Oracleలో మరోసారి ఉద్యోగాల కోత.. AI కోసం భారీగా అప్పులు.. తాజా రిపోర్ట్‌లో సంచలన విషయాలు

ప్రపంచ సాంకేతిక దిగ్గజం ఒరాకిల్ (Oracle) మరో విడత లేఆఫ్‌లకు సిద్ధమవుతోంది. ఆర్టిఫిషియల్ ఇంటెలిజెన్స్ (AI), క్లౌడ్ మౌలిక సదుపాయాల (Infrastructure) పై వేల కోట్ల డాలర్లను వెచ్చిస్తున్న ఈ సంస్థ, నిర్వహణ ఖర్చులను తగ్గించుకోవడంలో భాగంగా సెప్టెంబర్ 1న ప్రారంభమయ్యే తమ రెండవ ఆర్థిక త్రైమాసికం లోపే ఉద్యోగుల సంఖ్యను తగ్గించాలని భావిస్తోంది. ఎన్డీటీవీ, బిజినెస్ ఇన్‌సైడర్ కథనాల ప్రకారం.. ఇప్పటికే పలు విభాగాల మేనేజర్లను తొలగించాల్సిన ఉద్యోగుల తుది జాబితాను సిద్ధం చేయాలని యాజమాన్యం కోరినట్లు సమాచారం.

కంపెనీ నివేదికల ప్రకారం 2026 మే 31తో ముగిసిన ఆర్థిక సంవత్సరంలోనే ఒరాకిల్ ప్రపంచవ్యాప్తంగా దాదాపు 21 వేల మంది ఉద్యోగులను (మొత్తం ఉద్యోగులలో సుమారు 13 శాతం) తొలగించింది. దీంతో గత ఏడాది 1,62,000గా ఉన్న మొత్తం సిబ్బంది సంఖ్య ప్రస్తుతం 1,41,000కి పడిపోయింది. తాజా లేఆఫ్‌ల ఫలితంగా కొన్ని విభాగాల్లో రెండంకెల శాతంలో (Double-digit percentage) కోతలు ఉండే అవకాశం ఉందని వార్తలు వస్తున్నప్పటికీ, ఎంతమందిపై ప్రభావం పడుతుందనేది కంపెనీ అధికారికంగా ధృవీకరించలేదు.

ఒరాకిల్ తీసుకుంటున్న ఈ కఠిన నిర్ణయాల వెనుక ప్రధానంగా ఏఐ మౌలిక సదుపాయాల విస్తరణే ఉందని నిపుణులు విశ్లేషిస్తున్నారు. 2026 ఆర్థిక సంవత్సరంలో కంపెనీ డేటా సెంటర్లు, ఏఐ చిప్‌లు, క్లౌడ్ కెపాసిటీ కోసం ఏకంగా 55.7 బిలియన్ డాలర్ల భారీ మొత్తాన్ని వెచ్చించింది. దీనివల్ల కంపెనీ నికర ఆదాయం కంటే వ్యయం 23.7 బిలియన్ డాలర్లు ఎక్కువగా నమోదైంది. ఈ భారీ విస్తరణను భర్తీ చేసేందుకు 43 బిలియన్ డాలర్ల అప్పులతో పాటు.. మరో 1.84 బిలియన్ డాలర్ల పునర్వ్యవస్థీకరణ (Restructuring), పరిహారాల (Severance Payments) కింద వెచ్చించాల్సి వచ్చింది.

Also Read

AI బదులు ఈ ఉద్యోగాలను నమ్ముకోండి.. మెటాలో 8 వేల మందిని పీకేసిన తర్వాత జుకర్ బర్గ్ సంచలన వ్యాఖ్యలు..

ఆర్టిఫిషియల్ ఇంటెలిజెన్స్ సాధనాల వినియోగం పెరగడం.. మౌలిక వసతులపై పెట్టుబడులు మళ్లించడం, ఆటోమేషన్ వైపు వేగంగా అడుగులు వేయడం ఒక్క ఒరాకిల్‌లోనే కాదు.. మొత్తం టెక్ రంగాన్నే కుదిపేస్తోంది. మెటా, అమెజాన్, మైక్రోసాఫ్ట్, గూగుల్ క్లౌడ్ వంటి ఇతర అంతర్జాతీయ టెక్ దిగ్గజాలు కూడా ఇదే తరహాలో తమ నిర్వహణ ఖర్చులను క్రమబద్ధీకరిస్తూ వేలాది మంది ఉద్యోగులకు గుడ్‌బై చెబుతున్నాయి.

డిస్క్లైమర్: ఈ వెబ్‌సైట్‌లోని అభిప్రాయాలు, సూచనలు పూర్తిగా వ్యక్తిగత విశ్లేషకులు లేదా ఇతర సంస్థలవి మాత్రమే. ఇవి Goodreturns.in లేదా Greynium Information Technologies Private Limited అధికారిక అభిప్రాయాలు కాదని గమనించగలరు.మేము ఈ విషయం యొక్క ఖచ్చితత్వం, సమగ్రత లేదా విశ్వసనీయతపై ఎటువంటి హామీ ఇవ్వడం కాని, అనుమతించడం కాని బాధ్యత వహించడం జరగదు. మేము ఎలాంటి పెట్టుబడి సలహా ఇవ్వము. అలాగే ఎటువంటి సెక్యూరిటీ కొనుగోలు లేదా అమ్మకాలు ప్రోత్సహించము. ఈ వెబ్‌సైట్‌లోని కథనం పూర్తిగా సమాచారం, విద్యా ప్రయోజనాల కోసమే అందించబడుతుంది. మీరు ఏదైనా పెట్టుబడి నిర్ణయం తీసుకునే ముందు, లైసెన్స్ పొందిన ఆర్థిక సలహాదారుల సహాయం తీసుకోండి. ఈ కథనాన్ని కేవలం సమాచారంగా మాత్రమే పరిగణించండి.