5 రోజుల్లో రూ.3 వరకు పెరిగిన పెట్రోల్, డీజిల్ ధరలు: ఏ నగరంలో ఎంత?

కరోనా మహమ్మారి - లాక్ డౌన్ కారణంగా పెట్రోల్, డీజిల్ ధరలను రెండు నెలలకు పైగా సమీక్షించలేదు. క్రమంగా లాక్ డౌన్ ఆంక్షలు ఎత్తివేయడంతో చమురు ధరల్లో మార్పులు కనిపిస్తున్నాయి. పెట్రోల్, డీజిల్ ధరల సమీక్ష ప్రారంభమైనప్పటి నుండి ధరలు పెరుగుతూనే ఉన్నాయి. వరుసగా ఐదు రోజుల పాటు వాహనదారులకు షాకిచ్చాయి.

నేడు రూ.60 పైసలు పెరుగుదల

నేడు (జూన్ 11, గురువారం) లీటర్ పెట్రోల్ పైన 60 పైసలు, డీజిల్ పైన 60 పైసల చొప్పున పెంచుతున్నట్లు చమురు మార్కెటింగ్ సంస్థలు వెల్లడించాయి. ఈ పెరుగుదలతో ఢిల్లీలో లీటర్ పెట్రోల్ ధర రూ.73.40 నుండి రూ.74కు చేరుకుంది. లీటర్ డీజిల్ ధర రూ.71.62 నుండి రూ.72.22కి చేరుకుంది. దేశంలో ఆదివారం (7వ తేదీ) నుండి పెట్రోల్ ధరలు పెరుగుతున్నాయి.

హైదరాబాద్ సహా ఈ నగరాల్లో ధరలు

ఈ ఐదు రోజుల్లో లీటర్ పెట్రోల్ పైన రూ.2.74 పైసలు, లీటర్ డీజిల్ పైన రూ.2.83 పైసలు పెరిగింది. అంటే దాదాపు రూ.3 వరకు పెరిగింది. వివిధ నగరాల్లో ఈ రోజు పెట్రోల్, డీజిల్ ధరలు వరుసగా ఢిల్లీలో రూ.74, రూ.72.22, ముంబైలో రూ.80.98, రూ.70.92, చెన్నైలో రూ.77.96, రూ.70.64, బెంగళూరులో రూ.76.39, రూ.68.66, హైదరాబాద్‌లో రూ.76.82, రూ.70.59 పెరిగింది.

ధరలు పెరుగుతాయని ముందే అంచనా

జూన్ నుండి పెట్రోల్ ధరలు భారీగా పెరిగే అవకాశాలు ఉన్నాయని గత నెలలోనే వార్తలు వచ్చాయి. పెట్రోల్ ధరలను ప్రతి రోజు సమీక్షిస్తారు. ఇందులో భాగంగా జూన్ నుండి లీటర్ పైన రూ.4 నుండి రూ.5 వరకు పెరిగే అవకాశముందని వార్తలు వచ్చాయి. ఐదు రోజుల్లోనే దాదాపు రూ.3 పెరిగింది.