PM Kisan: పీఎం కిసాన్ డబ్బులు వచ్చేస్తున్నాయి.. మీ అకౌంట్లో పడాలంటే ఇవి వెంటనే చేయండి!

దేశవ్యాప్తంగా కోట్లాది మంది రైతులు ఎంతో ఆసక్తిగా ఎదురుచూస్తున్న పీఎం కిసాన్ (PM Kisan) సమ్మాన్ నిధి 23వ విడత నిధుల విడుదలకు రంగం సిద్ధమైంది. గత మార్చి 13న ప్రధాని నరేంద్ర మోదీ 22వ విడత కింద సుమారు 9.32 కోట్ల మంది రైతులకు రూ. 18,640 కోట్లు పంపిణీ చేశారు. ఇప్పుడు తదుపరి విడత (23వ ఇన్‌స్టాల్‌మెంట్) జులై 2026లో విడుదలయ్యే అవకాశం ఉందని సమాచారం. అయితే, ఈ రూ. 2,000 మీ ఖాతాల్లో జమ కావాలంటే మీ వివరాలన్నీ పక్కాగా ఉండాలి. చిన్న తప్పు ఉన్నా మీ డబ్బు ఆగిపోయే ప్రమాదం ఉంది.

అర్హతలు ఎవరికి ఉంటాయి?

ఈ పథకం కింద ప్రయోజనం పొందాలంటే రైతులు కింది నిబంధనలు పాటించాలి..

• భారతీయ పౌరుడై ఉండి, సాగు భూమి కలిగి ఉండాలి.
• చిన్న , సన్నకారు రైతులకు మాత్రమే ఈ అవకాశం ఉంటుంది.
• నెలకు రూ. 10,000 కంటే ఎక్కువ పెన్షన్ తీసుకునే రిటైర్డ్ వ్యక్తులు అర్హులు కారు.
• ఇన్‌కమ్ ట్యాక్స్ కట్టే వారు, సంస్థాగత భూ యజమానులు ఈ పథకానికి అనర్హులు.

డబ్బులు ఆగిపోవడానికి కారణమయ్యే 5 ప్రధాన తప్పులు..

కేంద్ర ప్రభుత్వం ప్రవేశపెట్టిన PM Kisan నిధులు మీ అకౌంట్లోకి చేరకపోవడానికి ఈ కింది కారణాలు ఉండవచ్చు..

1. e-KYC పూర్తి చేయకపోవడం: ఇది అన్నింటికంటే ముఖ్యం. మీ కేవైసీ పూర్తి కాకపోతే ప్రభుత్వం డబ్బులు విడుదల చేయదు. పీఎం కిసాన్ పోర్టల్‌లో ఓటీపీ ద్వారా లేదా మీ సేవ (CSC) కేంద్రాల్లో బయోమెట్రిక్ ద్వారా దీనిని పూర్తి చేయవచ్చు.
2. ఆధార్ , బ్యాంక్ వివరాల తేడా: మీ ఆధార్ కార్డులో ఉన్న పేరు, బ్యాంక్ ఖాతాలో ఉన్న వివరాలతో సరిపోలాలి. ఏ చిన్న అక్షరం తప్పు ఉన్నా పేమెంట్ ఫెయిల్ అవుతుంది.
3. తప్పుడు బ్యాంక్ వివరాలు: బ్యాంక్ అకౌంట్ నంబర్ లేదా IFSC కోడ్ తప్పుగా ఇవ్వడం, లేదా బ్యాంక్ ఖాతా ఇన్-యాక్టివ్‌గా ఉండటం వల్ల డైరెక్ట్ బెనిఫిట్ ట్రాన్స్‌ఫర్ (DBT) ఆగిపోతుంది.
4. అనర్హత గుర్తింపు: ఒకవేళ మీరు ఆదాయపు పన్ను కడుతున్నా లేదా ప్రభుత్వ నిబంధనలకు విరుద్ధంగా అర్హత కలిగి ఉన్నా వెరిఫికేషన్ సమయంలో మీ దరఖాస్తును తిరస్కరిస్తారు.
5. బెనిఫిషియరీ లిస్టులో పేరు లేకపోవడం: అప్లికేషన్ ప్రాసెస్ సరిగ్గా జరగకపోయినా లేదా వెరిఫికేషన్ పెండింగ్‌లో ఉన్నా మీ పేరు జాబితాలో ఉండదు.

మీ స్టేటస్ ఎలా చెక్ చేసుకోవాలి?

మీరు లిస్టులో ఉన్నారో లేదో తెలుసుకోవడానికి..

1. అధికారిక వెబ్‌సైట్ pmkisan.gov.in సందర్శించండి.
2. 'Know Your Status' ఆప్షన్ పై క్లిక్ చేయండి.
3. మీ రిజిస్ట్రేషన్ నంబర్, క్యాప్చా కోడ్ ఇచ్చి 'Get Data' నొక్కండి. మీ వివరాలన్నీ స్క్రీన్ పై కనిపిస్తాయి.

ఒకవేళ మీరు కొత్తగా దరఖాస్తు చేసుకోవాలనుకుంటే, ఇదే వెబ్‌సైట్‌లో 'New Farmer Registration' ద్వారా ఆధార్ నంబర్ ఇచ్చి అప్లై చేసుకోవచ్చు. ఏవైనా సందేహాలుంటే హెల్ప్‌లైన్ నంబర్లు 155261 లేదా 011-24300606 కు కాల్ చేయవచ్చు.

కేంద్ర ప్రభుత్వం రైతులకు అండగా ఉండటానికి ఏటా మూడు విడతల్లో రూ. 6,000 అందిస్తోంది. జులైలో రాబోయే ఈ 23వ విడత నగదు మిస్ అవ్వకుండా ఉండాలంటే ఇప్పుడే మీ e-KYC , బ్యాంక్ వివరాలను ఒకసారి సరిచూసుకోండి.