Layoffs: ఒరాకిల్ ఎందుకు ఇన్ని వేల మందిని తీసేస్తోంది? లోపల జరుగుతోంది ఇదే!

ప్రముఖ గ్లోబల్ టెక్ దిగ్గజం ఒరాకిల్ (Oracle) నుండి వస్తున్న తాజా వార్తలు ఐటీ రంగాన్ని వణికించివేస్తున్నాయి. ప్రపంచవ్యాప్తంగా సుమారు 10,000 నుండి 30,000 మంది ఉద్యోగులను తొలగించాలని కంపెనీ నిర్ణయించగా, అందులో అత్యధికంగా ప్రభావితమైన దేశాల్లో భారత్ ఒకటి. సుమారు 12,000 మంది భారతీయ ఉద్యోగులు ఈ లేఆఫ్స్ (layoffs) వల్ల తమ ఉపాధిని కోల్పోయినట్లు అంచనా. క్లౌడ్, హెల్త్‌కేర్, సేల్స్ , నెట్‌సూట్ వంటి కీలక విభాగాల్లో ఈ కోతలు జరగడం గమనార్హం. అసలు ఇంత పెద్ద కంపెనీ, ఇంతమందిని ఎందుకు తొలగిస్తోంది? దీని వెనుక ఉన్న ఆర్థిక సమీకరణాలేంటి? అన్నది ఇప్పుడు ఆసక్తికరంగా మారింది.

ఏఐ (AI) కోసం భారీ పందెం.. ఉద్యోగులపై భారం!

ఒరాకిల్ తీసుకున్న ఈ కఠిన నిర్ణయం వెనుక కృత్రిమ మేధ (Artificial Intelligence) మౌలిక సదుపాయాల కోసం చేస్తున్న భారీ పెట్టుబడులు ఉన్నాయి. 2025లో ఒరాకిల్, ఓపెన్ ఏఐ (OpenAI) సంస్థతో దాదాపు 300 బిలియన్ డాలర్ల విలువైన క్లౌడ్ కంప్యూటింగ్ ఒప్పందాన్ని కుదుర్చుకుంది. చాట్ జీపీటీ వంటి అడ్వాన్స్‌డ్ ఏఐ సిస్టమ్స్ కోసం భారీ డేటా సెంటర్లను నిర్మించడమే ఈ ఒప్పందం లక్ష్యం. అయితే, ఈ వేగవంతమైన విస్తరణ కోసం ఒరాకిల్ దాదాపు 100 బిలియన్ డాలర్ల పైగా అప్పులు చేయాల్సి వచ్చింది. దీనివల్ల కంపెనీ ఫ్రీ క్యాష్ ఫ్లో (Free Cash Flow) దెబ్బతింది.

ఖర్చులను అదుపులోకి తెచ్చుకోవడానికి ఒరాకిల్ ఇప్పుడు తన సిబ్బందిని తగ్గించుకుంటోంది. ఈ layoffs ద్వారా కంపెనీ దాదాపు 8 నుండి 10 బిలియన్ డాలర్లను ఆదా చేయాలని భావిస్తోంది. ఈ మిగిలిన నిధులను ఏఐ ప్రాజెక్టుల కోసం మళ్లించనుంది. విచిత్రమేమిటంటే, ఏఐ టూల్స్ సహాయంతోనే తక్కువ మంది టీమ్‌లతో ఎక్కువ పని చేయవచ్చని ఒరాకిల్ భావిస్తోంది. అంటే, టెక్నాలజీ పెరుగుదల మనుషుల అవసరాన్ని తగ్గిస్తోందన్నమాట.

ఇండియాలో సెవెరెన్స్ ప్యాకేజీ (Severance Package) ఎలా ఉంది?

ఉద్యోగం కోల్పోయిన వారికి ఇచ్చే పరిహారం లేదా సెవెరెన్స్ ప్యాకేజీపై బెంగళూరులోని ఒరాకిల్ ఇండియా డెవలప్‌మెంట్ సెంటర్ ఉద్యోగులు సోషల్ మీడియాలో (ముఖ్యంగా రెడ్డిట్) కొన్ని వివరాలను పంచుకున్నారు. దీని ప్రకారం..

• సర్వీస్ ఆధారిత పే: పని చేసిన ప్రతి ఏడాదికి 15 రోజుల బేసిక్ శాలరీ.
• ఎక్స్ గ్రేషియా: ప్రతి ఏడాదికి అదనంగా మరో 15 రోజుల శాలరీతో పాటు, ఫిక్స్‌డ్ అమౌంట్‌గా రెండు నెలల జీతం.
• గార్డెనింగ్ లీవ్: ఒక నెల రోజుల పాటు పని చేయాల్సిన అవసరం లేకుండానే ఇచ్చే జీతం.
• లీవ్ ఎన్‌క్యాష్‌మెంట్: వాడుకోని సెలవులకు ఇచ్చే నగదు , దాదాపు రూ. 20,000 వరకు ఇన్సూరెన్స్ బెనిఫిట్.

మొత్తంగా చూస్తే ఒరాకిల్ తీసుకున్న ఈ నిర్ణయం కేవలం ఒక కంపెనీకి మాత్రమే పరిమితం కాదు. మొత్తం టెక్ పరిశ్రమ ఇప్పుడు ఏఐ వైపు అడుగులు వేస్తోంది. భారీ పెట్టుబడులు అవసరమైనప్పుడు కంపెనీలు మొదట చేసే పని మానవ వనరుల కోత. ఒకప్పుడు లక్షల్లో జీతాలు ఇచ్చి తీసుకున్న కంపెనీలే, ఇప్పుడు టెక్నాలజీ సాకుతో వేల మందిని ఇంటికి పంపిస్తున్నాయి. ఐటీ ఉద్యోగులు కేవలం కోడింగ్ మీదనే కాకుండా, మారుతున్న టెక్నాలజీకి అనుగుణంగా తమను తాము అప్‌డేట్ చేసుకోవాల్సిన అవసరాన్ని ఈ లేఆఫ్స్ (layoffs) మరోసారి గుర్తుచేస్తున్నాయి.