Post Office Schemes: పోస్టాఫీస్ ఇన్వెస్టర్లకు గుడ్ న్యూస్! 2026 మొదటి త్రైమాసిక వడ్డీ రేట్లు ఇవే!

కేంద్ర ప్రభుత్వం 2026 కొత్త సంవత్సరంలో పొదుపు చేసుకునే వారికి తీపి కబురు అందించింది. చిన్న మొత్తాల పొదుపు పథకాలపై వడ్డీ రేట్లను స్థిరంగా ఉంచుతూ ఆర్థిక మంత్రిత్వ శాఖ కీలక నిర్ణయం తీసుకుంది. ఆ వివరాలు ఇప్పుడు చూద్దాం.

మధ్యతరగతి ప్రజలకు, రిటైర్డ్ ఉద్యోగులకు అత్యంత సురక్షితమైన పెట్టుబడి మార్గాలైన పోస్ట్ ఆఫీస్ స్కీమ్స్ (post office schemes) పై కేంద్ర ప్రభుత్వం కీలక నిర్ణయం వెలువరించింది. 2025-26 ఆర్థిక సంవత్సరం నాలుగో త్రైమాసికానికి (జనవరి 1, 2026 నుండి మార్చి 31, 2026 వరకు) సంబంధించి వడ్డీ రేట్లలో ఎలాంటి మార్పులు చేయడం లేదని బుధవారం (డిసెంబర్ 31, 2025) ఆర్థిక మంత్రిత్వ శాఖ స్పష్టం చేసింది. అంటే గతేడాది అక్టోబర్-డిసెంబర్ కాలంలో ఉన్న వడ్డీ రేట్లే ఈ ఏడాది మార్చి వరకు కొనసాగుతాయి.

లేటెస్ట్ వడ్డీ రేట్ల వివరాలు

ప్రభుత్వ ప్రకటన ప్రకారం వివిధ పథకాలపై వడ్డీ రేట్లు ఈ విధంగా ఉన్నాయి..

• సుకన్య సమృద్ధి యోజన (SSY): ఆడపిల్లల భవిష్యత్తు కోసం ఉద్దేశించిన సుకన్య సమృద్ధి యోజన పథకంపై అత్యధికంగా 8.2% వడ్డీ లభిస్తుంది.
• పబ్లిక్ ప్రావిడెంట్ ఫండ్ (PPF): దీర్ఘకాలిక పొదుపుదారులకు ఎంతో ఇష్టమైన పీపీఎఫ్ పై 7.1% వడ్డీ రేటు కొనసాగుతోంది.
• కిసాన్ వికాస్ పత్ర (KVP): దీనిపై 7.5% వడ్డీ లభిస్తుంది. మీ పెట్టుబడి 115 నెలల్లో రెట్టింపు అవుతుంది.
• నేషనల్ సేవింగ్స్ సర్టిఫికేట్ (NSC): ఎన్ఎస్‌సీ పై 7.7% వడ్డీ రేటును ప్రభుత్వం స్థిరంగా ఉంచింది.
• మంత్లీ ఇన్ కమ్ స్కీమ్ (MIS): ప్రతినెలా ఆదాయం కోరుకునే వారికి ఈ స్కీమ్ ద్వారా 7.4% వడ్డీ లభిస్తుంది.
• పోస్టాఫీస్ సేవింగ్స్ డిపాజిట్: సాధారణ పోస్ట్ ఆఫీస్ సేవింగ్స్ ఖాతాపై 4% వడ్డీ ఉంటుంది.
• టర్మ్ డిపాజిట్లు (FD): మూడేళ్ల కాలపరిమితి గల డిపాజిట్లపై 7.1% వడ్డీ అందుబాటులో ఉంది.

వడ్డీ రేట్లు ఎవరు నిర్ణయిస్తారు?

సాధారణంగా ప్రభుత్వం ప్రతి మూడు నెలలకు ఒకసారి చిన్న మొత్తాల పొదుపు పథకాలపై వడ్డీ రేట్లను సమీక్షిస్తుంది. శ్యామల గోపీనాథ్ కమిటీ సూచించిన పద్ధతి ప్రకారం.. మార్కెట్‌ లోని ప్రభుత్వ సెక్యూరిటీల రాబడిని బట్టి ఈ రేట్లను నిర్ణయిస్తారు.

ఎందుకు ఇన్వెస్ట్ చేయాలి?

చాలా మంది మదుపర్లు స్టాక్ మార్కెట్ లేదా మ్యూచువల్ ఫండ్స్ లో ఉన్న రిస్క్ తీసుకోవడానికి ఇష్టపడరు. అలాంటి వారికి పోస్ట్ ఆఫీస్ స్కీమ్స్ (post office schemes) అత్యుత్తమ ఎంపిక. ఇవి ప్రభుత్వం మద్దతు ఉన్న పథకాలు కావడంతో మీ డబ్బుకు పూర్తి భద్రత ఉంటుంది. అంతేకాకుండా, పీపీఎఫ్, సుకన్య సమృద్ధి వంటి పథకాల ద్వారా ఆదాయపు పన్ను చట్టంలోని సెక్షన్ 80C కింద పన్ను మినహాయింపులు కూడా పొందవచ్చు.

2026 కొత్త సంవత్సరంలో పొదుపు ప్రారంభించాలనుకునే వారికి ఈ స్థిరమైన వడ్డీ రేట్లు మంచి అవకాశం అని నిపుణులు అభిప్రాయపడుతున్నారు. ముఖ్యంగా గ్రామీణ, పట్టణ ప్రాంతాల్లోని తక్కువ ఆదాయ వర్గాల వారికి ఈ స్కీమ్స్ ఆర్థిక భరోసాను ఇస్తాయి. కాబట్టి సరైన పథకాన్ని ఎంచుకుని పొదుపు మొదలుపెట్టండి.