ఒరాకిల్ లేఆఫ్స్: 30,000 మంది ఉద్యోగుల తొలగింపు వెనుక AI పెట్టుబడులు, ఆర్థిక సవాళ్లు వెల్లడి!

ఆర్టిఫిషియల్ ఇంటెలిజెన్స్ (AI) టెక్నాలజీ వచ్చాక, కంపెనీలు తమ ఉద్యోగుల పట్ల వ్యవహరించే తీరే పూర్తిగా మారిపోయింది. చాలా సంస్థలు లాభాలనే లక్ష్యంగా పెట్టుకుని ఉద్యోగుల కొలువులపై వేటు వేస్తున్నాయి.

గత రెండేళ్లుగా ఐటీ కంపెనీల్లో భారీ సంఖ్యలో ఉద్యోగులను తొలగించడం మనం చూస్తూనే ఉన్నాం. మన దేశంలోనే టీసీఎస్ (TCS) తన ఉద్యోగుల్లో 2 శాతం మందిని తీసేసింది. ఇప్పుడు ఇదే బాటలో, అమెరికాకు చెందిన టెక్ దిగ్గజం ఒరాకిల్ (Oracle) ఏకంగా 30,000 మంది ఉద్యోగులను తొలగించాలని నిర్ణయించుకున్నట్లు వచ్చిన వార్త టెక్ ప్రపంచాన్ని షాక్‌కు గురిచేసింది.

ఈ నెలలోనే ఒరాకిల్ లేఆఫ్స్ ప్రకటన వెలువడవచ్చని, కంపెనీలో భారీ పునర్‌వ్యవస్థీకరణకు సిద్ధమైనట్లు బ్లూమ్‌బెర్గ్ నివేదిక పేర్కొంది. ఈ తొలగింపుల వల్ల ఒరాకిల్‌లోని పలు విభాగాల్లో పనిచేస్తున్న ఉద్యోగులపై ప్రభావం పడనుంది. వీరి స్థానంలో ఏఐ టెక్నాలజీని వినియోగించుకోవాలని ఒరాకిల్ నిర్ణయించినట్లు తెలుస్తోంది.

ఇటీవలే ఈ కంపెనీ తమ క్లౌడ్ విభాగంలో కొత్త నియామకాలను నిలిపివేసింది. ప్రస్తుతం ఏఐ రంగంపైనే పూర్తి దృష్టి సారించింది. దీనికోసం ఓపెన్‌ఏఐ (OpenAI)తో ఒక ఒప్పందం కూడా కుదుర్చుకుంది. అయితే, ఈ నిర్ణయం కంపెనీపై భారీ ఆర్థిక భారాన్ని మోపింది.

సాంప్రదాయ డేటాబేస్ సాఫ్ట్‌వేర్ కంపెనీగా ఉన్న ఒరాకిల్‌ను.. అమెజాన్, మైక్రోసాఫ్ట్ వంటి భారీ క్లౌడ్ కంపెనీగా మార్చాలని సీఈఓ లారీ ఎల్లిసన్ లక్ష్యంగా పెట్టుకున్నారు. ఇందుకోసం ఏఐ విభాగం, దానికి సంబంధించిన డేటా సెంటర్లు, టెక్నాలజీలపై భారీగా పెట్టుబడులు పెడుతున్నారు.

ఒరాకిల్ తన ఏఐ లక్ష్యాలను చేరుకోవడానికి 30 లక్షల జీపీయూలు (GPU) అవసరమని, దీనికి 156 బిలియన్ డాలర్ల మూలధనం కావాలని అంచనా. ఇటీవలే కంపెనీ 58 బిలియన్ డాలర్ల అప్పు తీసుకుంది. అయితే, ఒరాకిల్ திடீரென ఏఐపైనే పూర్తి దృష్టి పెట్టడంతో, ఆర్థిక సంస్థలు రుణాలు ఇచ్చేందుకు వెనుకాడుతున్నాయి. ఇప్పటికే అప్పులు పెరిగిపోవడం, ప్రస్తుత పెట్టుబడులపై 2030 వరకు లాభాలు రావనే అంచనాలతో చాలా సంస్థలు రుణాలు ఇవ్వడానికి నిరాకరిస్తున్నాయి.

ఈ నేపథ్యంలో, ఉద్యోగులను తొలగించడం ద్వారా వారి జీతాల రూపంలో ఆదా అయ్యే డబ్బును ఏఐ లక్ష్యాల కోసం ఉపయోగించుకోవాలని ఒరాకిల్ ప్లాన్ చేస్తున్నట్లు సమాచారం. అందుకే సుమారు 30,000 మందిని తొలగించాలని నిర్ణయించుకున్నట్లు తెలుస్తోంది. కాగా, అమెజాన్ ఈ ఏడాది జనవరిలో 16,000 మందిని, అంతకుముందు అక్టోబర్‌లో 14,000 మంది ఉద్యోగులను తొలగించిన విషయం తెలిసిందే.

గతేడాది మైక్రోసాఫ్ట్ కూడా 15,000 మంది ఉద్యోగులను తొలగించింది. సేల్స్‌ఫోర్స్, బ్లాక్ ఇంక్ వంటి అనేక ఇతర అగ్రశ్రేణి కంపెనీలు సైతం ఉద్యోగుల తొలగింపు ప్రక్రియను కొనసాగిస్తూనే ఉన్నాయి.