IDFC First Bank: లాభాల్లో తగ్గేదేలే.. భారీగా పెరిగిన ఐడిఎఫ్‌సి వడ్డీ ఆదాయం..

IDFC First Bank: ప్రైవేటు రంగంలో బ్యాంకింగ్ వ్యాపారం నిర్వహిస్తున్న ఐడిఎఫ్‌సి ఫస్ట్ బ్యాంక్ శనివారం తన ఆర్థిక ఫలితాలను ప్రకటించింది. మిగిలిన బ్యాంకుల మాదిరిగానే కంపెనీ రెండవ త్రైమాసికంలో మంచి పనితీరును కనబరిచింది.

సెప్టెంబరుతో ముగిసిన త్రైమాసికంలో ఐడిఎఫ్‌సి ఫస్ట్ బ్యాంక్ రూ.751 కోట్ల నికర లాభాన్ని ప్రకటించింది. గత ఏడాది ఇదే కాలంలో కంపెనీ నివేదించిన నికర లాభం రూ.556 కోట్ల కంటే 35 శాతం ఎక్కువ. కన్సాలిడేటెడ్ ప్రాతిపదికన, సెప్టెంబర్ 30తో ముగిసిన త్రైమాసికంలో పన్ను తర్వాత లాభం రూ.746.85 కోట్లుగా ఉంది. ఇది Q2FY23లో కంపెనీ నివేదించిన రూ.567.19 కోట్లతో పోలిస్తే 31.6% పెరిగింది.

అలాగే బ్యాంక్ నికర వడ్డీ ఆదాయం ఏడాది ప్రాతిపదికన 31 శాతం పెరిగి రూ.3,950 కోట్లుగా నివేదించింది. ఈ క్రమంలోనే కంపెనీ నికర వడ్డీ మార్జిన్ 5.83 శాతం నుంచి 6.32 శాతానికి పెరిగింది. సెప్టెంబర్ 2023 త్రైమాసికం చివరినాటికి స్థూల నిరర్థక ఆస్తులు రూ.3,747.8 కోట్లుగా ఉన్నాయి. ఇవి Q1 FY24 చివరినాటికి రూ.3,603.4 కోట్లుగా గతంలో ఉన్నాయి. ఏప్రిల్-జూన్ కాలంలో స్థూల GNP నిష్పత్తి 2.17 శాతం నుంచి 2.11 శాతానికి మెరుగుపడింది.

ఈ క్రమంలోనే బ్యాంక్ ఆస్తుల నాణ్యత పెరిగింది. స్థూల ఎన్పీఏలు గత ఏడాది రెంవడ త్రైమాసికంలో 3.18 శాతం నుంచి మెరుగుపడి ప్రస్తుత త్రైమాసికంలో 2.11 శాతానికి చేరుకున్నాయి. అలాగే నికర నిరర్థక ఆస్తులు 1.09 శాతం నుంచి 0.68 శాతానికి మెరుగుపడ్డాయి. ఇక బ్యాంక్ నిర్వహణ వ్యయం ఏడాది ప్రాతిపదికన 34 శాతం పెరిగి రూ.3,870 కోట్లుగా నివేదించబడింది.