ఒక్కరోజులో రూ.426 కోట్లు నష్టపోయిన రాకేష్ ఝున్‌ఝున్‌వాలా

సాధారణంగా మార్కెట్ నిష్ణాతులు, నిత్యం మార్కెట్‌లో ఉండేవారు డబ్బులు కోల్పోరని చాలామంది భావించి ఉంటారు. ఇది అపోహగానే చెప్పవచ్చు. వారు కూడా డబ్బును కోల్పోతారు. ఇక, రాకేష్ ఝున్‌ఝున్‌వాలా గురించి ప్రత్యేకంగా చెప్పవలసిన అవసరం లేదు. అయనను భారత వారెన్ బఫెట్‌గా పిలుస్తారు. ఆయన ఏ స్టాక్స్‌లో ఇన్వెస్ట్ చేశారని చూసి, మరీ ఇన్వెస్ట్ చేసే వారు ఉంటారు. ఆయనకు టైటాన్, స్టార్ హెల్త్ ఇన్సురెన్స్ కంపెనీలలో షేర్లు ఉన్నాయి. ఈ రెండు స్టాక్స్ శుక్రవారం పడిపోయిన తర్వాత రాకేష్ ఝున్‌ఝున్‌వాలా పెద్ద ఎత్తున సంపదను కోల్పోయారు. యూఎస్ ద్రవ్యోల్భణం పెరుగుదల తర్వాత పడిపోతున్న మార్కెట్ మధ్య, టైటాన్ కంపెనీ షేర్ ధర శుక్రవారం రూ.53కు పైగా క్షీణించింది. స్టార్ హెల్త్ ఇన్సురెన్స్ షేర్ ధర ఒక్కో షేరుకు రూ.18.55 తగ్గింది.

టైటాన్ కంపెనీలో రాకేష్‌కు, ఆయన సతీమణి రేఖకు పెద్ద ఎత్తున షేర్లు ఉన్నాయి. రాకేష్‌కు 4.02 శాతం, రేఖకు 1.07 శాతం షేర్లు ఉన్నాయి. అంటే ఈ కంపెనీలో వీరి మొత్తం షేర్ల వ్యాల్యూ 5.09 శాతం లేదా రూ.4.52 కోట్లుగా ఉంది. టైటాన్ కంపెనీ షేర్ ధర రూ.53.20 పడిపోవడంతో ఈ దంపతుల సంపద రూ.240 కోట్లు హరించుకుపోయింది.

స్టార్ హెల్త్ ఇన్సురెన్స్‌లో రాకేష్, రేఖల షేర్ల వాటా వ్యాల్యూ 17.50 శాతం. 10 కోట్లకు పైగా షేర్లు ఉన్నాయి. నిన్నటి ట్రేడింగ్‌లో స్టార్ హెల్త్ షేర్ ధర రూ.18.55 తగ్గింది. దీంతో రాకేష్ ఝున్‌ఝున్‌వాలా నికర సంపద రూ.186 కోట్లు తగ్గింది. రెండు కంపెనీల ద్వారా శుక్రవారం ఒక్కరోజే ఆయన రూ.426 కోట్లు నష్టపోయారు.