RBI News: సెంట్రల్ బ్యాంకుల పసిడి రేస్.. తగ్గేదే లేదంటున్న RBI.. 4 నెలల్లోనే..

Gold News: హద్దూఅదుపూ లేకుండా పెరిగిపోతున్న బంగారం ధరలను చూసి సామాన్యుడు బెంబేలెత్తిపోతున్నాడు. వ్యక్తులే కాకుండా దేశాలకు దేశాలు సైతం భారీ స్థాయిలో బంగారం నిల్వలను పెంచుకుంటూ పోతున్నాయి. ఈ పరిస్థితుల్లో మన దేశం ఎంత పసిడిని వెనకేసిందే తెలుసా..?

డిసెంబర్ 2023 చివరి నాటికి విదేశీ మారక నిల్వల్లో భాగంగా రిజర్వ్ బ్యాంక్ ఆఫ్ ఇండియా 803.6 టన్నుల బంగారాన్ని కలిగి ఉంది. ఇదికాస్తా ఏప్రిల్ 26, 2024 నాటికి 827.69 టన్నులకు పెరిగింది. అంటే ఈ ఏడాది జనవరి నుంచి ఏప్రిల్ మధ్య కేవలం 4 నెలల వ్యవధిలోనే 24 టన్నుల బంగారాన్ని సమకూర్చుకున్నట్లు RBI తాజాగా విడుదల చేసిన గణాంకాలు చెబుతున్నాయి. 2023 సంవత్సరం మొత్తంలో వెనకేసిన 16 టన్నుల కంటే ఇది దాదాపు 1.5 రెట్లు ఎక్కువ.

ప్రపంచ వ్యాప్తంగా ఏర్పడిన భౌగోళిక, రాజకీయ ఒత్తిళ్లు, సవాళ్ల నేపథ్యంలో బంగారాన్ని ఓ స్థిరమైన పెట్టుబడి సాధనంగా భావిస్తారు. అందుకే యుద్ధాలు, కరోనా వంటి మహమ్మారులు విజృంభించిన అస్థిర పరిస్థితుల్లో స్వర్ణాన్ని సమకూర్చుకోవడానికి ఆరాటపడుతుంటారు. ఇతర పెట్టుబడి సాధనాలతో పాటు వ్యూహాత్మక డైవర్సిఫికేషన్‌లో ఇదొక భాగంగా పరిగణించబడుతుంది.

అత్యంత ఎక్కువగా బంగారం వినియోగించే దేశాల్లో భారత్ కూడా ఉన్నప్పటికీ, పసుపు లోహం నిల్వలను పెంచుకోవడంలో మాత్రం RBI వెనకబడి ఉంది. 1991లో విదేశీ మారక ద్రవ్యం సంక్షోభ సమయంలో బంగారం నిల్వల్లో కొంత భాగాన్ని తాకట్టుపెట్టినప్పుడు విమర్శలను మూటగట్టుకుంది. ఆ మొత్తాన్ని తిరిగి తెచ్చుకున్న అనంతరం 2017 ఏడాది చివరి నుంచి కొత్తగా స్టాక్ జోడించడం మొదలుపెట్టింది. 2022 నుంచి బహిరంగ మార్కెట్లో స్వర్ణం కొనుగోలు చేయడం ప్రారంభించింది.

గతేడాది చివరి నాటికి మొత్తం విదేశీ మారక ద్రవ్య నిల్వలలో బంగారం వాటా 7.75 శాతంగా ఉంది. ఏప్రిల్ 2024 ముగిసే సమయానికి దాదాపు 8.7 శాతానికి పెరిగింది. 2024 మొదటి త్రైమాసికంలో దేశవ్యాప్తంగా 290 టన్నులు జోడించి ప్రపంచ బంగారం డిమాండ్‌లో నాలుగింట ఒకవంతు వాటాను సొంతం చేసుకుంది. అంతర్జాతీయంగానూ పలు దేశాల సెంట్రల్ బ్యాంకులు సైతం పసిడి నిల్వలను భారీగా పెంచుకునే పనిలో ఉన్నాయి.