డిజిటల్ మోడ్ షాక్: పెట్రోల్, డీజిల్ కొనుగోలుపై ఇన్‌సెంటివ్ నిలిపివేత!

ప్రభుత్వరంగ సంస్థ పంజాబ్ నేషనల్ బ్యాంకు (PNB) కీలక నిర్ణయం తీసుకున్నది. డిజిటల్ మోడ్స్ ద్వారా ఇంధనం కొనుగోలు చేస్తే ఇన్‌సెంటివ్ లేదా ప్రోత్సాహకాలను వెనక్కి తీసుకుంది. పెట్రోల్ బంక్స్ వద్ద ఇంధనం కొనుగోళ్లకు డిజిటల్ రూపంలో చెల్లింపులు జరిపితే ఇప్పటి వరకు ఇస్తున్న 0.75 శాతం ప్రోత్సాహకాన్ని నిలిపివేసినట్లు PNB ప్రకటించింది.

చమురు మార్కెటింగ్ రంగ సంస్థలు ఇండియన్ ఆయిల్ కార్పోరేషన్, బీపీసీఎల్, హెచ్‌పీసీఎల్‌లు ఈ సదుపాయాన్ని ఉపసంహరించుకున్నాయి. దీంతో తాము ప్రోత్సాహకాన్ని నిలిపివేసినట్లు పంజాబ్ నేషనల్ బ్యాంకు తన వెబ్ సైట్‌లో తెలిపింది. 2016లో పెద్ద నోట్ల రద్దు తర్వాత డిజిటల్ చెల్లింపులపై 0.75 శాతం డిస్కౌంట్‌ను ప్రోత్సాకంగా ఇవ్వాలని పెట్రో కంపెనీలను కేంద్రం కోరింది. ఇప్పుడు దీనిని ఉపసంహరించాయి.

పంజాబ్ నేషనల్ బ్యాంకు ఈ మార్పులను మే 10, 2022 నుండి అమలులోకి తెచ్చిందని, PNB POS(పాయింట్ ఆఫ్ సేల్) టెర్మినల్‌లో ఇకపై ఏదైనా ఇంధన ఔట్ లెట్‌లో వారి ట్రాన్సాక్షన్ కోసం కార్డు హోల్డర్‌కు ఎలాంటి ప్రోత్సాహకాలు అందించబడదని పంజాబ్ నేషనల్ బ్యాంకు ఓ ప్రకటనలో తెలిపింది.