Ola News: గ్లోబల్ ఆపరేషన్స్‌కు ఓలా గుడ్‌బై.. భారత మార్కెట్‌పై మరింత ఫోకస్

Ride sharing: ప్రముఖ రైడ్ హెయిలింగ్ కంపెనీ ఓలా కీలక నిర్ణయం తీసుకుంది. FY22లో నష్టాల నుంచి లాభాల్లోకి దూసుకుపోయింది. ఇలా మంచి జోరుమీదున్న సమయంలోనూ సడన్‌గా షాక్ ఇచ్చింది. దేశీయ మార్కెట్‌కు పెద్దపీట వేయాలని భావిస్తోంది.

ఓలా తన గ్లోబల్ కార్యకలాపాలను మూసివేయనున్నట్లు తెలిపింది. పూర్తిగా భారతీయ మార్కెట్‌పై దృష్టి పెట్టాలని నిర్ణయించింది. మొబిలిటీ వ్యాపారం FY22లో 66 కోట్ల నష్టాల నుంచి FY23లో 250 కోట్ల లాభాన్ని నమోదు చేసింది. దీంతో దేశంలో మరింత విస్తరించేందుకు అపార అవకాశాలు ఉన్నందున వాటిని పూర్తిగా వినియోగించుకోవాలని చూస్తోంది.

'మొబిలిటీ భవిష్యత్తు ఎలక్ట్రిక్ అని బలంగా నమ్ముతున్నాం. కేవలం వ్యక్తిగత మొబిలిటీలోనే కాకుండా రైడ్-హెయిలింగ్ వ్యాపారం కోసం కూడా విరివిగా వినియోగించాలని భావిస్తున్నాం. ఈ దిశగా మా ప్రాధాన్యతలను పునఃపరిశీలించాము. UK, ఆస్ట్రేలియా మరియు న్యూజిలాండ్‌లోని మా విదేశీ రైడ్-హెయిలింగ్ వ్యాపారాన్ని మూసివేయాలని నిర్ణయించుకున్నాము' అని ఓలా ప్రతినిధి ఒక ప్రకటనలో తెలిపారు.

'FY23లో మనల్ని మేము సవాలు చేసుకున్నాము. వృద్ధి చెందడం మరియు స్కేల్ చేయడం మాత్రమే కాకుండా వ్యాపారాన్ని మరింత లాభదాయకంగా మార్చాలని చూస్తున్నాం. 58 శాతం మేర మా ఆదాయం బలంగా వృద్ధి చెందుతన్నప్పటికీ, మేము భారతదేశ మొబిలిటీ వ్యాపారంలో ఇంకా సానుకూలతను చూస్తున్నాం' అని కంపెనీ పేర్కొంది.