ఈ ఏడాది కాసుల పంట కురిపించిన మెటల్ ఇదే! ఇన్వెస్టర్లు దీన్ని' న్యూ గోల్డ్' అంటున్నారు!

భారతీయ ఇన్వెస్టర్లకు సాధారణంగా బంగారం, వెండి అంటేనే అమితమైన ఇష్టం. సురక్షితమైన పెట్టుబడి అంటే అందరూ బంగారం (gold) లేదా వెండి (silver) వైపే చూస్తారు. ఎందుకంటే ఈ ఏడాది గోల్డ్ దాదాపు 78 శాతం రిటర్న్స్ ఇచ్చి రూ. 1.40 లక్షల మార్కును దాటింది. వెండి ఏకంగా 144 శాతం లాభాలను పంచి రూ. 2 లక్షల ధరను చూసింది. అయితే ఈ రెండింటి కంటే ఎక్కువగా మరో రెండు మెటల్స్ అంచనాలకు మించి రాణించాయి. అవే ప్లాటినం (Platinum) , కాపర్ (Copper).

ప్లాటినం: మార్కెట్ కొత్త రారాజు!

సాధారణంగా ప్లాటినం రేట్లు బంగారం కంటే తక్కువగా పెరుగుతుంటాయి. కానీ, 2025లో సీన్ రివర్స్ అయింది. ఏడాది ఆరంభంలో 1,000 డాలర్ల కంటే తక్కువగా ఉన్న ప్లాటినం ధర.. అనూహ్యంగా 2,300 డాలర్లకు చేరింది. అంటే ఇన్వెస్టర్లకు దాదాపు 140 శాతం లాభం చేకూరింది.

• పెరుగుదలకు కారణం: ప్రపంచంలోనే అతిపెద్ద ప్లాటినం ఉత్పత్తిదారు అయిన దక్షిణాఫ్రికాలో ఉత్పత్తి సంక్షోభం ఏర్పడటమే దీనికి ప్రధాన కారణం. సరఫరా తగ్గిపోవడంతో డిమాండ్ విపరీతంగా పెరిగి ధరలు ఆకాశాన్ని తాకాయి.
• చైనా డిమాండ్: చైనాలో ఇండస్ట్రియల్ అవసరాల కోసం ప్లాటినం వాడకం పెరగడం, హైడ్రోజన్ ఫ్యూయల్ సెల్ టెక్నాలజీలో దీని వినియోగం ధరలకు రెక్కలు తొడిగింది.

కాపర్.. ఇక 'న్యూ గోల్డ్'!

కేవలం ఖరీదైన లోహాలే కాదు, నిత్యం వాడే కాపర్ (రాగి) కూడా ఈ ఏడాది కోలుకోలేని స్థాయిలో పెరిగింది. దీనిని ఇప్పుడు మార్కెట్ నిపుణులు 'న్యూ గోల్డ్' అని పిలుస్తున్నారు. లండన్ మెటల్ ఎక్స్ఛేంజ్‌లో కాపర్ ధర టన్నుకు 12,000 డాలర్ల రికార్డు స్థాయిని దాటింది. 2009 తర్వాత రాగికి ఇదే అత్యుత్తమ ప్రదర్శన. ఏడాది ప్రాతిపదికన ఇది 35 శాతానికి పైగా లాభాలను ఇచ్చింది. ఆర్టిఫిషియల్ ఇంటెలిజెన్స్ (AI) డేటా సెంటర్లు.. అలాగే ఎలక్ట్రిక్ వాహనాల (EV) తయారీలో రాగి కీలక పాత్ర పోషిస్తుంది. ఇండోనేషియా, చిలీ గనుల్లో ప్రమాదాల వల్ల ఉత్పత్తి ఆగడం కూడా ధరల పెరుగుదలకు కారణమైంది.

ఇన్వెస్టర్లు ఏం చేయాలి?

గోల్డ్‌మ్యాన్ శాక్స్ నివేదిక ప్రకారం.. 2026 నాటికి సప్లై పెరిగే అవకాశం ఉండటంతో కాపర్ ధరలు టన్నుకు 10,000 - 11,000 డాలర్ల వద్ద స్థిరపడవచ్చు. అయితే ప్లాటినం మాత్రం తన దూకుడును కొనసాగించే అవకాశం కనిపిస్తోంది. కేవలం బంగారమే కాకుండా, ప్లాటినం, కాపర్ వంటి కమోడిటీలపై కూడా దృష్టి పెడితే భారీ లాభాలు పొందవచ్చని ఈ ఏడాది నిరూపించింది.

అయితే పెట్టుబడిదారులు కొత్త లోహాల విషయంలో జాగ్రత్త పడుతూనే కొత్త అవకాశాలను అందిపుచ్చుకోవడం మంచిది. పెట్టుబడుల విషయంలో ఎప్పుడూ ఒకే లోహంపై ఆధారపడటం కంటే ఇలాంటి ఇండస్ట్రియల్, ప్రీషియస్ మెటల్స్‌పై అవగాహన పెంచుకోవడం ఉత్తమం. 2025లో ఈ రెండు లోహాలు ఇన్వెస్టర్ల జేబులను నింపేశాయని చెప్పడంలో సందేహం లేదు!