Paytm News: ఫిబ్రవరి 29 తర్వాత Paytm పనిచేస్తుందా..? CEO విజయ్‌ శేఖర్ శర్మ క్లారిటీ..

Paytm Payments Bank: ఫిన్‌టెక్‌ యూనికార్న్ పేటీఎం పేమెంట్స్ బ్యాంక్‌పై నియంత్రణ సంస్థ రిజర్వ్ బ్యాంక్ ఆఫ్ ఇండియా తీవ్ర ఆంక్షలు విధించింది. ఫిబ్రవరి 29 తర్వతా ఎటువంటి క్రెడిట్ లేదా డిపాజిట్ ట్రాన్సాక్షన్స్ చేపట్టవద్దని ఆదేశించింది. అయితే మార్చి 1 నుంచి పేటీఎం యాప్ పనిచేస్తుందా లేదా అని పలువురిలో సందేహం తలెత్తుతోంది.

ఆర్‌బీఐ నిర్ణయంతో పేటీఎం వినియోగదారుల్లో ఆందోళన నెలకొంది. ఫిబ్రవరి 29 తర్వాత యాప్‌ను వినియోగించే అవకాశం ఉండదని చాలామంది భావిస్తున్నారు. దీనిపై కంపెనీ వ్యవస్థాపకులు విజయ్ శేఖర్ శర్మ X వేదికగా స్పందించారు. గడువు తేదీ తర్వాత కూడా యాప్ పనిచేస్తుందంటూ భరోసా ఇచ్చారు.

'ఫిబ్రవరి 29 తర్వాత కూడా మీ ఇష్టమైన పేటీఎం యాప్ యథావిధిగా పనిచేస్తుంది. ఎదురయ్యే ప్రతి సవాలుకు ఓ పరిష్కారం ఉంటుంది. దేశ ప్రజలకు సేవలు అందించేందుకు హృదయపూర్వకంగా కట్టుబడి ఉన్నాము. చెల్లింపు వ్యవస్థ, ఆర్థిక సేవల్లో ఇండియా ప్రపంచవ్యాప్తంగా ప్రశంసలను పొందుతుంది. ఈ ప్రయాణంలో PaytmKaro అతిపెద్ద ఛాంపియన్‌గా ఉంటుంది' అని విజయ్ శేఖర్ శర్మ పోస్ట్ చేశారు.

ఖాతాలు, వాలెట్‌లు, ఫాస్ట్‌ట్యాగ్‌లు సహా ఇతర సాధనాల్లో ఫిబ్రవరి 29 తర్వాత డిపాజిట్ లేదా టాప్-అప్‌ చేయడాన్ని నిలిపివేయాలని పేటీఎం పేమెంట్స్‌ బ్యాంక్‌ను ఆర్బీఐ ఆదేశించింది. అయితే వినియోగదారులు తమ ఖాతాలో అందుబాటులో ఉన్న నగదును విత్‌డ్రా చేసేందుకు అనుమతించింది. ఇప్పటికే మార్చి 11, 2022 నుంచి కొత్త క్లయింట్‌లను స్వీకరించకుండా నిషేధించింది. కాగా ఆర్బీఐ తాజా నిర్ణయం కంపెనీని మరింత ఇబ్బందులోకి నెట్టింది.