డాక్టర్ అవసరం లేదు.. ఇక ChatGPT నే మీ హెల్త్ గురు! జస్ట్ రిపోర్ట్స్ అప్‌లోడ్ చేస్తే చాలు!

ఆర్టిఫిషియల్ ఇంటెలిజెన్స్ రంగంలో అగ్రగామిగా ఉన్న OpenAI.. తన యూజర్ల కోసం ఒక సంచలన ఫీచర్‌ను పరిచయం చేసింది. అదే ఛాట్ జీపీటీ హెల్త్ (ChatGPT Health). సాధారణంగా మనకు ఏ చిన్న ఆరోగ్య సమస్య వచ్చినా వెంటనే గూగుల్‌లో సెర్చ్ చేస్తాం. కానీ, ఇప్పుడు నేరుగా ChatGPT లోనే మీ ఆరోగ్యానికి సంబంధించిన ప్రశ్నలకు సమాధానాలు పొందవచ్చు. కేవలం సమాధానాలే కాదు, మీ హెల్త్ రికార్డులను విశ్లేషించి మీకు సరైన సూచనలు కూడా ఇస్తుంది.

ఏమిటీ ChatGPT Health? ఎలా పనిచేస్తుంది?

OpenAI తన చాట్‌బాట్‌లో ప్రత్యేకంగా ఒక 'Health' ట్యాబ్‌ను జత చేసింది. ఇది కేవలం హెల్త్ కి సంబంధించిన ప్రశ్నలకు సమాధానాలు ఇస్తుంది.

• యాప్స్ కనెక్టివిటీ: యూజర్లు తమ ఆపిల్ హెల్త్ (Apple Health), ఫంక్షన్ (Function), మై ఫిట్‌నెస్ పాల్ (MyFitnessPal) వంటి పాపులర్ వెల్నెస్ యాప్‌లను దీనికి లింక్ చేసుకోవచ్చు.
• పర్సనలైజ్డ్ గైడెన్స్: మీరు తింటున్న ఆహారం, చేస్తున్న వ్యాయామం అలాగే మీ బాడీ డేటాను బట్టి ఇది మీకు వ్యక్తిగత సలహాలను అందిస్తుంది. వారానికి సుమారు 230 మిలియన్ల మంది యూజర్లు ఇప్పటికే ఆరోగ్య సలహాల కోసం ChatGPT ని వాడుతున్నారని కంపెనీ తెలిపింది.

డాక్టర్ విజిట్‌కు ముందు పక్కా ప్రిపరేషన్!

ఈ ఫీచర్ డాక్టర్లకు ప్రత్యామ్నాయం కాదు. కానీ, ఒక సహాయకారిగా పనిచేస్తుంది. మీ ల్యాబ్ రిపోర్ట్స్‌ ను ఇందులో అప్‌లోడ్ చేస్తే, కష్టమైన మెడికల్ టర్మ్స్‌ ను సులభంగా వివరించగలదు. అలాగే డాక్టరును కలిసినప్పుడు ఎలాంటి ప్రశ్నలు అడగాలి? మీ ఇన్సూరెన్స్ పాలసీలో ఎలాంటి బెనిఫిట్స్ ఉన్నాయి? వంటి విషయాల్లో ఇది మిమ్మల్ని ఒక అవగాహనకు తెస్తుంది. దీనివల్ల మీరు మీ ఆరోగ్యం పట్ల మరింత ఆత్మవిశ్వాసంతో ఉండవచ్చు.

ప్రైవసీకి పెద్దపీట: డేటా లీక్ భయం లేదు!

చాలామందికి తమ ఆరోగ్య సమాచారం AI కి ఇస్తే ఎక్కడ బహిర్గతం అవుతుందో అనే భయం ఉంటుంది. అందుకే OpenAI ప్రత్యేక రక్షణ చర్యలు చేపట్టింది. 'Health' ట్యాబ్‌లో మీరు చేసే సంభాషణలను OpenAI తన AI మోడల్స్‌కు శిక్షణ ఇవ్వడానికి (Training) ఉపయోగించదు. మీరు మెయిన్ చాట్‌లో హెల్త్ గురించి అడిగినా మరింత భద్రత కోసం మిమ్మల్ని హెల్త్ ట్యాబ్‌లోకి మారమని సిస్టమ్ సూచిస్తుంది.

ఎవరికి అందుబాటులో ఉంటుంది?

ప్రస్తుతానికి అమెరికా ఎఫ్.డి.ఏ (FDA) నిబంధనలకు అనుగుణంగా పరిమితంగా ఈ ఫీచర్‌ను విడుదల చేస్తున్నారు. ChatGPT Free, Plus, Pro వంటి ప్లాన్ల యూజర్లకు తొలి విడతలో యాక్సెస్ లభిస్తుంది. అయితే యూరోపియన్ దేశాల్లో ప్రస్తుతానికి ఇది అందుబాటులో లేదు. రాబోయే వారాల్లో వెబ్, iOS యూజర్లకు ఇది పూర్తిస్థాయిలో అందుబాటులోకి రానుంది.

మొత్తంగా చెప్పాలంటే టెక్నాలజీ పెరుగుతున్న కొద్దీ మన జీవనశైలి మారుతోంది. ChatGPT తెచ్చిన ఈ కొత్త ఫీచర్ సామాన్యులకు వైద్య పరిభాషను సులభంగా అర్థం చేసుకునేలా చేయడంలో కీలక పాత్ర పోషించబోతోంది. అయితే అత్యవసర సమయాల్లో మాత్రం ప్రొఫెషనల్ డాక్టర్ సలహా తీసుకోవడమే ఉత్తమం అని మర్చిపోవద్దు.