petrol prices: పెట్రోల్, డీజిల్ ధరలు మళ్ళీ పెరుగుతాయా? కేంద్ర మంత్రి కీలక వ్యాఖ్యలు!

దేశంలో సామాన్యుడి బడ్జెట్‌ను శాసించే వాటిల్లో పెట్రోల్, డీజిల్ ధరలు అత్యంత ముఖ్యమైనవి. గత కొన్ని రోజులుగా దేశంలోని పలు ప్రాంతాల్లో పెట్రోల్, డీజిల్, ఎల్‌పీజీ (LPG) ధరల్లో హెచ్చుతగ్గులు కనిపిస్తుండటంతో.. రానున్న రోజుల్లో ఇంధన ధరలు మరింత పెరిగే అవకాశం ఉందా అనే ఆందోళన వాహనదారుల్లో మొదలైంది. ఇదే విషయంపై కేంద్ర పెట్రోలియం, సహజ వాయువు శాఖ సహాయ మంత్రి సురేష్ గోపి తాజాగా ఒక కీలక అప్‌డేట్ ఇచ్చారు.

కేంద్ర మంత్రి ఏమన్నారంటే?

కేరళలోని త్రిస్సూర్ జిల్లాలో మీడియా ప్రతినిధులతో మాట్లాడిన కేంద్ర మంత్రి సురేష్ గోపి, ఇంధన ధరల సవరణ అనేది పూర్తిగా అంతర్జాతీయ మార్కెట్లో ముడి చమురు (Crude Oil) లభ్యత, సరఫరా స్థిరత్వంపైనే ఆధారపడి ఉంటుందని స్పష్టం చేశారు. "గ్లోబల్ ఎనర్జీ మార్కెట్లో జరుగుతున్న పరిణామాలను కేంద్ర ప్రభుత్వం నిశితంగా గమనిస్తోంది. దీనిపై మా సీనియర్ మంత్రి హర్దీప్ సింగ్ పూరి పూర్తి నిఘా ఉంచారు. ముడి చమురు సరఫరా ఎలా ఉందో చూసి, తదుపరి నిర్ణయం తీసుకుంటాం" అని ఆయన పేర్కొన్నారు.

ధరలు పెరగడానికి అసలు కారణం ఇదే!

నిజానికి గత కొన్ని వారాలుగా అంతర్జాతీయంగా ముడి చమురు, సహజ వాయువు సరఫరాలో తీవ్ర అంతరాయాలు ఏర్పడుతున్నాయి. దీనికి ప్రధాన కారణం పశ్చిమాసియా (మిడిల్ ఈస్ట్) లో నెలకొన్న తీవ్ర ఉద్రిక్తతలు , యుద్ధ వాతావరణమే. గ్లోబల్ మార్కెట్‌లో క్రూడ్ ఆయిల్ సప్లై తగ్గిపోవడం లేదా రవాణా మార్గాల్లో ఆటంకాలు కలగడం వల్ల మార్కెట్ తీవ్ర ఒడిదొడుకులకు లోనవుతోంది. భారతదేశం తన అవసరాలకు కావాల్సిన ముడి చమురులో దాదాపు 80 శాతానికి పైగా ఇతర దేశాల నుంచే దిగుమతి చేసుకుంటుంది. కాబట్టి అక్కడ ఒక్క డాలర్ రేటు పెరిగినా, ఆ ప్రభావం నేరుగా మన దేశంలో పెట్రోల్ ధరల(petrol price) పై పడుతుంది.

అంతర్జాతీయ మార్కెట్ ప్రభావం ఎలా ఉంటుంది?

ప్రస్తుతం అంతర్జాతీయ మార్కెట్లో బ్రెంట్ క్రూడ్ ఆయిల్ ధరలు పెరగడం వల్ల దేశీయ ఆయిల్ మార్కెటింగ్ కంపెనీల (HPCL, BPCL, IOCL) పై భారం పడుతోంది. చమురు కంపెనీలు అంతర్జాతీయ రేట్లకు అనుగుణంగానే ఇక్కడ ధరలను సవరిస్తుంటాయి. కేవలం పెట్రోల్, డీజిల్ మాత్రమే కాకుండా వంట గ్యాస్ (LPG) సిలిండర్ల ధరలు కూడా అంతర్జాతీయంగా పెరిగిన ప్రొపేన్, బ్యూటేన్ రేట్లపైనే ఆధారపడి ఉంటాయి. అందుకే గ్లోబల్ మార్కెట్ స్థిరపడితేనే మనకు ఇక్కడ ధరల నుండి ఉపశమనం లభిస్తుంది.

వాహనదారులు ఏం ఆశిస్తున్నారు?

పండుగల సీజన్ వస్తున్న తరుణంలో ఇంధన ధరలు పెరిగితే నిత్యావసర వస్తువుల రవాణా ఖర్చులు పెరిగి, ద్రవ్యోల్బణం ఎక్కువయ్యే ప్రమాదం ఉందని ఆర్థిక నిపుణులు హెచ్చరిస్తున్నారు. కేంద్ర ప్రభుత్వం పన్నుల భారాన్ని (Excise Duty) కొద్దిగా తగ్గిస్తే బాగుంటుందని సాధారణ ప్రజలు కోరుకుంటున్నారు. అయితే కేంద్ర మంత్రి సురేష్ గోపి ఇచ్చిన హింట్ ప్రకారం, అంతర్జాతీయంగా సప్లై బాగుండి రేట్లు తగ్గితేనే ఇక్కడ కూడా ధరలు తగ్గుతాయి, లేదంటే పెరిగేందుకే అవకాశాలు ఎక్కువగా ఉన్నాయి.