుకోవాలని నిర్ణయించినట్లు ఆర్‌బిఐ తెలిపింది. తాజా RBI విడుదల ప్రకారం, మే 19, 2023 నాటికి చెలామణిలో ఉన్న రూ.2000 నోట్లలో 96 శాతం తిరిగి వచ్చాయి.

బ్యాంకుల నుంచి అందిన డేటాను ఉటంకిస్తూ, మే 19, 2023 నాటికి చెలామణిలో ఉన్న రూ.3.56 లక్షల కోట్ల రూ.2000 నోట్ల మొత్తం విలువ రూ.3.42 లక్షల కోట్లు తిరిగి అందాయని, ప్రస్తుతం రూ.0.14 లక్షల కోట్లు మాత్రమే చలామణిలో ఉన్నాయని ఆర్‌బీఐ పేర్కొంది. రూ.2000 డినామినేషన్ బ్యాంక్ నోట్ నవంబర్ 2016లో ప్రవేశపెట్టబడింది, ప్రాథమికంగా ఆ సమయంలో చలామణిలో ఉన్న మొత్తం రూ.500, రూ.1000 నోట్ల చట్టబద్ధమైన టెండర్ స్థితిని ఉపసంహరించుకున్న తర్వాత ఆర్థిక వ్యవస్థ కరెన్సీ అవసరాన్ని త్వరగా తీర్చడానికి 2000 నోట్లను తీసుకొచ్చారు.