హైదరాబాద్ ఐఐటీ నుండి Pure EV సరికొత్త EPluto 7G ఈవీ స్కూటర్

హైదరాబాద్: దేశంలోని అత్యాధునిక ఎలక్ట్రికల్ స్కూటర్‌ను హైదరాబాదులో తయారు చేశారు. ఐఐటీతో కలిసి పని చేస్తున్న ప్యూర్ఈవీ అనే స్టార్టప్ ఈ స్కూటర్‌ను రూపొందించింది. ప్లూటో 7జీ పేరుతో తయారు చేసిన ఈ స్కూటర్‌ను నీతి ఆయోగ్ సభ్యులు వీకే సారస్వత్, డీఆర్డీవో చైర్మన్ సతీష్ రెడ్డి ఆదివారం ఆవిష్కరించారు.

ఏ వాతావరణ పరిస్థితుల్లో అయినా తట్టుకునేలా ఈ వాహనాన్ని రూపొందించారు. ఇందులో బ్యాటరీ వారంటీ నలభై వేల కిలోమీటర్లు. ఈ ఎలక్ట్రిక్ వాహనం అత్యధిక వేగం గంటకు 60 కిలో మీటర్లు. దీని ధరను రూ.79,999గా నిర్ణయించారు. ఈ ఎలక్ట్రిక్ స్కూటర్‌ను ఒక్కసారి పూర్తిగా ఛార్జ్ చేస్తే 116 కిలో మీటర్ల వరకు ప్రయాణిస్తుంది.

ఈ స్కూటర్ బ్యాటరీపై 40,000 కిలోమీటర్ల వ్యారెంటీ సదుపాయం ఉంది. అంటే ప్రయాణానికి అయ్యే ఖర్చు కి.మీ.కు 25 నుంచి 35 పైసలు మాత్రమే. ఐఐటీ హైదరాబాద్ క్యాంపస్‌లో 40 వేల చదరపు అడుగుల విస్తీర్ణంలో ఏర్పాటు చేసిన యూనిట్‌లో నెలకు 2,000 స్కూటర్లు తయారవుతాయి. డిమాండ్ అధికంగా ఉంటే భవిష్యత్తులో ఉత్పత్తి సామర్థ్యాన్నిపెంచే అవకాశముంది. తొలి ఏడాదిలో 10 వేల యూనిట్ల స్కూటర్లను విక్రయించాలని సంస్థ లక్ష్యంగా పెట్టుకుంది.