ఆ కార్లలో లోపాలు, 63,493 మారుతీ సుజుకీ కార్లు వెనక్కి

ఆటో దిగ్గజం మారుతి సుజుకీ 63,493 యూనిట్ల పెట్రోల్ స్మార్ట్ హైబ్రిడ్ కార్లను రీకాల్ చేస్తున్నట్లు ప్రకటించింది. సియాజ్, ఎర్టిగా, ఎక్స్‌ఎల్ 6 మోడల్స్‌లో మోటార్ జనరేటర్ యూనిట్‌ను సరిచేయడంలో భాగంగా వీటిని రీకాల్ చేస్తున్నట్లు కంపెనీ తన ప్రకటనలో తెలిపింది. జనవరి 1, 2019 నుంచి నవంబర్ 21, 2019 లోపు తయారైన ఈ కార్లలో జనరేటర్‌కు సంబంధించి సాంకేతిక సమస్యలు గుర్తించినట్లు పేర్కొంది. వీటిని పరిశీలించి ఉచితంగా మరమ్మత్తు చేసి ఇవ్వనున్నట్లు తెలిపింది.

ఈ కార్లన్నీ ఈ ఏడాది జనవరి 1 నుంచి నవంబరు 21 మధ్యలో ఉత్పత్తి అయినవని తెలిపింది. వినియోగదారుల ప్రయోజనార్థం, సమస్య ఉన్న కార్లన్నింటినీ వెనక్కి తెప్పిస్తున్నామని, అందులో బాగున్న వాటిని తిరిగి ఇచ్చేస్తామని పేర్కొంది. సమస్య ఉన్న కార్లలో ఉచితంగా మరో భాగాన్ని అమర్చనున్నట్లు తెలిపింది. తమ డీలర్లు శుక్రవారం నుంచి వినియోగదారులను సంప్రదించడం మొదలు పెట్టారని పేర్కొంది.

అంతర్జాతీయ సరఫరా సంస్థ చేసిన విడిభాగాల్లో లోపాలు ఉండే అవకాశం ఉండటంతో రీకాల్ చేస్తున్నామని తెలిపింది. డిసెంబర్ 6వ తేదీ నుంచి దేశవ్యాప్తంగా ఉన్న మారుతీ సుజుకీ డీలర్ల వద్ద ఉచితంగా లోపాలను గుర్తించి కొత్త వాటిని భర్తీ చేస్తామని పేర్కొంది.