వ్యాపారులకు తక్కువ వడ్డీకే పేటీఎం రూ.5 లక్షల వరకు రుణం

డిజిటల్ ఆర్థిక సేవల సంస్థ పేటీఎం వచ్చే మార్చి నాటికి వ్యాపారులకు రూ.1000 కోట్ల రుణాన్ని అందజేయడాన్ని లక్ష్యంగా పెట్టుకుంది. వ్యాపారులకు రూ.5 లక్షల వరకు రుణాలు ఇవ్వనుంది. 2019-20 ఆర్థిక సంవత్సరంలో రూ.550 కోట్ల రుణాలు అందించింది. ఇప్పుడు రెండింతలు ఇవ్వాలని లక్ష్యంగా పెట్టుకుంది. వ్యాపారులకు 1 శాతం నుండి 2 శాతం మధ్య వడ్డీ రేటుతో రూ.2 లక్షల నుండి రూ.5 లక్షల వరకు అందిస్తుంది.

బ్యాంకింగ్ రుణాలు అందుకోలేని కిరాణా స్టోర్స్, ఇతర చిన్న వ్యాపారులకు సహాయం చేయడానికి ఈ రుణాలు ఇస్తున్నామని తెలిపింది. తమ వద్ద ఉన్న 17 మిలియన్ వ్యాపారుల డేటా ఆధారంగా వెయ్యి కోట్ల రూపాయల రుణం అందిస్తామని తెలిపింది. ఈ రుణాలు వారి వ్యాపారాన్ని డిజిటలైజ్ చేసుకోవడానికి, కార్యకలాపాల విస్తృతం చేసుకోవడానికి ఉపయోగపడతాయని తెలిపింది. మార్చి నాటికి ఈ రుణాలు అందిస్తామని తెలిపింది.

వ్యాపారం కోసం పేటీఎం యాప్‌ను ఉపయోగిస్తున్నవారికి మర్చంట్ లెండింగ్ ప్రోగ్రామ్ కింద ఎలాంటి పూచీకత్తు లేకుండా రుణాలను అందజేసే ప్రక్రియను కొనసాగిస్తామని ఆ కంపెనీ సోమవారం తెలిపింది. వ్యాపారులు తమ సామర్థ్యాన్ని మెరుగుపర్చుకుని డిజిటల్‌ ఇండియా కార్యక్రమానికి చేయూతనిచ్చేందుకు ఈ రుణాలు దోహదపడతాయని ఆశాభావాన్ని వ్యక్తం చేసింది. ఎంఎస్ఎంఈలకు పూచీకత్తు లేకుండా తక్కువ వడ్డీపై రూ.5 లక్షల వరకు రుణాలను అందజేసి వాటి అభివృద్ధికి దోహదపడేందుకు నిబద్ధతతో ఉన్నామని పేటీఎం తెలిపింది.