Paytm: కుప్పకూలిన పేటీఎం స్టాక్.. 20 శాతం క్షీణతకు అసలు కారణం ఇదే..!!

Paytm Stock Crash: దేశంలో యూపీఐ చెల్లింపుల నుంచి అనేక ఇతర సేవలను అందిస్తున్న ఫిన్‌టెక్ దిగ్గజం పేటీఎం. వాస్తవానికి గత కొన్ని త్రైమాసికాలుగా కంపెనీ లాభదాయకతవైపు నడుస్తుండటంతో స్టాక్ మంచి ర్యాలీని చూసింది.

తాజాగా కంపెనీ షేర్లు నేడు మార్కెట్లో 20 శాతం నష్టపోయి లోయర్ సర్క్యూట్‌ను తాకాయి. వాస్తవానికి కంపెనీ చిన్న మెుత్తాల్లో అందిస్తున్న పోస్ట్ పే లోన్ల వ్యాపారాన్ని తగ్గించాలని చూస్తున్నట్లు ప్రకటించిన వేళ ఇన్వెస్టర్లు షేర్ల అమ్మకానికి మెుగ్గుచూపారు. ప్రస్తుతం కంపెనీ పెద్ద మెుత్తంలో పర్సనల్ లోన్స్, మర్చంట్ రుణాలపై దృష్టి సారించిన క్రమంలో వ్యాపార వ్యూహాన్ని మార్చాలని నిర్ణయించింది.

అయితే బ్రోకరేజ్ సంస్థలు సైతం కంపెనీ తాజా చర్య వల్ల ఆదాయాలు పడిపోతాయని అంచనా వేస్తున్నాయి. ఉదయం 10.40 గంటల సమయంలో పేటీఎం స్టాక్ ధర ఎన్ఎస్ఈలో రూ.673 వద్ద ఉంది. అయితే ఇంట్రాడేలో స్టాక్ భారీ క్షీణత వల్ల రూ.650 స్థాయిని తాకింది. కంపెనీ తన పోస్ట్ పెయిడ్ లోన్లను సగానికి తగ్గించాలని చూస్తున్నట్లు స్పష్టంగా ప్రకటించింది. అయితే తమ తాజా నిర్ణయం వల్ల ఆదాయాలపై పెద్దగా ప్రభావం ఉండబోదని పేర్కొంది.

ఇటీవల దేశంలో విపరీతంగా పెరిగిన క్రెడిట్ వినియోగం, రుణాలపై జాగ్రత్త అవసరమని రిజర్వు బ్యాంక్ పేర్కొన్న వేళ పేటీఎం తన బైనౌ పే లేటర్ వ్యాపారాన్ని పునఃపరిశీలించాలని Paytm నిర్ణయం తీసుకున్నట్లు బ్రోకరేజ్ సంస్థ Jefferies పేర్కొంది. మొత్తం చెల్లింపుల్లో 55 శాతం ఉన్న BNPL పంపిణీలు వచ్చే 3-4 నెలల్లో సగానికి తగ్గుతాయని జెఫరీస్ ఒక నోట్‌లో వెల్లడించింది.

ఈ క్రమంలో జెఫరీస్ పేటీఎం FY24-26 రాబడి అంచనాలను 3-10 శాతం మేర తగ్గిస్తున్నట్లు ప్రకటించింది. ఇది సర్దుబాటు చేసిన EBITDA అంచనాలను 12-15 శాతం తగ్గించింది. ఈ క్రమంలో పేటీఎం షేర్లకు తన 'కొనుగోలు' కాల్‌ని కొనసాగిస్తున్నప్పటికీ.. టార్గెట్ ధరను 19 శాతం మేర తగ్గిస్తూ రూ.1,050కి సవరించింది.