ఉద్యోగులకు ఏడేళ్ల తర్వాత భారీ షాక్, వడ్డీని ఎలా లెక్కిస్తారు?

2019-20 ఆర్థిక సంవత్సరానికిగాను ఉద్యోగులకు ప్రావిడెంట్ ఫండ్ డిపాజిట్‌పై వడ్డీ రేటును 8.50 శాతంగా నిర్ణయించింది ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO). ఈ నిర్ణయం అమలులోకి వస్తే పీఎఫ్ ఫండ్‌పై వడ్డీ రేటు 0.15 శాతం తగ్గుతుంది. ఇంతకుముందు 8.65 శాతంగా ఉంది. ఈపీఎఫ్ఓ సెంట్రల్ బోర్డ్ ఆఫ్ ట్రస్టీస్ తీసుకున్న నిర్ణయాన్ని ఆర్థిక శాఖ ఆమోదించాలి. ఆమోదం లభించే అవకాశాలే ఉన్నాయి.

రూ.34వేల కోట్ల వరకు వడ్డీ

ఈపీఎఫ్ఓ నిర్ణయంతో ఉద్యోగులు, కార్మికులకు పీఎఫ్ ఫండ్‌పై వచ్చే ప్రతిఫలం తగ్గుతుంది. ప్రతి సంవత్సరం భవిష్యనిధి నిల్వలపై సగటున దాదాపు రూ.32 నుండి రూ.34 వేల కోట్ల వడ్డీ వస్తోంది. ఈపీఎస్ కింద వడ్డీ, ఇతర ఆదాయాన్ని పరిగణలోకి తీసకొని నిర్వహణ ఖర్చులు తీసివేయగా మిగతా మొత్తాన్ని సబ్‌స్క్రైబర్లకు వడ్డీ రూపంలో ప్రతిఫలంగా చెల్లిస్తారు.

ఆ తర్వాత వడ్డీ జమ

ప్రస్తుత ఆర్థిక సంవత్సరానికి వడ్డీ రేటును 8.5 శాతంగా నిర్ణయించడంతో ఈపీఎఫ్ఓకు రూ.700 కోట్ల మిగులు ఉంటుంది. 8.55 శాతంగా నిర్ణయించినా రూ.300 కోట్లు మిగిలే అవకాశాలు ఉన్నాయి. ప్రస్తుత వడ్డీనే కొనసాగించాలని బీఎంఎస్ డిమాండ్ చేసింది. కానీ ఫలితం రాలేదు. వడ్డీపై ఈపీఎఫ్ఓ బోర్డు తీసుకున్న నిర్ణయాన్ని కార్మిక శాఖ... ఆర్థిక శాఖకు పంపిస్తుంది. ఆర్థిక శాఖ ఆమోదం తర్వాత ఉద్యోగుల ఖాతాల్లో వడ్డీ జమ అవుతుంది.

వడ్డీని ఎలా లెక్కిస్తారు

ప్రతి నెల పీఎఫ్ ఫండ్‌ను పరిగణలోకి తీసుకొని ఏడాదికి 8.5 శాతం చొప్పున వడ్డీ జమ చేస్తారు. ప్రతి నెల పీఎఫ్ ఫండ్ నిల్వ 8.5/12 చొప్పున గణిస్తారు. నెలనెల గణించిన వడ్డీ ఆర్థిక సంవత్సరం చివరలో అంటే మార్చి 31న ఉద్యోగి పీఎఫ్ ఖాతాలో జమ చేస్తారు. అప్పటి వరకు జమ అయిన నిల్వ, ఆ నెల కట్టిన చందాపై ఈ వడ్డీ లెక్కిస్తారు. ఆర్థిక సంవత్సరం చివరలో జమ చేసిన వడ్డీతో కలిసిన పీఎఫ్ ఫండ్ తదుపరి ఏడాదికి లెక్కింపులో మూలనిధిగా మారుతుంది.

ఆయా సంవత్సరాల్లో వడ్డీ రేట్లు ఇలా..

వడ్డీ రేటును ఈపీఎఫ్ఓ ఏడేళ్ల కనిష్టానికి తగ్గించింది. 2012-13లో 8.50 శాతం, 2013-14, 2014-15లలో 8.75 శాతం, 2015-16లో 8.80 శాతం, 2016-17లో 8.65 శాతం, 2017-18లో 8.55 శాతం, 2018-19లో 8.65 శాతం, 2019-20లో 8.50 శాతంగా ఉంది.