వరుసగా రెండో రోజు స్థిరంగా పెట్రోల్, డీజిల్ ధరలు: అంతర్జాతీయ మార్కెట్లో...
పెట్రోల్, డీజిల్ ధరల్లో నేడు (గురువారం, జూన్3) ఎలాంటి మార్పులేదు. దేశీయ చమురు మార్కెటింగ్ కంపెనీలు వరుసగా రెండోరోజు ధరలను పెంచలేదు. జూన్ 1వ తేదీన ఇంధన ధరలు దేశంలోని వివిధ ప్రాంతాల్లో ఆల్ టైమ్ గరిష్టానికి చేరుకున్నాయి. మొన్న పెట్రోల్ పైన 26 పైసలు, డీజిల్ పైన 23 పైసలు పెరిగింది.
ఢిల్లీలో పెట్రోల్ లీటర్ పైన రూ.94.49, డీజిల్ లీటర్ రూ.85.38గా ఉంది. దేశ ఆర్థిక రాజధాని ముంబైలో లీటర్ పెట్రోల్ రూ.100 దాటింది. పెట్రోల్ రూ.100.72, డీజిల్ రూ.92.69కు చేరుకుంది. మే 4వ తేదీ నుండి ఇది 17వ సార్లు పెరిగింది. పెట్రోల్ పైన రూ.4.09, డీజిల్ పైన రూ.4.65 పెరిగింది. రాజస్థాన్ లోని గంగానగర్లో లీటర్ పెట్రోల్ ఏకంగా రూ.105.52కు చేరుకుంది. గ్యాసోలైన్ ధరలు ముంబైలో రూ.100 దాటింది. తద్వారా న్యూయార్క్ నగరంలో కంటే ఇక్కడే ఖరీదుగా మారింది.
ఇంధనంపై కేంద్ర, రాష్ట్ర పన్నుల వాటానే అధికం. ఉదాహరణకు ఢిల్లీలో చూసుకుంటే మే 16న లీటర్ పెట్రోల్ రూ.92.88గా ఉంది. ట్యాక్స్ బ్రేక్ చూసుకుంటే లీటర్ పెట్రోల్ బేస్ ప్రైస్ రూ.34.19. రవాణా తదితర ఖర్చులు 0.36 పైసలు. డీలర్స్కు వేసే ఛార్జ్ (ఎక్సైజ్ డ్యూటీ, వ్యాట్ మినహా) రూ.34.55. ఎక్సైజ్ డ్యూటీ రూ.32.90. డీలర్ కమిషనర్ (యావరేజ్) రూ.3.77. వ్యాట్ రూ.21.36. ఢిల్లీలో లీటర్ పెట్రోల్ మే 16వ తేదీన రూ.83.22గా ఉంది. ట్యాక్స్ బ్రేక్ చూస్తే బేస్ ప్రైస్ రూ.36.32. రవాణా తదితర ఖర్చులు 0.33 పైసలు. డీలర్స్కు వేసే ఛార్జ్ (ఎక్సైజ్ డ్యూటీ, వ్యాట్ మినహా) రూ.36.65. ఎక్సైజ్ డ్యూటీ రూ.31.80. డీలర్ కమిషనర్ (యావరేజ్) రూ.2.58. వ్యాట్ రూ.12.19.
మరోవైపు, అంతర్జాతీయ మార్కెట్లో క్రూడాయిల్ ధరలు పెరుగుతున్నాయి. చమురు ధరలు బ్యారెల్ 70 డాలర్లతో మూడు నెలల గరిష్టాన్ని తాకాయి. బ్రెంట్ క్రూడ్ ఫ్యూచర్స్ ఆగస్ట్ 94 సెంట్లు లేదా 1.4 శాతం లాభపడి 70.26 డాలర్లకు చేరుకుంది. యూఎస్ వెస్ట్ టెక్సాస్ ఇంటర్మీడియేట్ క్రూడ్ జూలై 1.34 శాతం ఎగిసి 67.66 డాలర్లను తాకింది.