వాహనదారులకు గుడ్ న్యూస్.. పెట్రోల్ ధర రూ. 20 తగ్గే అవకాశం.. గ్రీన్ ఫ్యూయల్ దిశగా భారత్..

ప్రపంచవ్యాప్తంగా ముడి చమురు (Crude Oil) ధరలు నిరంతరం పెరుగుతూ, అంతర్జాతీయ మార్కెట్లో అస్థిరత కొనసాగుతున్న తరుణంలో భారతదేశ ఇంధన ఆర్థిక వ్యవస్థపై ఒత్తిడి తీవ్రమవుతోంది. ముఖ్యంగా పశ్చిమ ఆసియాలో నెలకొన్న రాజకీయ, సైనిక ఉద్రిక్తతల కారణంగా ముడి చమురు సరఫరాకు ఆటంకాలు ఎదురవుతున్నాయి. ఈ నేపథ్యంలో, విదేశీ దిగుమతులపై దేశం ఆధారపడటాన్ని తగ్గించడానికి 'ఇథనాల్ మిశ్రమం' (Ethanol Blending) అత్యంత బలమైన, వ్యూహాత్మక సాధనంగా ఆవిర్భవించిందని గ్రెయిన్ ఇథనాల్ మాన్యుఫ్యాక్చరర్స్ అసోసియేషన్ (GEMA) అధ్యక్షుడు సి.కె. జైన్ స్పష్టం చేశారు.

ఒక ప్రత్యేక ఇంటర్వ్యూలో ఆయన మాట్లాడుతూ.. భారతదేశంలో ఇథనాల్ మిశ్రమాన్ని మరింత పెంచాలనే వాదనకు ప్రస్తుత ప్రపంచ పరిస్థితులు బలాన్ని ఇస్తున్నాయని, ఈ విధానం వల్ల దేశీయంగా పెట్రోల్ ధరలను లీటరుకు రూ. 20 వరకు తగ్గించే అద్భుతమైన అవకాశం ఉందని వెల్లడించారు.Petrol ధరల్లో లీటరుకు రూ. 20 వరకు భారీ తగ్గింపు ఎలా సాధ్యమవుతుందనే హేతుబద్ధతను వివరిస్తూ సి.కె. జైన్ అంతర్జాతీయంగా విజయవంతమైన బ్రెజిల్ దేశపు ఇంధన నమూనాను ఉదాహరణగా పేర్కొన్నారు.

బ్రెజిల్‌లోని ప్రతి పెట్రోల్ బంకులోనూ వినియోగదారుల కోసం రెండు వేర్వేరు డిస్పెన్సింగ్ నాజిల్స్ అందుబాటులో ఉంటాయి. అందులో ఒకటి సాధారణ బేస్ పెట్రోల్ (ప్రస్తుతం భారతదేశంలో ఇస్తున్న E20 పెట్రోల్ లాంటిది) కాగా, రెండో నాజిల్ E85 లేదా E100 (100 శాతం ఇథనాల్) ఇంధనాన్ని అందిస్తుంది. ఇదే తరహా విధానాన్ని భారతదేశంలో కూడా అమలు చేస్తే, వినియోగదారులు E100 పెట్రోల్‌ను వాడినప్పుడు దానిపై ఎలాంటి విలువ ఆధారిత పన్ను (VAT) వర్తించదు. E100 ఇంధనంలో 70 శాతం వరకు శిలాజ ఇంధన హైడ్రోకార్బన్ (సాంప్రదాయ ముడి చమురు) ఉండదు కాబట్టి, దానికి వ్యాట్ నుండి మినహాయింపు లభిస్తుంది. ప్రస్తుతం వివిధ రాష్ట్ర ప్రభుత్వాలు ప్రతి 100 రూపాయల పెట్రోల్‌పై లీటరుకు సుమారు రూ. 18 నుండి రూ. 20 వరకు వ్యాట్ వసూలు చేస్తున్నాయి. ఈ పన్ను మినహాయింపు లభించడం వల్లనే వినియోగదారునికి లీటరుపై నేరుగా రూ. 20 వ్యత్యాసం కలిసి వస్తుందని ఆయన విశ్లేషించారు.

Also Read

ఆగని పెట్రో బాదుడు.. మళ్లీ పెరిగిన పెట్రోల్, డీజిల్ రేట్లు.. కొత్త రేట్లు ఎలా ఉన్నాయంటే..

