Paytm News: ఆ వ్యాపారం నుంచి పేటీఎం OUT.. పండగ చేసుకుంటున్న Airtel..

Paytm Fastag: దేశీయ పేమెంట్స్ ఫిన్ టెక్ స్టార్టప్ కంపెనీ పేటీఎం పేమెంట్స్ బ్యాంక్ వ్యాపారం ఆర్బీఐ కఠిన ఆంక్షల కారణంగా కకావికలం అయ్యింది. దీంతో కంపెనీ వ్యాపారం ఊహించిన దానికంటే ఎక్కువగానే ప్రభావితం అవుతోంది.

సంక్షోభంలో చిక్కుకున్న పేటీఎం పేమెంట్స్ బ్యాంక్ తాజాగా ఫాస్టాగ్ వ్యాపారం నుంచి వైదొలగిన సంగతి తెలిసిందే. ఇది పరోక్షంగా ఎయిర్ టెల్ పేమెంట్స్ బ్యాంక్ వంటి ఇతర పోటీదారులకు భారీగా కస్టమర్లను అందిస్తోంది. ఎయిర్ టెల్ రానున్న 4 నెలల కాలంలో కొత్తగా 10 లక్షల మంది వినియోగదారులకు పొందనున్నట్లు ఒక అజ్ఞాత వ్యక్తి పేర్కొన్నారు. ఫిబ్రవరి 15, 2024 నాటికి దాదాపు 1.5 మిలియన్ల యాక్టివ్ ఫాస్టాగ్ కస్టమర్ బేస్ కలిగి ఉన్నట్లు పేర్కొన్నారు.

అందుబాటులో ఉన్న సమాచారం ప్రకారం పేటీఎం పేమెంట్స్ బ్యాంక్ మెుత్తంగా 8 మిలియన్ ఫాస్టాగ్‌లను జారీ చేసినట్లు వెల్లడైంది. ఇది అత్యధిక సంఖ్య. ఫిబ్రవరి 16న భారతీయ రిజర్వ్ బ్యాంక్ నుంచి ఇటీవలి ఆదేశానుసారం Paytm ఫాస్టాగ్ కస్టమర్‌లు తమ ప్రస్తుత బ్యాలెన్స్‌లను ఉపయోగించడానికి అనుమతించబడ్డారు. అయితే వారు కొత్తగా బ్యాలెన్స్ యాడ్ చేయకుండా నిరోధించబడిన సంగతి తెలిసిందే. ఉన్న బ్యాలెన్స్ వినియోగించుకునేందుకు ఎలాంటి డెడ్‌లైన్ తేదీని పెట్టలేదు. ఈ క్రమంలోనే నేషనల్ హైవేస్ అథారిటీ ఆఫ్ ఇండియా (NHAI) ఫాస్టాగ్‌లను జారీ చేయడానికి అధికారం ఉన్న బ్యాంకుల జాబితా నుండి PPBLని తొలగించింది.

ఫాస్టాగ్ సేవల కోసం NHAI జాబితా చేసిన బ్యాంకుల్లో ఎయిర్‌టెల్ పేమెంట్స్ బ్యాంక్, అలహాబాద్ బ్యాంక్, AU స్మాల్ ఫైనాన్స్ బ్యాంక్, యాక్సిస్ బ్యాంక్, బ్యాంక్ ఆఫ్ బరోడా, బ్యాంక్ ఆఫ్ మహారాష్ట్ర, బంధన్ బ్యాంక్, కెనరా బ్యాంక్, సెంట్రల్ బ్యాంక్ ఆఫ్ ఇండియా, సిటీ యూనియన్ బ్యాంక్, కాస్మోస్ బ్యాంక్ సహా మరిన్ని ఉన్నాయి. అయితే పేటీఎం పేమెంట్స్ బ్యాంక్ సంక్షోభం తమకు భారీ స్థాయిలో కొత్త వినియోగదారులను అందిస్తుందని ఒక ప్రైవేట్ బ్యాంక్ అధికారి వెల్లడించారు.

ఫాస్టాగ్ ద్వారా వాహనం టోల్ గేటు వద్ద కదులుతుండగానే చెల్లింపులు చేసేందుకు వీలు కల్పిస్తుంది. ఇందుకోసం ఒక RFID చిప్ వాహన విండ్‌స్క్రీన్‌పై అతికించబడి ఉంటుంది. ఫాస్టాగ్‌కి లింక్ చేయబడిన ఖాతా నుంచి నేరుగా టోల్ చెల్లింపులు జరిపేందుకు ఇది దోహదపడుతుంది. దేశవ్యాప్తంగా అన్ని జాతీయ రహదారి టోల్ ప్లాజాలు, 100కి పైగా రాష్ట్ర రహదారి టోల్ ప్లాజాలతో సహా 750కి పైగా టోల్ ప్లాజాల వద్ద ఫాస్ట్‌ట్యాగ్‌లు పనిచేస్తున్నాయి.