Airtel: ఎయిర్‌టెల్ కంపెనీకి భారీ షాక్.. వాటాలు విక్రయిస్తున్న ప్రైవేట్ ఇన్వెస్టర్..

Airtel News: ప్రస్తుతం భారతదేశంలోని టెలికాం రంగంలో భారీ పోటీని తట్టుకుని నిలబడిన కంపెనీగా ఎయిర్ టెల్ నిలిచింది. ఇప్పటికే ఈ వ్యాపారంలో రిలయన్స్ జియో భారీ పెట్టుబడులతో మార్కెట్ వాటాను సైతం దక్కించుకుంది.

తాజాగా ఎయిర్‌టెల్ సంస్థకు పెద్ద షాక్ తగిలిందని చెప్పుకోవాలి. ప్రముఖ ప్రైవేట్ ఈక్విటీ పెట్టుబడి సంస్థ కార్లైల్ టెలికాం ఆపరేటర్ భారతి ఎయిర్‌టెల్ లిమిటెడ్ డేటా సెంటర్ యూనిట్ అయిన Nxtra డేటా లిమిటెడ్‌ నుంచి తప్పుకోవాలని చూస్తున్నట్లు వెల్లడైంది. ఈ వ్యాపారంలో తనకున్న మెుత్తం 24 శాతం వాటాలను విక్రయించాలని చూస్తున్నట్లు ఒక అజ్ఞాత వ్యక్తి వెల్లడించారు.

వాస్తవానికి కార్లైల్ 2020లో Nxtraలో సుమారు రూ.1,780 కోట్లకు వాటాను కొనుగోలు చేసింది. Nxtraలో తమ వాటా కోసం కొన్ని ఇన్‌బౌండ్ అభ్యర్థనలను ఈక్విటీ ఇన్వెస్టర్ అందుకుంది. ఈ క్రమంలో కంపెనీ పెట్టిన మెుత్తం డబ్బు బాగా వృద్ధిని నమోదు చేసినట్లు వెల్లడైంది. అయితే ఈ విషయంపై అటు కార్లైల్ లేదా ఇటు భారతీ ఎయిర్‌టెల్ కానీ అధికారికంగా స్పందించలేదు. అయితే ఈ వార్తల నేపథ్యంలో కంపెనీ షేర్లు స్వల్పంగా ఊగిసలాడుతూ ఉదయం 10.17 గంటల సమయంలో రూ.1112.40 వద్ద ట్రేడింగ్ కొనసాగిస్తున్నాయి.

మార్చి 31, 2023 నాటికి Nxtra కంపెనీకి ముంబై, పూణే, బెంగళూరు, చెన్నై, నేషనల్ క్యాపిటల్ రీజియన్, భువనేశ్వర్‌లలో రెండు హైపర్-స్కేల్ డేటా సెంటర్‌లు, 10 ఎంటర్‌ప్రైజ్-గ్రేడ్ డేటా సెంటర్‌లను కలిగి ఉంది. అలాగే భారతదేశం అంతటా 120 కంటే ఎక్కువ ఎడ్జ్ డేటా సెంటర్‌లను కలిగి ఉంది. గడచిన ఐదేళ్ల కాలంలో కంపెనీ ఆదాయం 13 శాతం వేగంగా వృద్ధి చెంది 2019 ఆర్థిక సంవత్సరంలో రూ.852 కోట్ల నుంచి 2023 ఆర్థిక సంవత్సరానికి రూ.1,601 కోట్లకు చేరుకుంది. Nxtra మాతృ సంస్థ ఎయిర్‌టెల్‌తో బలమైన లింక్‌లను కలిగి ఉందని రేటింగ్ ఏజెన్సీ కేర్ వెల్లడించింది.