మరోవైపు అంతర్జాతీయ మార్కెట్లో ముడి చమురు ధరల పెరుగుదల వల్ల దేశీయ చమురు మార్కెటింగ్ కంపెనీలు (OMCs) ప్రస్తుతం తీవ్రమైన ఆర్థిక నష్టాలను చవిచూస్తున్నాయి. దిగుమతి పన్నులు, రవాణా, ప్రాసెసింగ్ ఖర్చులను పరిగణనలోకి తీసుకుంటే ప్రస్తుతం దేశంలో లీటరు పెట్రోల్ అసలు ధర సుమారు రూ. 120 కి చేరి ఉండాలి. కానీ, ప్రభుత్వం ఇస్తున్న సబ్సిడీలు మరియు ధరల నియంత్రణల కారణంగా సామాన్య వినియోగదారులు లీటరుకు దాదాపు రూ. 100 మాత్రమే చెల్లిస్తున్నారు. ఈ ధరల వ్యత్యాసాన్ని భరిస్తూ చమురు మార్కెటింగ్ కంపెనీలు రోజుకు రూ. 1,700 కోట్లకు పైగా భారీ నష్టాలను మూటగట్టుకుంటున్నాయని GEMA అధ్యక్షుడు ఆందోళన వ్యక్తం చేశారు. ఇటువంటి సంక్షోభ పరిస్థితుల నుంచి బయటపడటానికి ద్వంద్వ-పంపిణీ (Dual-Dispensing) ఇథనాల్ పంపుల ఏర్పాటు అత్యంత అవసరమని ఆయన అభిప్రాయపడ్డారు.

ఈ ఇంధన విప్లవంలో భాగంగా, ఆయిల్ మార్కెటింగ్ కంపెనీలు ప్రాథమిక దశలో దేశవ్యాప్తంగా సుమారు 100 పెట్రోల్ స్టేషన్లలో డ్యూయల్-డిస్పెన్సింగ్ ఇథనాల్ పంపులను ప్రవేశపెట్టాలని ఇప్పటికే నిర్ణయించాయి. ఈ ప్రత్యేక పంపులలో ఒక నాజిల్ ద్వారా E85 ఇంధనాన్ని, మరొక నాజిల్ ద్వారా E20 ఇంధనాన్ని సరఫరా చేస్తారు. దీనివల్ల వాహనదారులు తమ బడ్జెట్, అవసరాలను బట్టి ఏ ఇంధనాన్ని ఎంచుకోవాలనే పూర్తి స్వేచ్ఛను పొందుతారు. అయితే, ఈ అధిక ఇథనాల్ మిశ్రమాలను వాడటానికి సాధారణ వాహనాల కంటే 'ఫ్లెక్స్-ఫ్యూయల్ వాహనాలు' (Flex-Fuel Vehicles) చాలా కీలకం.

భారతదేశంలో ఫ్లెక్స్-ఫ్యూయల్ వాహనాల తయారీ మరియు విస్తరణను వేగవంతం చేయాలని GEMA మరియు ఇతర పరిశ్రమల ప్రతినిధులు ప్రభుత్వం మరియు ఆటోమొబైల్ తయారీదారులను పదేపదే కోరుతున్నారు. ఈ దిశగా ఒక సానుకూల పరిణామం చోటుచేసుకుందని, ప్రముఖ కార్ల తయారీ సంస్థ మారుతి సుజుకి జూన్ 5న (ప్రపంచ పర్యావరణ దినోత్సవం సందర్భంగా) భారతదేశంలోనే మొట్టమొదటి పూర్తి స్థాయి ఫ్లెక్స్-ఫ్యూయల్ ప్యాసింజర్ వాహనాన్ని ఆవిష్కరించబోతోందని జైన్ తెలిపారు. ఒక పెద్ద ఆటోమొబైల్ సంస్థ ఈ సాంకేతికతను మార్కెట్లోకి తీసుకువస్తే, మిగిలిన రవాణా రంగా కంపెనీలు కూడా అదే బాటలో పయనిస్తాయని, తద్వారా భారతదేశం ఇంధన రంగంలో స్వయంసమృద్ధి సాధించవచ్చని ఆయన ఆశాభావం వ్యక్తం చేశారు.