రాకేష్ ఝున్‌ఝున్‌వాలా ఇన్వెస్ట్ చేసిన ఈ స్టాక్‌తో 'డబుల్' బొనాంజా!!

వాటర్ ట్రీట్‌మెంట్ కంపెనీ వా టెక్ వాబగ్ షేర్లు ఉదయం 10 శాతానికి పైగా లాభపడి రూ.330ని తాకింది. అయితే మార్కెట్ ముగిసే సమయానికి రూ.24 లేదా 8.16 శాతం లాభపడి రూ.320 వద్ద ముగిసింది. గ్లోబల్ బ్రోకరేజీ సంస్థ నోమురా ఈ స్టాక్ టార్గెట్ ధరను పెంచింది. దీంతో వా టెక్ వాబగ్ షేర్ పరుగు పెడుతోంది. ప్రముఖ ఇన్వెస్టర్ రాకేష్ ఝున్‌ఝున్‌వాలా, అతని సతీమణి రేఖా ఝున్‌ఝున్‌వాలాకు డిసెంబర్ 31, 2021 నాటికి ఇందులో 8.04 శాతం వాటాలు లేదా 50 లక్షల ఈక్విటీ షేర్లు ఉన్నాయి.

వాటర్ ట్రీట్మెంట్ సెక్టార్‌లో లీడింగ్ కంపెనీగా ఉంది. హెల్తీ ఆపరేషనల్ సామర్థ్యాన్ని కలిగి ఉంది. ఎబిటా మార్జిన్ వృద్ధిలో ఉంది. కంపెనీ మార్జిన్ 10 శాతం, బలమైన రుణ తగ్గింపుతో ఉందని, ఇవి కీలక సానుకూల అంశాల్లో ఒకటి అని నోమురా పేర్కొంది. నోమురా ఈ స్టాక్ టార్గెట్ ధరను రూ.634కు పెంచింది. ప్రస్తుత ధరతో పోలిస్తే ఇది 95 శాతం అధికం.

డిసెంబర్ 2021తో ముగిసిన త్రైమాసికాలంలో ఈ స్మాల్ క్యాప్ కంపెనీ కన్సాలిడేటెడ్ ఎబిటా ఏడాది ప్రాతిపదికన 12.1 శాతం పెరిగి రూ.78.7కు చేరుకుంది. మార్జిన్స్ 180 బేసిస్ పాయింట్లు పెరిగి 10.6 శాతంగా ఉంది. పారిశ్రామిక, అంతర్జాతీయ ఆర్డర్లు, ఈ కంపెనీ వేగం, మెరుగైన ఆపరేటింగ్ మార్జిన్స్‌కు దారి తీసిందని చెబుతోంది.