బెంగళూరు హౌసింగ్ మార్కెట్ ఢమాల్.. ఒరాకిల్ లేఆప్స్ దెబ్బకు ఉద్యోగులు విలవిల..

టెక్ దిగ్గజం ఒరాకిల్ సంస్థలో చోటుచేసుకుంటున్న భారీ ఉద్యోగాల కోతలు కేవలం ఐటీ రంగానికే పరిమితం కాకుండా.. బెంగళూరులోని రియల్ ఎస్టేట్ మార్కెట్‌పై కూడా తీవ్ర ప్రభావాన్ని చూపిస్తున్నాయి. గత రెండు దశాబ్దాలుగా ఐటీ నిపుణుల స్థిరమైన ఆదాయం, పెరుగుతున్న జీతాల ప్రాతిపదికన వృద్ధి చెందిన నగర స్థిరాస్తి రంగం, ఇప్పుడు అనిశ్చితిలో పడింది. ఒరాకిల్ ఇప్పటికే భారతదేశంలో సుమారు 12 వేల మంది ఉద్యోగులను తొలగించగా.. రాబోయే నెల రోజుల్లో మరో విడత తొలగింపులు ఉంటాయన్న వార్తలు టెక్ నిపుణులలో ఆందోళనను పెంచుతున్నాయి. ఈ ఆకస్మిక పరిణామాలు గృహ కొనుగోలుదారుల ప్రవర్తనలో స్పష్టమైన మార్పుకు దారితీశాయి.

బెంగళూరులోని ప్రధాన గృహ కొనుగోలుదారులైన ఐటీ ఉద్యోగులు ఇప్పుడు ఖరీదైన ఆస్తుల విషయంలో వెనక్కి తగ్గుతున్నారు. కొందరు ఇల్లు కొనాలనే నిర్ణయాన్ని పూర్తిగా వాయిదా వేస్తుండగా.. మరికొందరు తమ ఆర్థిక భారాన్ని తగ్గించుకోవడానికి తక్కువ ధరలో లభించే నివాసాల వైపు మొగ్గు చూపుతున్నారు. దీనివల్ల మార్కెట్‌లో డిమాండ్ పూర్తిగా పడిపోకపోయినా.. విక్రయాల వేగం మందగించే సూచనలు కనిపిస్తున్నాయి. ముఖ్యంగా Bengaluru నగరంలో ఉద్యోగాలు కోల్పోయిన వారు ఇప్పటికే ఉన్న ఈఎంఐలు చెల్లించడానికి ఇబ్బంది పడుతుండగా.. ప్రస్తుతానికి ఉద్యోగాల్లో ఉన్నవారు భవిష్యత్తులో తమ పరిస్థితి ఏమవుతుందోనన్న భయంతో ఖర్చుల విషయంలో ఆచితూచి వ్యవహరిస్తున్నారు.

భారతదేశ ఐటీ సేవల రంగంలో చోటుచేసుకుంటున్న ఈ మందగమనానికి కృత్రిమ మేధ (AI) ప్రధాన కారణంగా మారుతోంది. గతంలో ఏటా 15 శాతం వృద్ధిని నమోదు చేసిన ఈ రంగం, ఇప్పుడు కేవలం 5-6 శాతానికి పరిమితమైంది. ఆటోమేషన్ వల్ల రాబోయే కొద్ది సంవత్సరాల్లో ఐటీ, కాల్ సెంటర్ ఉద్యోగాల్లో 20 శాతం వరకు కోత పడొచ్చని అంచనాలు వెలువడుతున్నాయి. ఈ మార్పుల వల్ల ఐటీ సంస్థలు మానవ శ్రమపై ఆధారపడటాన్ని తగ్గించుకుంటున్నాయి. ఇది నేరుగా ఉపాధి అవకాశాలను, తద్వారా రియల్ ఎస్టేట్ రంగంలో పెట్టుబడులను దెబ్బతీస్తోంది.

Bengaluru: ఇన్నాళ్లూ రోబోలా బతికా.. ఇప్పుడు ఫ్రీ! వైరల్ అవుతున్న బెంగళూరు టెక్కీ స్టోరీ!

ఆర్థిక మార్కెట్లు కూడా ఈ ప్రతికూల పరిస్థితులను ఇప్పటికే గుర్తించాయి. దీని ఫలితంగా నిఫ్టీ ఐటీ సూచీ గణనీయంగా క్షీణించింది. ఒకవేళ ఏఐ స్వీకరణ మరింత వేగవంతమైతే, 2028 నాటికి ఐటీ ఎగుమతులు కూడా దెబ్బతినే ప్రమాదం ఉందని నిపుణులు హెచ్చరిస్తున్నారు. ఇటువంటి పరిస్థితుల్లో టెక్ ఆదాయాలతో నేరుగా సంబంధం ఉన్న రియల్ ఎస్టేట్ వంటి రంగాలపై పరోక్ష ప్రభావాలు మరింత తీవ్రంగా ఉండే అవకాశం ఉంది. మొత్తంమీద, ఒరాకిల్ వంటి సంస్థల నిర్ణయాలు బెంగళూరుతో పాటు హైదరాబాద్, పూణే వంటి ఐటీ ఆధారిత నగరాల భవిష్యత్తుపై పెద్ద ప్రశ్నార్థకాన్ని మిగిల్చాయి.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.