GDP growth: GDP వృద్ధిపై ప్రధాని మోదీ కీలక వ్యాఖ్యలు.. గిఫ్ట్ సిటీ, పదేళ్లలో సంస్కరణలపై ఘాటు స్పీచ్

GIFT city: అగ్రరాజ్యాలు సైతం అందుకోలేని ఫీట్‌ ని సాధిస్తూ భారత్ వృద్ధి పథంలో తారాజువ్వలా ముందుకు వెళుతోంది. ప్రపంచ దేశాలు చతికిలపడినా ఇండియా మాత్రం తన హవా కొనసాగిస్తూనే ఉంది. కరోనా అనంతరం అంతర్జాతీయ సమాజం ఆర్థిక అనిశ్చితిలో చిక్కుకోగా.. మన దేశం GDPని మెరుగుపరుచుకుంటూ ప్రపంచంలో మూడవ అతిపెద్ద ఆర్థిక వ్యవస్థగా అడుగులు వేసింది.

ప్రస్తుత ఆర్థిక సంవత్సరం మొదటి 6 నెలల్లోనే భారత GDP వృద్ధి రేటు 7.7 శాతంగా నమోదు అయింది. ఈ విధంగా దేశ ఆర్థిక వ్యవస్థ బలోపేతం కావడానికి గత పదేళ్లలో చేపట్టిన సంస్కరణలే కారణమని ప్రధాని మోదీ తెలిపారు. వాటి పర్యవసానంగానే వివిధ దేశాలు అందుకోలేని వృద్ధిరేటును భారత్ సునాయాసంగా చేరుకోగలిగిందన్నారు. గిఫ్ట్ సిటీ లో జరిగిన 'ఇన్ఫినిటీ ఫోరం 2.0' సదస్సులో వీడియో లింక్ ద్వారా ఆయన ఈమేరకు ప్రసంగించారు.

గుజరాత్ ఇంటర్నేషనల్ ఫైనాన్స్ టెక్ (GIFT) సిటీని ఆధునిక యుగపు ప్రపంచ ఆర్థిక మరియు సాంకేతిక సేవల కేంద్రంగా మార్చాలని తాము భావిస్తున్నట్లు మోదీ తెలిపారు. అంతర్జాతీయ సమాజం చూపు దేశంపై ఉందని, ఆయా దేశాలు భారత్ పైనే ఆశలు పెట్టుకున్నాయన్నారు. ఇది కేవలం తనంతట తానుగా జరగలేదని, వివిధ పరివర్తనాత్మక మార్పుల ఫలితమే అన్నారు.

ప్రపంచంలోనే భారత్ నేడు అత్యంత వేగంగా అభివృద్ధి చెందుతున్న ఫిన్‌ టెక్ మార్కెట్లో ఒకటని ప్రధాని గుర్తు చేశారు. ఇదే సమయంలో గిఫ్ట్ సిటీ కేంద్రంగా ఇంటర్నేషనల్ ఫైనాన్షియల్ సర్వీసెస్ సెంటర్ అభివృద్ధి చెందుతుందన్నారు. గ్రీన్ క్రెడిట్స్ కోసం మార్కెట్ మెకానిజంను డెవలప్ చేయడంపై తమ ఆలోచనలు పంచుకోవాలని నిపుణులను కోరారు.