Ola News: ఓలా, ఉబెర్ నయా ప్లాన్.. డ్రైవర్లతో పాటు రైడర్లకూ ఇక పండగే..

Uber News: ప్రముఖ రైడ్ షేరింగ్ సంస్థలు ఓలా మరియు ఉబెర్‌లు ఓ కొత్త ఫీచర్‌ను ప్రవేశపెట్టాయి. ఈ విధానం అటు డ్రైవర్లతో పాటు వినియోగదారులకు ఉపయోగకరంగా ఉంటుందని విశ్లేషణలు వెలువడుతున్నాయి. ప్రయాణాలు మరింత చౌక కానున్నట్లు పేర్కొంటున్నారు.

ఓలా మరియు ఉబెర్ లు తమ ప్లాట్‌ఫారమ్‌లలో ఆటోరిక్షా డ్రైవర్ల కోసం సబ్‌స్క్రిప్షన్ ఆధారిత ప్లాన్‌లను అందించనున్నాయి. దీంతో ప్రతి రైడ్‌ పై ఆయా కంపెనీలు కమీషన్ వసూలు చేయడానికి ఫుల్‌ స్టాప్ పడనుంది. కాగా ఓలా ఈ మోడల్‌ను ఢిల్లీ-NCR, ముంబై, బెంగళూరు మరియు హైదరాబాద్‌లలో విడుదల చేసింది. చెన్నై, కొచ్చి మరియు విశాఖపట్నంలో ఉబెర్ ఈ విధానాన్ని ప్రారంభించినట్లు ప్రముఖ మీడియా సంస్థ నివేదించింది.

రైడ్ హెయిలింగ్ సంస్థల తాజా నిర్ణయంతో ఆటో-రిక్షా రైడ్‌లపై వర్తించే 5 శాతం GSTని దాటవేయవచ్చు. అయితే ఇందులో స్పష్టత లోపించడంతో ఆపరేటర్లు మరియు పన్ను అధికారుల మధ్య భవిష్యత్తులో వివాదాలకు దారితీయవచ్చని విశ్లేషకులు భావిస్తున్నారు. ఉబెర్ ప్రతినిధి ఈ మార్పును ధ్రువీకరించారు. అనేక కంపెనీలు ఇప్పటికే ఈ మోడల్‌లో పనిచేస్తున్నందున రైడర్ లకు ఆప్షన్ ఇవ్వాలనుకుంటున్నట్లు చెప్పారు.

ఇప్పటివరకు ఓలా మరియు ఉబెర్‌ లు కమీషన్-ఆధారిత ఆదాయ నమూనాను అనుసరించాయి. ప్లాట్‌ఫారమ్ ద్వారా జరిగి ప్రతి రైడ్‌కు ఛార్జీలో కొంత వాటాను కమీషన్‌ గా కట్ చేసేవి. మిగిలిన మొత్తాన్ని డ్రైవర్ భాగస్వాములకు పంచేవి. అయితే కొత్త మోడల్ ప్రకారం ప్లాట్‌ఫారమ్‌లు కస్టమర్‌లు మరియు డ్రైవర్ల మధ్య వారధిగా పనిచేస్తాయి. ఇందుకోసం డ్రైవర్ల భాగస్వాముల నుంచి రోజుకు లేదా వారానికి నిర్ధిష్ఠ సబ్‌స్క్రిప్షన్ రుసుమును వసూలు చేస్తాయి.