Diwali Gift: పంజాబ్ CM అదిరిపోయే దీపావళి గిఫ్ట్.. పన్ను చెల్లింపుదారులకు OTS అమలు

Diwali Gift: తెలుగు రాష్ట్రాల ప్రజలకు వన్-టైమ్ సెటిల్‌ మెంట్ సుపరిచితమే. ఏవైనా బకాయిలను ప్రజల నుంచి వేగంగా రాబట్టేందుకు ప్రభుత్వాలు ఈ టెక్నిక్ వినియోగిస్తుంటాయి. ఇదే సమయంలో కొంత డిస్కౌంట్ సైతం ఇస్తుండటంతో సదరు చెల్లింపుదారులు పెద్దఎత్తున స్పందించే అవకాశం లభిస్తుంది. సరిగ్గా ఇదే టెక్నిక్‌ ను GSTకి అప్లై చేసింది ఓ రాష్ట్ర ప్రభుత్వం.

రాష్ట్రంలోని వ్యాపారులకు పంజాబ్ ముఖ్యమంత్రి భగవంత్ సింగ్ మాన్ ప్రభుత్వం దీపావళి కానుక ప్రకటించింది. ప్రీ-GST బకాయిల వసూళ్లకు క్యాబినెట్ వన్-టైమ్ సెటిల్‌మెంట్ (OTS) పథకాన్ని ఆమోదించింది. దీని ద్వారా 60 వేల మంది వ్యాపారులకు ప్రయోజనం కలగనుందని ప్రభుత్వం చెబుతోంది. కేసుల భారాన్ని తగ్గించేందుకు వీలుగా బకాయిల రికవరీ కోసం ఈ పథకాన్ని ప్రారంభించినట్లు CM కార్యాలయ అధికార ప్రతినిధి తెలిపారు.

నవంబర్ 15 నుంచి ఈ OTS వర్తించనుంది. కాగా మార్చి 15, 2024 వరకు అందుబాటులో ఉంటుంది. మార్చి 31, 2023 వరకు మొత్తం డిమాండ్ (పన్ను, పెనాల్టీ మరియు వడ్డీ) 1 కోటి వరకు ఉన్న పన్ను చెల్లింపుదారులు ఈ పథకం కింద సెటిల్‌మెంట్ కోసం దరఖాస్తు చేసుకోవడానికి అర్హులుగా రాష్ట్ర ప్రభుత్వం నిర్ణయించింది.

మార్చి 31, 2023 నాటికి దాదాపు 39 వేల 787 కేసుల్లో బకాయి మొత్తం 1 లక్ష వరకు ఉంది. వీటికి OTS ద్వారా పంజాబ్ ప్రభుత్వం పూర్తి మాఫీ అందిస్తుంది. ఇక మరో 19 వేల 361 కేసులకుగాను వడ్డీ 100 శాతం, జరిమానా 100 శాతం మరియు పన్ను మొత్తంలో 50 శాతం మాఫీ చేయనుంది.