Petrol, Diesel Rates: హైదరాబాద్‌లో రూ.108కి దిగొచ్చిన పెట్రోల్, డీజిల్ రూ.100 లోపే

కేంద్ర ప్రభుత్వం పెట్రోల్ పైన రూ.5, డీజిల్ పైన రూ.10 ఎక్సైజ్ సుంకాన్ని తగ్గించిన నేపథ్యంలో దేశవ్యాప్తంగా ఇంధన ధరలు కాస్త తగ్గాయి. బీజేపీ పాలిత రాష్ట్రాలు కూడా లీటర్ పెట్రోల్, డీజిల్ పైన రూ.7 చొప్పున తగ్గించాయి. తెలుగు రాష్ట్రాల్లో రాష్ట్ర ప్రభుత్వాలు తగ్గించకపోవడంతో పెట్రోల్ పైన రూ.5, డీజిల్ పైన రూ.10 మాత్రమే తగ్గుతుంది. అసోం, మణిపూర్, గోవా, త్రిపుర, కర్నాటక వంటి రాష్ట్రాల్లో కేంద్రం తగ్గింపుకు రాష్ట్రాలు తోడు కావడంతో పెట్రోల్ పైన రూ.12, డీజిల్ పైన రూ.17 తగ్గింది. తెలుగు రాష్ట్రాల్లో మాత్రం కేంద్రం తగ్గింపు మాత్రమే ఉంది. మందగమనం, కరోనా వంటి కఠిన పరిస్థితుల్లో అంతర్జాతీయంగా ముడి చమురు ధరలు పెరిగి, ఇక్కడ కూడా ధరలు ఆకాశాన్ని అంటాయి. ధరలతో సామాన్యులు ఇబ్బంది పడుతున్న నేపథ్యంలో గత మూడేళ్లలో మొదటిసారి కేంద్రం ఎక్సైజ్ డ్యూటీని తగ్గించింది. దీంతో చాలాచోట్ల డీజిల్ ధరలు రూ.100 దిగువకు వచ్చాయి. పెట్రోల్ ధరలు కూడా కాస్త తగ్గాయి.

హైదరాబాద్‌లో ధరలు

ఇంధన ధరలపై కేంద్రం ఎక్సైజ్ సుంకాన్ని తగ్గించడంతో తెలంగాణలో కూడా పెట్రోల్, డీజిల్ ధరలు తగ్గాయి. కేంద్రం పెట్రోల్ పైన రూ.5, డీజిల్ పైన రూ.10 చొప్పున ఎక్సైజ్ సుంకాన్ని తగ్గించింది. ఈ నేపథ్యంలో కేంద్ర ఎక్సైజ్ సుంకంపై రాష్ట్రంలో వ్యాట్ తగ్గడంతో హైదరాబాద్‌లో పెట్రోల్‌పై రూ.6.33, డీజిల్‌పై 12.79 చొప్పున ఊరట కలిగింది. దీంతో గురువారం నగరంలో పెట్రోల్ లీటర్ ధర రూ.114.51 నుండి రూ.108.18కి, డీజిల్ రూ.107.40 నుండి రూ.94.61కి తగ్గింది.

వివిధ నగరాల్లో పెట్రోల్, డీజిల్ ధరలు

- Delhi పెట్రోల్ ధర 103.97, డీజిల్ ధర 86.67,

- Mumbai పెట్రోల్ ధర 109.98, డీజిల్ ధర 94.14,

- Chennai పెట్రోల్ ధర 101.40, డీజిల్ ధర 91.43,

- Kolkata పెట్రోల్ ధర 104.67, డీజిల్ ధర 89.79,

- Bhopal పెట్రోల్ ధర 112.56, డీజిల్ ధర 95.40,

- Ranchi పెట్రోల్ ధర 98.52, డీజిల్ ధర 91.56,

- Bangalore పెట్రోల్ ధర 107.64, డీజిల్ ధర 92.03,

- Lucknow పెట్రోల్ ధర 101.05, డీజిల్ ధర 87.09,

- Noida పెట్రోల్ ధర 101.29, డీజిల్ ధర 87.31,

క్రూడాయిల్ ధరలు తగ్గుదల

అంతర్జాతీయ మార్కెట్లో క్రూడాయిల్ ధరలు స్వల్పంగా తగ్గాయి. క్రూడ్ ధరలు 82 డాలర్ల దిగువకు వచ్చాయి. బ్రెంట్ క్రూడ్ బ్యారెల్‌కు 81.99 డాలర్లు, వెస్ట్ టెక్సాస్ ఇంటర్మీడియేట్ 80.86 డాలర్ల వద్ద కదలాడింది. కేంద్ర ప్రభుత్వం పెట్రోల్, డీజిల్ పైన ఎక్సైజ్ సుంకాన్ని తగ్గించిన నేపథ్యంలో ప్రభుత్వానికి నెలకు రూ.8700 ఆదాయం తగ్గుతుంది. అంటే ఏడాదికి రూ.1 లక్ష కోట్ల మేర రెవెన్యూ పైన ప్రభావం పడుతుందని ఇండస్ట్రీ వర్గాలు చెబుతున్నాయి.