బీమారంగంలో 74 శాతానికి FDI పరిమితి, రాజ్యసభ ఆమోదం

బీమా రంగంలో FDI పరిమితిని 74 శాతానికి పెంచేందుకు గురువారం రాజ్యసభ ఆమోదం తెలిపింది. ఈ సందర్భంగా జరిగిన చర్చలో బీమా సంస్థల మూలధన అవసరాలను తీర్చడానికి FDI పెంపు దోహదం చేస్తుందని కేంద్ర ఆర్థిక మంత్రి సీతారామన్ అన్నారు. దీంతో బీమా రంగంలోకి 74 శాతం విదేశీ ప్రత్యక్ష పెట్టుబడులను అనుమతించేందుకు లైన్ క్లియరైంది.

బీమా చట్టంలో సవరణలకు కేంద్ర కేబినెట్ వారం క్రితమే ఆమోదం తెలిపింది. ప్రస్తుతం జీవిత, జనరల్ బీమా సంస్థల్లో FDI పరిమితి 49 శాతంగానే ఉంది. దీనిని మరో 25 శాతం పెంచారు. దీంతో 74 శాతం పెట్టుబడులకు అనుమతి లభిస్తుంది. ఇన్సూరెన్స్ యాక్ట్ 1938లో మార్పులు చేశారు. 2015లో బీమా రంగంలో FDI పరిమితిని 26 శాతం నుంచి 49 శాతానికి పెంచారు.

ఆర్థిక రంగ సేవ‌ల్లో కీల‌క‌మైన బీమారంగానికి సంబంధించి గత బడ్జెట్‌లో కీలక నిర్ణయం తీసుకున్నారు. బీమా సంస్థ‌ల్లో విదేశీ ప్ర‌త్య‌క్ష పెట్టుబ‌డులు (FDI) ప‌రిమితిని మ‌రింత పెంచేందుకు బీమా చ‌ట్టం స‌వ‌ర‌ణ బిల్లును గత నెలలో పార్ల‌మెంటులో ప్ర‌వేశ‌పెట్టారు.