త్వరలో అదానీ గ్రూపు క్రెడిట్ కార్డు.. వీసాతో ఒప్పందం.. ఈ సేవలకు యాక్సెస్

Adani Credit Card: ఈ మధ్య జనం క్రెడిట్ కార్డులను విపరీతంగా వాడేస్తున్నారు. అందులోనూ ఆయా కంపెనీలతో చేతులు కలిపిన కో బ్రాండెడ్ కార్డులకు విపరీతమైన డిమాండ్ ఏర్పడింది. తద్వారా ఆ సంస్థలు ఇచ్చే ఆఫర్ల ద్వారా పెద్ద మొత్తంలో ఆదా చేసుకునే అవకాశం ఉండటంతో ఎక్కువగా ఆసక్తి చూపిస్తున్నారు.

ప్రముఖ దేశీయ దిగ్గజ వ్యాపార సంస్థ అదానీ గ్రూపుతో పేమెంట్‌ కంపెనీ వీసా చేతులు కలిపింది. కో బ్రాండెడ్ కార్డులు జారీ చేసేందుకు వీలుగా ఇరు కంపెనీల మధ్య ఒప్పందంపై సంతకాలు సైతం జరిగాయి. తద్వారా ఇండియాలో మరింతగా విస్తరించేందుకు వీసాకు అవకాశం ఏర్పడనుంది.

"రిటైల్, ఎయిర్ పోర్ట్స్, ఆన్‌లైన్ ప్రయాణ సేవల ద్వారా ఇప్పటికే 400 మిలియన్ల వినియోగదారులకు సేవలందిస్తున్నాము. కాగా ప్రస్తుతం తీసుకున్న
ఈ చర్య వల్ల బిజినెస్ ఉన్నత శిఖరాలకు చేరుతుందని ఆశిస్తున్నాం" అని వీసా CEO ర్యాన్ మెక్‌ఇనెర్నీ తెలిపారు.

అదానీ ఆధ్వర్యంలోని విమానాశ్రయాల ద్వారా ప్రయాణించే కస్టమర్‌లకు, ఆన్‌లైన్ ట్రావెల్ బుకింగ్ పోర్టల్ క్లియర్‌ట్రిప్ మరియు ట్రైన్ బుకింగ్ ప్లాట్‌ఫారమ్ అదానీ వన్‌ ఉపయోగించే వారికి ఈ ఒప్పందం వల్ల వీసా యాక్సెస్‌ లభిస్తుంది. మొత్తం 8 ఎయిర్‌ పోర్ట్స్ లో రద్దీ ఏడాదికి 103% శాతం పెరిగి 74.8 మిలియన్లకు చేరుకుంది. తద్వారా మెజారిటీ కస్టమర్లకు తమ సేవలందించాలని వీసా చూస్తున్నట్లు తెలుస్తోంది.