Raghuram Rajan: రఘురామ్ రాజన్ షాకింగ్ కామెంట్స్.. ద్రవ్యోల్బణంపై సీరియస్ హెచ్చరిక..

Raghuram Rajan: ఇన్‌ఫ్లేషన్‌ను తగ్గించేందుకు రంగంలోకి దిగిన భారత సెంట్రల్ బ్యాంక్ కు ముందు మరింత టఫ్ పరిస్థితులు తప్పవని RBI మాజీ గవర్నర్ రఘురామ్ రాజన్ తెలిపారు. దీనికి ఎంతో దూరం లేదని ఆయన అంచనా వేశారు. ప్రపంచవ్యాప్తంగా పెరుగుతున్న ద్రవ్యోల్బణంతో పోరాడే ప్రయత్నంలో సెంట్రల్ బ్యాంకులు కీలక వడ్డీ రేట్లను పెంచాయి. ఈ బుధవారమే.. ఆర్‌బిఐ గవర్నర్ శక్తికాంత దాస్ ద్రవ్య విధాన కమిటీ ఏకగ్రీవ నిర్ణయాన్ని ప్రకటించింది. సెంట్రల్ బ్యాంక్ బ్యాంకులకు రుణాలు ఇచ్చే కీలక వడ్డీ రేటును తాజాగా మరో 50 బేసిస్ పాయింట్లు పెంచటంతో రెపో రేటు 4.9 శాతానికి చేరుకుంది.

చమురు ధరలే కారణమా..?
ఇప్పుడు అందరి దృష్టి మే నెలకు సంబంధించిన అమెరికా CPI ద్రవ్యోల్బణం డేటాపై ఉంది. ఆర్థికవేత్తలు వార్షిక పెరుగుదల 8.3 శాతం, ప్రధాన ద్రవ్యోల్బణం 5.9 శాతం పెరుగుతుందని అంచనా వేస్తున్నారు. చికాగో విశ్వవిద్యాలయం - బూత్ స్కూల్ ఆఫ్ బిజినెస్‌లో ఫైనాన్స్ ప్రొఫెసర్‌గా ఉన్న రిజర్వు బ్యాంక్ మాజీ గవర్నర్ రాజన్.. చమురు ధరల పెరుగుదల కారణంగా ఇంకా కొన్ని ప్రభావాలు ఉన్నాయని తాను భావిస్తున్నట్లు తెలిపారు. హెడ్‌లైన్, కోర్‌ ద్రవ్యోల్బణంలోకి ఫీడ్ అవుతుంది. కనుక మనం ఇంకా ద్రవ్యోల్బణం గరిష్ఠ స్థాయిని చూడలేదని ఆయన వెల్లడించారు. ఈ తరుణంలో యూఎస్ ఫెడ్ ద్రవ్యోల్బణాన్ని అదుపుచేసేందుకు కీలక వడ్డీ రేట్లను ఎంత వరకు పెంచుతుందనేది ముఖ్యమైన ప్రశ్న అని రాజన్ అన్నారు.

వడ్డీ రేట్ల పెంపు మళ్లీ ఉంటుందా..
యూరోపియన్ సెంట్రల్ బ్యాంక్ (ECB) కూడా దాని వృద్ధి అంచనాలను తగ్గించుకుంది. పైగా ద్రవ్యోల్బణం అంచనాను పెంచింది. ప్రస్తుతం ద్రవ్యోల్బణం 8 శాతంగా ఉంది. దీనికి ప్రధాన కారణంగా ఇంధన ధరలు నిలుస్తున్నాయి. అయితే రానున్న మరిన్ని ద్రవ్యపరపతి సమీక్షల్లో భారత రిజర్వు బ్యాంక్ కీలక వడ్డీ రేటు అయిన రెపో రేటును మరో 100 బేసిస్ పాయింట్ల మేర పెంచవచ్చని అంచనాలు ఉన్నాయి. పూర్తి స్థాయిలో ద్రవ్యోల్బణం అదుపులోకి రావటానికి మరో ఏడాది కాలం పట్టవచ్చని నిపుణులు అభిప్రాయపడుతున్నారు.