Power Stocks: సూపర్ లాభాలు నమోదు చేసిన అదానీ పవర్.. అస్సలు తగ్గని టాటా పవర్..

Adani Power: దేశంలో ప్రైవేటు విద్యుత్ రంగ సంస్థ అదానీ పవర్ తాజాగా తన నాలుగో త్రైమాసిక ఫలితాలను విడుదల చేసింది. దీనికి ముందు టాటాల నేతృత్వంలో నడుస్తున్న టాటా పవర్ సైతం అద్భుతమైన ఫలితాలను నమోదు చేసింది.

నాలుగో త్రైమాసికంలో అదానీ పవర్ కంపెనీ రూ.5,242 కోట్ల నికర లాభాన్ని నమోదు చేసింది. గత సంవత్సరం ఇదే కాలంలో కంపెనీ నికర లాభం కేవలం రూ.4,645.47 కోట్లుగా ఉంది. ఏడాది ప్రాతిపధికన 13 శాతం అధిక లాభాన్ని నమోదు చేసింది. 2023 మెుత్తం ఆర్థిక సంవత్సరం నాలుగు త్రైమాసికాల్లో కలిగి కంపెనీ రూ.10,727 కోట్లను నికర లాభంగా నమోదు చేసింది.

ఇక టాటా పవర్ సైతం లాభాల విషయంలో ఏమాత్రం తగ్గనంటూ మంచి ఫలితాలను నమోదు చేసింది. నాలుగో త్రైమాసికంలో నికర లాభం రూ.939 కోట్లుగా నమోదైంది. ఇది గత ఏడాది ఇదే కాలంతో పోల్చుకుంటే 48 శాతం అధికమైనది. ఈ క్రమంలో కంపెనీ ఒక్కో షేరుపై రూ.2 డివిడెండ్ చెల్లించాలని నిర్ణయించింది. మెుత్తం ఆర్థిక సంవత్సరానికి కంపెనీ లాభం రూ.3,810 కోట్లుగా నిలిచింది.

శుక్రవారం మార్కెట్లు ముగిసే సమయానికి అదానీ పవర్ లిమిటెడ్ కంపెనీ షేర్లు ఎన్ఎస్ఈలో రూ.240.10 వద్ద ఉన్నాయి. ఇదే క్రమంలో టాటా పవర్ కంపెనీ షేర్ విలువ ఎన్ఎస్ఈలో రూ.200 వద్ద ఉంది. ప్రధానంగా దేశంలో పవర్ డిమాండ్ భారీగా పెరుగుతున్న తరుణంలో విద్యుత్ వినియోగానికి గిరాకీ పెరుగుతోంది. ఇదే సమయంలో కంపెనీలు డిష్ట్రిబ్యూషన్ ఖర్చులను తగ్గించుకుంటూ ముందుకు సాగటం అధిక ఆదాయాలకు కారమంగా నిలుస్తోంది.