Anthropic: ఇరాన్ దాడిలో ఆంత్రోపిక్ ఏఐ వినియోగం? అమెరికాలో ముదురుతున్న వివాదం!

అమెరికా రక్షణ శాఖ (Pentagon) , వైట్ హౌస్ మధ్య ఒక ఆసక్తికరమైన సాంకేతిక యుద్ధం నడుస్తోంది. ఇరాన్ సుప్రీం లీడర్ అలీ ఖమేనీని లక్ష్యంగా చేసుకుని జరిపిన భారీ వైమానిక దాడుల్లో అమెరికా సైన్యం 'ఆంత్రోపిక్' (Anthropic) సంస్థకు చెందిన 'క్లాడ్' (Claude) ఆర్టిఫిషియల్ ఇంటెలిజెన్స్ సాఫ్ట్‌వేర్‌ ను ఉపయోగించినట్లు సంచలన వార్తలు వెలువడుతున్నాయి. విశేషం ఏమిటంటే.. ఈ కంపెనీ ఏఐ సిస్టమ్స్ వాడకాన్ని నిలిపివేయాలని అధ్యక్షుడు డొనాల్డ్ ట్రంప్ ఆదేశించిన కొద్ది గంటల్లోనే పెంటాగన్ దీనిని యుద్ధ రంగంలో వాడటం గమనార్హం.

యుద్ధంలో ఏఐ పాత్ర ఏమిటి?

వాల్ స్ట్రీట్ జర్నల్ నివేదిక ప్రకారం, అమెరికా సెంట్రల్ కమాండ్ (Centcom) ఇరాన్ దాడుల సమయంలో మేధో విశ్లేషణ (Intelligence Assessment), లక్ష్యాలను గుర్తించడం (Identifying Targets), యుద్ధ రంగ పరిస్థితులను ముందే అంచనా వేయడం (Simulating Scenarios) వంటి కీలక పనుల కోసం ఆంత్రోపిక్ (Anthropic) వారి క్లాడ్ ఏఐ టూల్‌ను ఉపయోగించింది. అత్యంత సున్నితమైన , రక్షణ పరమైన కార్యకలాపాల్లో ఈ ఏఐ ఇప్పటికే లోతుగా కలిసిపోయిందని ఈ ఘటన నిరూపిస్తోంది.

ట్రంప్ నిషేధానికి కారణం ఏమిటి?

ఆంత్రోపిక్ కంపెనీకి, పెంటాగన్ అధికారులకు మధ్య గత కొన్ని నెలలుగా కాంట్రాక్ట్ నిబంధనల విషయంలో వివాదం నడుస్తోంది. ఏఐ మోడల్స్‌ను సైనిక అవసరాల కోసం ఏ విధంగానైనా వాడుకునే హక్కును ఇవ్వాలని పెంటాగన్ డిమాండ్ చేయగా.. ఆంత్రోపిక్ (Anthropic) సీఈఓ డారియో అమోడెయ్ దీనిని నిరాకరించారు. ఏఐ వినియోగంలో కొన్ని నైతిక విలువలు (Ethical Red Lines) పాటించాల్సి ఉంటుందని, వాటిని అతిక్రమించేలా సైనిక కార్యకలాపాల్లో వాడటానికి తాము అనుమతించబోమని ఆయన స్పష్టం చేశారు. దీంతో ఆగ్రహించిన ట్రంప్ ప్రభుత్వం, ఆంత్రోపిక్‌ను భద్రతా ముప్పుగా (Security Threat) పరిగణించాలని , ప్రభుత్వ ఏజెన్సీలన్నీ దానిని వాడటం మానేయాలని ఆదేశించింది.

ప్రత్యామ్నాయం కోసం వెతుకులాట

ఆంత్రోపిక్ స్థానంలో ఎలోన్ మాస్క్‌కు చెందిన ఎక్స్ ఏఐ (xAI) లేదా ఓపెన్ ఏఐ (OpenAI) వంటి సంస్థల సాఫ్ట్‌వేర్‌ ను వాడాలని పెంటాగన్ ఆలోచిస్తోంది. ఇందుకోసం ఇప్పటికే ప్రాథమిక ఒప్పందాలు కూడా జరిగాయి. అయితే, సైనిక వ్యవస్థలో ఇప్పటికే పాతుకుపోయిన క్లాడ్ ఏఐని పూర్తిగా తొలగించి, కొత్త సాఫ్ట్‌వేర్‌ను ప్రవేశపెట్టడానికి నెలల సమయం పడుతుందని నిపుణులు చెబుతున్నారు. ఈ లోపు జరుగుతున్న యుద్ధ కార్యకలాపాల్లో పాత సాఫ్ట్‌వేర్‌నే వాడక తప్పని పరిస్థితి నెలకొంది.

ఏఐ నైతికత vs సైనిక అవసరాలు

సాంకేతిక సంస్థలు తమ సాఫ్ట్‌వేర్ వినియోగంపై పరిమితులు విధించడం పెంటాగన్‌కు నచ్చడం లేదు. రక్షణ కార్యదర్శి పీట్ హెగ్‌సెత్ ఈ విషయంలో ఆంత్రోపిక్‌కు డెడ్ లైన్ విధించినా, ఆ సంస్థ తన పంతం వీడలేదు. ఆంత్రోపిక్ తీసుకున్న ఈ నిర్ణయం వల్ల సుమారు 200 మిలియన్ డాలర్ల విలువైన ప్రభుత్వ కాంట్రాక్టులను కోల్పోయే అవకాశం ఉంది. ఏది ఏమైనా, ఇరాన్ వంటి దేశాలపై దాడుల సమయంలో ఏఐ వినియోగం అనేది యుద్ధ తంత్రాన్ని ఎంతగా మారుస్తుందో ఈ పరిణామాలు స్పష్టం చేస్తున్నాయి.