అక్కడ ధరలు స్థిరంగా ఉంటే, మన వద్ద పెట్రోల్ ధరలు ఎందుకు పెరుగుతున్నాయి?

పెట్రోల్, డీజిల్ ధరలు గతవారం రోజులుగా భారీగా పెరుగుతున్నాయి. నవంబర్ 4వ తేదీ నుండి స్థిరంగా ఉన్న ధరలు మార్చి 22వ తేదీ నుండి తిరిగి సవరిస్తున్నారు. దీంతో ఈ వారం వ్యవధిలో ధరలు రూ.4కు పైగా పెరిగింది. నేడు లీటర్ పెట్రోల్ పైన 80 పైసలు, డీజిల్ పైన 70 పైసలు పెరిగింది. నేటి పెంపుతో ఢిల్లీలో లీటర్ పెట్రోల్ రూ.100 దాటింది.

ముంబై, హైదరాబాద్‌లలో వాహనదారులు పెట్రోల్ కొనుగోలు చేయాలంటే రూ.115 చెల్లించాలి. వారం రోజులుగా పెరుగుతున్న ధరలతో ప్రజలపై రూ.4కు పైగా భారం పడింది. మార్చి 22వ తేదీ నుండి ఇప్పటి వరకు వివిధ నగరాల్లో పెట్రోల్ పైన రూ.4.80 నుండి రూ.4.85 మధ్య, డీజిల్ పైన రూ.4.85 భారం పడింది.

వివిధ నగరాల్లో

ఢిల్లీలో లీటర్ పెట్రోల్ రూ.100.21, డీజిల్ రూ.91.47, ముంబైలో లీటర్ పెట్రోల్ రూ.115.04, డీజిల్ రూ.99.25, చెన్నైలో లీటర్ పెట్రోల్ రూ.105.94, డీజిల్ రూ.96, కోల్‌కతాలో లీటర్ పెట్రోల్ రూ.109.68, డీజిల్ రూ.94.62, హైదరాబాద్‌లో లీటర్ పెట్రోల్ రూ.113.61, డీజిల్ రూ.99.84గా ఉంది. పెట్రోల్, డీజిల్ ధరలను ప్రతి రోజు ఉదయం ఆరు గంటలకు సవరిస్తారు. ఇది 2017లో ప్రారంభమైంది.

70 నుండి 110కి

క్రూడ్ ధరలు ఇటీవల రష్యా-ఉక్రెయిన్ యుద్ధం నేపథ్యంలో 140 డాలర్లు దాటాయి. ఆ తర్వాత కాస్త శాంతించి 110 డాలర్లకు తగ్గాయి. అయినప్పటికీ నాలుగు నెలల క్రితం ధర 70 డాలర్ల వద్ద ఉన్న క్రూడ్ ఇప్పుడు 110 డాలర్ల వద్ద ఉంది. ఇటీవలి గరిష్టంతో పోలిస్తే తగ్గినప్పటికీ నాలుగు నెలల క్రితం ధరతో పోలిస్తే దాదాపు సగం పెరిగింది. సోమవారం నాటికి క్రూడ్ ధరలు దాదాపు 7 శాతం పడిపోయాయి.

ఇటీవల చమురు ధరలు కాస్త శాంతించినప్పటికీ మన వద్ద మాత్రం పెరుగుతున్నాయి. దానికి కారణం ఉంది. అమెరికా, శ్రీలంక, పాకిస్తాన్ సహా వివిధ దేశాల్లో పెట్రోల్, డీజిల్ ధరలు ఇప్పటికే భారీగా పెరిగాయి. మన వద్ద ఇప్పుడు స్వల్పంగా పెరుగుతున్నాయి.

అందుకే ఇప్పుడు పెరుగుదల

మన దేశంలో నవంబర్ 4వ తేదీ నుండి పెట్రోల్, డీజిల్ ధరల్లో ఎలాంటి మార్పులేదు. నాలుగు నెలలకు పైగా ధరలు పెరగలేదు. అదే సమయంలో అంతర్జాతీయ మార్కెట్‌లో చమురు ధరలు రెండింతలు అయ్యాయి. ఆ సమయంలో మన వద్ద ఎన్నికలు ఉన్న కారణంగా ధరలు పెరగలేదు.

లేదంటే ఇప్పటికే రూ.150 దాటాలి. మార్చి 10న ఫలితాల తర్వాత పెరుగుతాయని అందరూ భావించారు. కానీ అప్పుడు కూడా పెరగలేదు. ఆ తర్వాత పన్నెండు రోజులకు పెరిగాయి. నవంబర్ 4 నుండి పెరగకపోవడం, అప్పటి నుండి అంతర్జాతీయ మార్కెట్‌లో ధరలు 50 శాతం పెరగడం వల్ల ఇప్పుడు ధరలపై ప్రభావం పడుతుంది.