Bengaluru News: బెంగళూరు వాసులకు గుడ్ న్యూస్.. నవంబర్ 13న మెట్రో పింక్ లైన్ ప్రారంభం..!

బెంగళూరు వాసులకు గుడ్ న్యూస్. 10 రోజుల్లో మెట్రో పింక్ లైన్ ప్రజలకు అందుబాటులోకి రాబోతుంది. నగరంలో కీలక కానున్న బెంగళూరు మెట్రో 'పింక్ లైన్'లోని 7.5 కిలోమీటర్ల ఎలివేటెడ్ (పైవంతెన మార్గం) మార్గాన్ని ప్రధాని నరేంద్ర మోదీ నవంబర్ 13న ప్రారంభించనున్నట్లు అధికారికంగా ప్రకటన వచ్చింది. తప్పనిసరిగా ఉండాల్సిన నిర్వహణ అనుమతుల కోసం ఆరు నెలల పాటు నిలిచిపోయిన ఈ ప్రాజెక్టుకు ఎట్టకేలకు అనుమతులు ఇచ్చారు. దక్షిణ బెంగళూరులోని అత్యంత రద్దీగా ఉండే ప్రాంతాల్లో ప్రయాణాన్ని సులభతరం చేసేందుకు బెంగళూరు మెట్రో రైల్ కార్పొరేషన్ లిమిటెడ్ (BMRCL) ఆరు రైళ్లను సిద్ధం చేసింది.

ఈ మార్గానికి ఇప్పటికే 'కమిషనర్ ఆఫ్ మెట్రో రైల్ సేఫ్టీ' (CMRS) నుంచి భద్రతా అనుమతులు కూడా లభించాయి.బెంగళూరు మెట్రో రైల్ కార్పొరేషన్ లిమిటెడ్, రాష్ట్ర ప్రభుత్వం త్వరలోనే అధికారిక సమయ పట్టికను, ప్రారంభోత్సవ కార్యక్రమానికి సంబంధించిన వివరాలను ప్రకటించనుంది. మొత్తం 21.26 కిలోమీటర్ల పొడవున్న పింక్ లైన్‌లో 13.76 కిలోమీటర్ల భూగర్భ మార్గం, 7.5 కిలోమీటర్ల ఎలివేటెడ్ మార్గం ఉన్నాయి. కాలేన అగ్రహార నుంచి తవరకెరె వరకు ఉన్న ఎలివేటెడ్ విభాగం పూర్తిగా పూర్తయింది. CMRS నుంచి భద్రతా అనుమతిని కూడా పొందింది. ఈ మార్గంలోని ఆరు ప్రధాన స్టేషన్లతో మెట్రో సేవలు ప్రారంభం కానున్నాయి.

ఈ మార్గం అందుబాటులోకి రావడం వల్ల బన్నెరఘట్ట రోడ్డు, ఐఐఎంబీ (IIMB), జేపీ నగర్, జయదేవ హాస్పిటల్ పరిసర ప్రాంతాల్లో ప్రయాణించే వారికి ఎంతో ఉపశమనం కలగనుంది. ఈ ప్రాంతాల్లో, ముఖ్యంగా ఉదయం, సాయంత్రం వేళల్లో తీవ్రమైన ట్రాఫిక్ రద్దీ ఉంటుంది. వర్షాకాలంలో అయితే ఇక్కడ కిలోమీటర్ల కొద్దీ ట్రాఫిక్ జామ్ కావడం సర్వసాధారణంగా మారింది. మెట్రో సేవలు ప్రారంభం కావడం వల్ల ట్రాఫిక్ రద్దీ తగ్గి, ప్రయాణికులకు ప్రత్యామ్నాయ రవాణా మార్గం అందుబాటులోకి వస్తుంది. కాలేన అగ్రహార నుంచి తవరకెరె వరకు ఉన్న మెట్రో మార్గాన్ని ప్రారంభించేందుకు ప్రధాన మంత్రి నరేంద్ర మోదీ నవంబర్ 15న బెంగళూరుకు వస్తారని సీఎం పేర్కొన్నారు. అయితే ఇప్పుడు షెడ్యూల్ మారింది. ప్రధాని మోదీ నవంబర్ 15కి బదులుగా నవంబర్ 13న పింక్ లైన్ మెట్రో సేవలను ప్రారంభిస్తారు.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.